တောင်ကြီးမြို့၊ ညဈေးနာရီစင် ပြန်လည်ပြုပြင်နိုင်ရေး စီစဉ်နေ

စုလှိုင်

.

တောင်ကြီးမြို့၊ မြို့မဈေးတောင်ဘက်၊ တပင်ရွှေထီးလမ်း၊ ညဈေးတန်းအနီးရှိ နာရီစင်အား ပြန်လည်ပြုပြင်နိုင်ရေး သို့မဟုတ် ရွှေ့ပြောင်းတည်ဆောက်နိုင်ရေးအတွက် စီစဉ် ဆောင်ရွက်လျက်ရှိကြောင်း ရှမ်းပြည်နယ်အစိုးရအဖွဲ့ထံက သိရသည်။

.

.

“ပညာရှင်တွေနဲ့ တိုင်ပင်ပြီးတော့ ပြင်မလား၊ ရွှေ့မလားဆိုတာ စဉ်းစားရမှာပေါ့။ ဒီရက်ပိုင်းခေါ်မှာပါ။ ပြည်သူတွေ ကလည်း တောင်းဆိုနေတော့ လုပ်ပေးရမှာ အများကြီးပါ။ ရွေးကောက်ပွဲပြီးရင်တော့ အကောင်းဆုံးဖြစ်အောင် လုပ် ပေးမှာပါ” ဟု ရှမ်းပြည်နယ်အစိုးရအဖွဲ့ ပြောရေးဆိုခွင့်ရှိသူ စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်က ကမ္ဘောဇတိုင်းသို့ ပြောသည်။

.

အဆိုပါ နာရီစင်မှာ မြို့မဈေး ၃ ထပ်တိုက်အဆောက်အဦ ဆောက်လုပ်စဉ် ၁၉၉၀ နှစ်များက ဆောက်လုပ်ခဲ့ခြင်း ဖြစ်ကာ လက်ရှိတွင် ယိုယွင်းပျက်စီးနေသည့်အပြင် နာရီစင်အနီး၌ စည်းကမ်းမဲ့ အမှိုက်စွန့်ပစ်ခြင်းနှင့် အညစ်အကြေး စွန့်ပစ်မှုများကြောင့် မြို့တော်အင်္ဂါရပ်ကို ထိခိုက်စေကြောင်း ဒေသခံများက ဝေဖန်ပြောဆိုနေလျက်ရှိသည်။

.

“နာရီစင်က တောင်ကြီးမြို့နဲ့ မသင့်တော်ဘူး။ မြို့အင်္ဂါရပ်နဲ့လည်း မျက်စိပသာဒ မဖြစ်ဘူး။ နာရီစင်က အထိမ်း အမှတ်သင်္ကေတနေရာလောက်ပဲ ဖြစ်နေတာ။ အေးသာယာမှာရှိတဲ့ နာရီစင်ဆိုရင်လည်း မြက်တွေပေါက်နေပြီ။ နာရီက သိပ်မမြင်ရတော့ဘူး။ တကယ်တမ်းပြောရရင် ပြည်သူအတွက် အကျိုးမရှိဘူး” ဟု တောင်ကြီးမြို့နေ ဒေသခံတစ်ဦးက ၎င်း၏အမြင်ကို ပြောဆိုခဲ့သည်။

.

“အသစ်ပြင်မယ်လို့တော့ မဟုတ်ဘူး။ မြို့နယ်စည်ပင်သာယာရေးကော်မတီနဲ့ စည်ပင်သာယာရေးဌာန ကွင်းဆင်း ကြည့်တော့ အဲဒီနေရာမှာ နာရီစင်ရှိနေလို့ ညပိုင်းမှာ အပေါ့၊ အလေးစွန့်ပစ်တာတွေ၊ အမှိုက်ပစ်တာတွေ ရှိလာတယ်။ နာရီစင်ကလည်း တော်တော် ဟောင်းနွမ်းနေပြီ။ အသုံးပြုလို့လည်း မရတော့ ဖျက်သိမ်းရမယ့်သဘောရှိတယ်” ဟု တောင်ကြီးမြို့နယ်စည်ပင်သာယာရေးကော်မတီဝင် ဦးဇော်ဝင်းထူးကလည်း ပြောဆိုခဲ့သည်။

.

ယင်းနာရီစင်နေရာအား ကားရပ်နားရန်နေရာ ပြုလုပ်ခြင်း၊ ပြည်သူလူထု လမ်းသွားလမ်းလာများ အဆင်ပြေစေရန် အတွက် ပလက်ဖောင်း ပြုလုပ်ခြင်း၊ လမ်းတစ်လျှောက် ရှင်းလင်းခြင်းလုပ်ငန်းများကို ဆောင်ရွက်သွားရန် စီစဉ်ထားပြီး တစ်ပတ်အတွင်း အစည်းအဝေးခေါ်ယူ၍ ဆောင်ရွက်သွားမည်ဖြစ်ကြောင်း သိရသည်။

.