ကျိုင်းလပ်တွင် ခိုးဝင်တရုတ်နိုင်ငံသား ၁၂ ဦးအား ဖမ်းမိ

မင်းဇော်မင်း

.

တာချီလိတ်ခရိုင်၊ ကျိုင်းလပ်မြို့တွင် ယနေ့ နိုဝင်ဘာလ ၂၉ ရက်၊ နံနက်ပိုင်းက တရားမဝင် ဝင်ရောက်လာသည့် ခိုးဝင် တရုတ်နိုင်ငံသား ၁၂ ဦးအား ဖမ်းဆီးရမိခဲ့ကြောင်း သိရသည်။

.

.

တပ်မတော်စစ်ကြောင်းနှင့်ပူးပေါင်းအဖွဲ့သည် ကျိုင်းလပ်မြို့နယ်အတွင်းနယ်မြေရှင်းလင်းရေးဆောင်ရွက်စဉ် ယင်း တရုတ် နိုင်ငံသား ၁၂ ဦးအား တွေ့ရှိရသဖြင့် စစ်ဆေးရာ တရားမဝင်ခိုးဝင်လာသူ တရုတ်နိုင်ငံသားများဖြစ်ကြောင်း စစ်ဆေးတွေ့ရှိခဲ့ခြင်းဖြစ်ပြီး ၎င်းတို့မှာ တာချီလိတ်မြို့ရှိ KTV နှင့်လောင်းကစားရုံများတွင် အလုပ်လုပ်ကိုင်ရန် လာရောက်ခြင်းဖြစ်ကြောင်း စစ်ဆေးပေါ်ပေါက်ခဲ့သည်ဟု သိရသည်။

.

အဆိုပါ ဖမ်းဆီးရမိသည့် တရုတ်နိုင်ငံသား အမျိုးသား ၉ ဦးနှင့် အမျိုးသမီး ၃ ဦးတို့အား မိုင်းပါလျိုးနယ်မြေရဲစခန်းတွင် အပ်နှံကာ ဥပဒေအရ အမှုဖွင့်အရေးယူနိုင်ရေးအတွက် ဆောင်ရွက်လျက်ရှိကြောင်း သိရသည်။

.

အဆိုပါကိစ္စနှင့် ပတ်သက်၍ ကျိုင်းလပ်မြို့၊ လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာဦးစီးဌာနမှူး ဦးစိုင်းသန်းထွန်းထံသို့ ဆက်သွယ်မေးမြန်းရာတွင် ဖုန်းစက်ပိတ်ထားသည့်အတွက် ဆက်သွယ်၍ မရခဲ့ချေ။

.