မဘိမ်းမြို့နယ်၊ ပင်ကြိမ်ရွာဟောင်းတွင် မုန်ယိုနေသောဆင်မှ လူ ၃ ဦးအား ထပ်မံသတ်ဖြတ်

မင်းဇော်မင်း

.

မိုးမိတ်ခရိုင်၊ မဘိမ်းမြို့နယ်၊ ပင်ကြိမ်ရွာဟောင်းတွင် ယနေ့ နိုဝင်ဘာလ ၁၃ ရက်၊ နံနက်ပိုင်းက မုန်ယိုနေသော ဆင်မှ လူ ၃ ဦးအား ထပ်မံသတ်ဖြတ်ခဲ့ကြောင်း သိရသည်။

.

.

အဆိုပါ မုန်ယိုဆင်သည် နိုဝင်ဘာလ ၁၁ ရက်၊ နံနက်ပိုင်းက စီပိန်းကျေးရွာတွင် ဆင်ဦးစီးအား သတ်ဖြတ်ခဲ့ပြီးနောက် ယခု နိုဝင်ဘာလ ၁၃ ရက်၊ နံနက်ပိုင်းတွင် လူ ၃ ဦးအား ထပ်မံသတ်ဖြတ်ခဲ့ခြင်းဖြစ်သည်ဟု သိရသည်။

.

“အရင်ရက်က ဆင်ဦးစီးကိုသတ်တယ်။ ဒီနေ့ (နိုဝင်ဘာ ၁၃ ရက်) မနက်အစောမှာ လူ ၃ ဦးကို ထပ်သတ်တယ်။ သူ့ကို ဖမ်းဖို့ မိုးမိတ်သစ်တောဌာနက လာနေပြီ။ တပ်ကလည်း ဆင်ကို ခြောက်လှန့်ပစ်ခတ် ထိန်းနေတယ်။ အခုမနက် အထိတော့ ရွာဟောင်း ဆန်စက်ထဲမှာ ခိုနေတယ်။ ဆင်ပိုင်ရှင် ဘယ်သူမှန်း မသိဘူး။ ရွာထဲကလူတွေလည်း လယ်ထဲ မဆင်းကြဘူး” ဟု မဘိမ်းမြို့နယ်ပြည်သူ့လွှတ်တော်ကိုယ်စားလှယ် ဦးမောင်ညိုက ကမ္ဘောဇတိုင်းသို့ ပြောသည်။

.

ယင်း မုန်ယိုဆင်သည် နိုဝင်ဘာလ ၁၂ ရက်က စီပိန်းရွာမှ ၆ မိုင်ခန့် ကွာဝေးသည့် ပင်ကြိမ်ရွာဟောင်းဘက်သို့ ရောက်ရှိ လာခြင်းဖြစ်ပြီး ရွာအနီးရှိ ဦးသန်းဇော်၏ လယ်တဲကို သွားရောက်ဖျက်ဆီးရာ ဦးသန်းဇော်မှ ထွက်ပြေးစဉ် ဦးဘဉာဏ် အိမ်ရှေ့အရောက်တွင် ဦးဘဉာဏ် (၃၀နှစ်) အား နင်းသတ်ခဲ့ခြင်းဖြစ်ပြီး ဦးအောင်ကြည်လွင် အိမ်ရှေ့အရောက်တွင် ဦးအောင်ကြည်လွင် (၃၀ နှစ်) နှင့် ၎င်း၏တူတော်စပ်သူ အသက် ၅ နှစ်အရွယ် ကလေးငယ်တို့အား ထပ်မံ သတ်ဖြတ်ခဲ့ခြင်း ဖြစ်သည်ဟု သိရသည်။

.

“ဘောလုံးကွင်း တိုင်တွေကိုဖျက်တယ်။ အိမ်တစ်အိမ်လည်း ဖျက်သွားတယ်။ လယ်ရိတ်ချိန် လယ်ထဲမှာ ဘယ်သူမှ မဆင်းရဲဘူး။ အခုလည်း ရွာနဲ့ အနီးမှာပဲ ရှိနေဆဲဆိုတော့ ဘယ်သူမှ မသွားမလာရဲကြဘူး။ တပ်ကနေ ဆင်ကို လိုက်ပစ် နေပါတယ်” ဟု စီပိန်းကျေးရွာ အုပ်ချုပ်ရေးမှူး ဦးညွန့်ဝင်းက ပြောသည်။

.

အဆိုပါဆင်အား ပစ်သတ်ခွင့် သို့မဟုတ် မည်သို့လုပ်ဆောင်မည်ကို  ယနေ့ နံနက် ၁၁ နာရီအထိ မသိရသေး ကြောင်းနှင့် ထပ်မံ၍ လူသေဆုံးမည်ကို ရွာသူရွာသားများ စိုးရိမ်နေကြကြောင်း သိရသည်။

.