နမ္မတူမြို့လယ် မြစ်ကူးတံတားပေါ်မှ ယာဉ်များ စတင်ဖြတ်သန်းခွင့်ပြု

စောဦး (ရတနာမြေ)

.

ကျောက်မဲခရိုင်၊ နမ္မတူမြို့လယ်ရှိ မြစ်ကူးတံတားပေါ်တွင် ယနေ့ နိုဝင်ဘာလ ၂၅ ရက်၊ နံနက်ပိုင်းက အန္တရာယ်ကင်း ပရိတ် တရားတော်များ ရွတ်ဖတ်ပူဇော်ပြီးနောက် ယာဉ်များ စတင်ဖြတ်သန်းသွားလာခွင့်ပြုပြီဖြစ်ကြောင်း တံတားဦးစီးဌာန၊ တံတားအထူးအဖွဲ့ (၄) မှ သိရသည်။

.

.

ပရိတ်တရားတော် ရွတ်ဖတ်ပူဇော်ပွဲတွင် နမ္မတူမြို့နယ် စည်ပင်သာယာရေးကော်မတီ ဥက္ကဋ္ဌ ဦးဆန်းလွင်၊ တံတား အထူးအဖွဲ့ (၄) မှ တာဝန်ရှိသူများနှင့် ဒေသခံပြည်သူများက ဆရာတော်၊ သံဃာတော်များအား ပူဇော်ကန်တော့်ခဲ့ပြီး နမ္မတူမြို့နယ်၊ ဣစ္ဆာသယမြို့လယ်ကျောင်းတိုက်မှ ဆရာတော်များထံက ငါးပါးသီလ ခံယူဆောက်တည်ကာ ဆရာတော်များက အန္တရာယ်ကင်းပရိတ်တရားတော်များ ရွတ်ပွားပူဇော်ခဲ့ကြောင်း သိရသည်။

.

ထို့နောက် ဆရာတော်၊ သံဃာတော်များအား လှူဖွယ်ဝတ္ထုပစ္စည်းများ ဆက်ကပ်လှူဒါန်းပြီး ရေစက်သွန်းချ အမျှပေးဝေကာ နေ့လယ် ၁၂ နာရီတွင် နမ္မတူမြို့လယ် မြစ်ကူးတံတားပေါ်မှ ယာဉ်များ စတင်ဖြတ်သန်းခွင့် ပြုခဲ့ခြင်းဖြစ်ကြောင်း သိရသည်။

.          

အဆိုပါ နမ္မတူမြို့လယ်မြစ်ကူးတံတားသည် Steel Plate Girder၊ သံကူကွန်ကရစ် ယက္မ + သံကူကွန်ကရစ်ကြမ်းခင်း၊ အောက်ထည် သံကူကွန်ကရစ်တိုင်ကိုယ်ထည်အမျိုးအစား တံတားဖြစ်ပြီး တံတားအရှည် ၂၈၀ ပေ၊ တံတားခန်းဖွဲ့ ၄ ခန်း၊ ရေလမ်းကင်းလွတ်အကျယ် ၁၂၈ ပေ၊ ရေလမ်းကင်းလွတ်အမြင့် ၃ ပေ၊ ယာဉ်သွားလမ်းအကျယ် ၂၄ ပေ၊ လူသွားလမ်း အကျယ် တစ်ဘက် ၃ ပေ၊ တံတားအကျယ် ၃၀ ပေရှိကာ ခွင့်ပြုယာဉ်အလေးချိန် HL -93 Load Class ဖြစ်ကြောင်း သိရသည်။

.

တံတားတည်ဆောက်မှုအတွက် ရှမ်းပြည်နယ်အစိုးရခွင့်ပြုရန်ပုံငွေကျပ် ၁၁၈၇ ဒသမ ၆၅ သန်းဖြင့် ၂၀၁၈ ခုနှစ်၊ ဒီဇင်ဘာလ ၁ ရက်တွင် စတင်တည်ဆောက်ခဲ့ခြင်းဖြစ်ကြောင်း တံတားအထူးအဖွဲ့ (၄) မှ လက်ထောက်ညွှန်ကြား ရေးမှူး ဦးသူရသန်းထံက သိရသည်။

.

ယခုကဲ့သို့ နမ္မတူမြို့လယ် မြစ်ကူးတံတား တည်ဆောက်ပြီးစီးသဖြင့် ဒေသခံများ၏ လူမှု၊ စီးပွားဘဝ အဘက်ဘက်မှ ဖွံ့ဖြိုးတိုးတက်လာစေမည်ဖြစ်ကြောင်း သိရသည်။

.