တောင်ကြီးတက္ကသိုလ် အင်္ဂလိပ်စာ အထူးပြု ကျောင်းသား/သူများမှ ဒေါ်ကြီးဒေါ်ငယ် ပရဟိတကျောင်းသို့ စာအုပ်များ လှူဒါန်း

စုလှိုင်

.

တောင်ကြီးမြို့၊ ညောင်ရွှေဟော်ကုန်းရပ်ကွက်ရှိ ဒေါ်ကြီးဒေါ်ငယ် ပရဟိတကျောင်းတွင် ယနေ့ နိုဝင်ဘာလ ၂၀ ရက်၌ ကျရောက်သည့် ကမ္ဘာ့ကလေးများနေ့ အထိမ်းအမှတ်အဖြစ် တောင်ကြီးတက္ကသိုလ် အင်္ဂလိပ်စာအထူးပြု ကျောင်းသား/သူများအဖွဲ့မှ စာအုပ်စာ‌စောင်များ လှူဒါန်းခဲ့သည်ဟု သိရသည်။

.

.

“ကလေးငယ်တွေအတွက် နှလုံးသားအာဟာရ ဖြစ်သွားအောင်၊ သုတ၊ ရသစာအုပ်တွေနဲ့ ရင်းနှီး ပြီး အတွေးအခေါ အသိပညာတွေ ကြွယ်ဝလာစေဖို့ ရည်ရွယ်ပြီး အခုအစီစဉ်ကို ပြုလုပ်ရခြင်းဖြစ်ပါတယ်” ဟု တောင်ကြီးတက္ကသိုလ် အင်္ဂလိပ်စာအထူးပြုကျောင်းသား မောင်မျိုးလင်းအောင်က ကမ္ဘောဇတိုင်းသို့ ပြောသည်။

.

ထိုသို့ လှူဒါန်းရာတွင် ဒေါ်ကြီးဒေါ်ငယ် ပရဟိတစောင့်ရှောက်ရေးကျောင်းမှ ကလေးသူငယ် ၇၀ ဦး အတွက် ပုံပြင်၊ ၀တ္ထု၊ မဂ္ဂဇင်း၊ ဆောင်းပါး၊ ရုပ်ပြစာအုပ်များ၊ ကာတွန်းစသည့် သုတ၊ ရသစာအုပ်‌ ပေါင်း ၁၅၀ ကျော်နှင့် ကလေးသူငယ်များ အတွက် အ၀တ်အထည်များ လှူဒါန်းခဲ့သည်ဟု သိရသည်။

.

တောင်ကြီးတက္ကသိုလ် အင်္ဂလိပ်စာအထူးပြု ကျောင်းသား/သူများအဖွဲ့ အနေဖြင့် အေးသာယာမြို့ရှိ စိတ္တသုခ ပရဟိတ ကျောင်း၊ စမ်းလပမာ မိဘမဲ့စောင့်ရှောက်ရေးကျောင်းတို့တွင် စာအုပ်စာစောင်များ လှူဒါန်းခဲ့ပြီးဖြစ်ကာ ယခု တတိယ အကြိမ်အဖြစ် ဒေါ်ကြီးဒေါ်ငယ်ပရဟိတစောင့်ရှောက်ရေးကျောင်းတွင် စာအုပ်စာစောင်များ လှူဒါန်းခဲ့ခြင်းဖြစ်ကြောင်း သိရသည်။

.

ထို့အပြင် အဖွဲ့အနေဖြင့် COVID-19 ကာလအတွင်း တောင်ကြီးမြို့ပေါ်ရှိ ပုံမှန်ဝင်ငွေမရှိသော အခြေခံလူတန်းစား များအတွက် အခြေခံစားသောက်ကုန်များကိုလည်း လှူဒါန်းပေးလျက်ရှိသည်ဟု သိရသည်။

.