တောင်လေးလုံးစစ်ဆေးရေးဂိတ်တွင် ကျန်းမာရေးစစ်ဆေးမှု မခံယူသည့် အမျိုးသားကို အရေးယူထား - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, November 12, 2020

တောင်လေးလုံးစစ်ဆေးရေးဂိတ်တွင် ကျန်းမာရေးစစ်ဆေးမှု မခံယူသည့် အမျိုးသားကို အရေးယူထား

စုလှိုင်

.

တောင်ကြီးမြို့နယ်၊ တောင်လေးလုံးကျေးရွာ COVID-19 ကျန်းမာရေး စစ်ဆေးရေးဂိတ်တွင် နိုဝင်ဘာလ ၁၁ ရက် ညပိုင်းက ကျန်းမာရေးစစ်ဆေးမှု မခံယူဘဲ မောင်းနှင်ထွက်ပြေးသည်ဟုဆိုကာ ယာဉ်မောင်းအမျိုးသားတစ်ဦးအား အရေးယူထားကြောင်း သိရသည်။

.

Photo - Eagle White
.

တောင်လေးလုံးကျေးရွာ COVID-19 စစ်ဆေးရေးဂိတ်တာဝန်ခံနှင့် အဖွဲ့သည် ကျန်းမာရေးစစ်ဆေးမှုများ ဆောင်ရွက် နေစဉ် နိုဝင်ဘာလ ၁၁ ရက်၊ ည ၉ နာရီအချိန်က ဟဲဟိုးဘက်မှ တောင်ကြီးဘက်သို့ မောင်းနှင်လာသည့် MAZADA BIANTE အမျိုးအစား မော်တော်ယာဉ်အား တာဝန်ကျ ယာဉ်ထိန်းရဲတပ်ဖွဲ့ဝင်မှ ကျန်းမာရေးစစ်ဆေးမှု ခံယူနိုင်ရေး အတွက် ရပ်တန့်ရန် တားဆီးရာ ယာဉ်အား ရပ်တန့်ပေးခြင်းမရှိဘဲ မောင်းနှင်ထွက်ပြေးသွားခဲ့ခြင်း ဖြစ်ကြောင်း အမှတ်(၁၈) ယာဉ်ထိန်းရဲဒုတပ်ဖွဲ့ခွဲမှူးရုံးမှ သိရသည်။

.

အဆိုပါ မောင်းနှင်ထွက်ပြေးသွားသည့် မော်တော်ယာဉ်အား တာဝန်ကျ ယာဉ်ထိန်းရဲတပ်ဖွဲ့ဝင်တစ်ဦးမှ လိုက်လံ တားဆီးရာ စစ်ဆေးရေးဂိတ်နှင့် ကိုက် ၅၀၀ ကျော်ခန့်တွင် ယာဉ်ရပ်တန့်ပေးသဖြင့် စစ်ဆေးရေးဂိတ်သို့ ခေါ်ဆောင် စစ်ဆေးခဲ့ရာ ယာဉ်မောင်းသူမှာ ဟဲဟိုးမြို့၊ အင်းခေါင်းကျေးရွာနေ လှိုင်ဦးဇော် ဆိုသူဖြစ်ကြောင်း သိရပြီး ကျန်းမာရေး အထောက်အထားများ ပြသနိုင်ခြင်းမရှိဘဲ ယာဉ်မောင်းနှင်ထွက်ပြေးခြင်း ဖြစ်ကြောင်း သိရသည်။

.

ယင်းကဲ့သို့ ကျန်းမာရေးစစ်ဆေးမှု မခံယူဘဲ ယာဉ်မောင်းနှင်ထွက်ပြေးသူ ယာဉ်မောင်း လှိုင်ဦးဇော်အား တောင်ကြီး မြို့နယ် သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီဥက္ကဋ္ဌ၊ မြို့နယ်အုပ်ချုပ်ရေးမှူး ဦးဖြိုးမင်းထိုက် မှ တရားလိုပြုလုပ်၍ ရွှေညောင်မြို့မရဲစခန်းတွင် (ပ)၉၃/၂၀၂၀၊ သဘာဝဘေးအန္တရာယ် ကာကွယ်တားဆီးရေးဆိုင်ရာ ဥပဒေပုဒ်မ ၂၅ ဖြင့် အမှုဖွင့်အရေးယူထားကြောင်း သိရသည်။

.

No comments:

Post a Comment

Journal Download

Photo of three cats

About