ထိုင်းနိုင်ငံတွင် အကျဉ်းချခံထားရသည့် ဝင်းဇော်ထွန်းနှင့် ဇော်လင်းတို့ ၂ ဦးအတွက် တတ်နိုင်သမျှ ကူညီဆောင်ရွက်ပေး သွားမည်ဟု တပ်ချုပ် ပြော - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Friday, November 6, 2020

ထိုင်းနိုင်ငံတွင် အကျဉ်းချခံထားရသည့် ဝင်းဇော်ထွန်းနှင့် ဇော်လင်းတို့ ၂ ဦးအတွက် တတ်နိုင်သမျှ ကူညီဆောင်ရွက်ပေး သွားမည်ဟု တပ်ချုပ် ပြော

စိုင်းသိင်္ခသူ

.

ထိုင်းနိုင်ငံတောင်ပိုင်း၊ လိပ်ကျွန်းလူသတ်မှုဖြင့် အကျဉ်းချခံထားရသည့် မြန်မာနိုင်ငံသား ဝင်းဇော်ထွန်းနှင့် ဇော်လင်း တို့ ၂ ဦးအတွက် တတ်နိုင်သမျှ ကူညီဆောင်ရွက်ပေးသွားမည်ဖြစ်ကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောဆိုခဲ့သည်ဟု သိရသည်။

.


.

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် နိုဝင်ဘာလ ၄ ရက်၊ မွန်းလွဲပိုင်းက ထိုင်းဘုရင့်တပ်မတော် ကာကွယ်ရေးဦးစီးချုပ် General Chalermphon Srisawasdi နှင့် Video Teleconference မှ တစ်ဆင့် တွေ့ဆုံဆွေးနွေးစဉ် ယင်းကဲ့သို့ ပြောဆိုခဲ့ခြင်းဖြစ်သည်ဟု တပ်မတော်သတင်းမှန်ပြန်ကြားရေးအဖွဲ့က နိုဝင်ဘာလ ၆ ရက်တွင် သတင်းထုတ်ပြန်ထားသည်။

.

ထိုသို့ တွေ့ဆုံရာတွင် တပ်မတော်ကာကွယ်ရေးဦးစီးချုပ်က ထိုင်းနိုင်ငံ၊ Bang Kwang အကျဉ်းထောင်တွင် အကျဉ်း ကျခံလျက်ရှိသော မြန်မာနိုင်ငံသားရွှေ့ပြောင်းအလုပ်သမား ဝင်းဇော်ထွန်း(ခေါ်) ဝေဖြိုးနှင့် ဇော်လင်းတို့နှစ်ဦး၏ နေထိုင်စားသောက်မှု၊ ကျန်းမာရေးနှင့် အခြားလိုအပ်ချက်များကို ကူညီဆောင်ရွက်ပေးနိုင်ရေး မေတ္တာရပ်ခံခဲ့သည် ဟုသိရသည်။

.

တပ်မတော်ကာကွယ်ရေးဦးစီးချုပ်၏ မေတ္တာရပ်ခံချက်အရ ထိုင်းဘုရင့်တပ်မတော် ကာကွယ်ရေးဦးစီးချုပ်ရုံး၏ စီစဉ်မှုဖြင့် နိုဝင်ဘာလ ၅ ရက်တွင် ဝင်းဇော်ထွန်းနှင့် ဇော်လင်းတို့နှစ်ဦးအား ရိုက်ကူးထားသည့်ဗွီဒီယိုဖိုင်နှစ်ခုကို မြန်မာစစ်သံ (ကြည်း၊ ရေ၊ လေ) ရုံးမှတစ်ဆင့် ပေးပို့လာခဲ့ရာ အဆိုပါ ဗွီဒီယိုဖိုင်မှတ်တမ်းများအရ ၎င်းတို့နှစ်ဦးသည် မိဘများထံ စာရေးသား၍ဆက်သွယ်ခဲ့သော်လည်း ပြန်စာရောက်ရှိလာခြင်းမရှိဘဲ အဆက်အသွယ်မရသည်မှာ ကြာမြင့်ပြီဖြစ်ကြောင်း၊ လက်ရှိအချိန်၌ မြန်မာနိုင်ငံတွင် COVID-19  ရောဂါကူးစက်ဖြစ်ပွားမှု မြင့်မားနေသည်ဟုသိရှိရ သဖြင့် မိဘများ၏ ကျန်းမာရေးကိုလည်းစိုးရိမ်မိပါကြောင်း၊  အကျဉ်းကျခံနေရစဉ်အတွင်း လေ့လာရန် မြန်မာစာအုပ် များနှင့် အင်္ဂလိပ်စာစာအုပ်များကို ပို့ပေးစေလိုပါကြောင်း၊ အကျဉ်းထောင်အတွင်းနေထိုင်ရသည်မှာ အတိုင်းအတာ တစ်ခုအထိ အဆင်ပြေမှုရှိသော်လည်း မြန်မာနိုင်ငံရှိအကျဉ်းထောင်သို့ ပြောင်းရွှေ့ခွင့်ရပါက မိဘဆွေမျိုးများနှင့် တွေ့ဆုံနိုင်မည်ဖြစ်ပါကြောင်းနှင့် ယခုကဲ့သို့ မိမိတို့၏ လိုအပ်ချက်များကို လာရောက်မေးမြန်းပေးသည့်အတွက် တာဝန်ရှိသူများကို ကျေးဇူးတင်ရှိပါကြောင်းဖြင့် ပြောကြားသည်ဟု ထုတ်ပြန်ချက်တွင် ဖော်ပြပါရှိသည်။

.

တပ်မတော်အနေဖြင့် ထိုင်းနိုင်ငံမှတာဝန်ရှိသူများ၊ ထိုင်းဘုရင့်တပ်မတော်မှ တာဝန်ရှိသူများနှင့် ဆက်သွယ်ညှိနှိုင်း၍  မြန်မာစစ်သံ (ကြည်း၊ ရေ၊ လေ) ရုံးမှတစ်ဆင့် ၎င်းတို့နှစ်ဦး၏ နေထိုင်စားသောက်ရေး၊ ကျန်းမာရေးနှင့် အခြား လိုအပ်ချက်များကို တတ်နိုင်သရွေ့ ကူညီဆောင်ရွက်ပေးသွားမည်ဖြစ်ကြောင်း ယင်းထုတ်ပြန်ချက်တွင် ဖော်ပြ ထားသည်။

.

No comments:

Post a Comment

Journal Download

Photo of three cats