ကမ္ဘာ့စားနပ်ရိက္ခာအစီအစဉ်ဖြင့် ကုလသမဂ္ဂ အထူးလေယာဉ်တစ်စီး စတင်ပြေးဆွဲ

စိုင်းသိင်္ခသူ

.

ကမ္ဘာ့စားနပ်ရိက္ခာအစီအစဉ် (WFP) ၏ စီစဉ်မှုဖြင့် ကုလသမဂ္ဂ အထူးလေယာဉ်တစ်စီးသည် ယနေ့ အောက်တိုဘာလ ၂၄ ရက်၊ နံနက်ပိုင်းက ဆေးပစ္စည်း အထောက်အပံ့များနှင့် အကူအညီပေးရေးဝန်ထမ်း များကို တင်ဆောင်ကာ ရန်ကုန်မြို့မှ စစ်တွမြို့သို့ စတင်ပျံသန်းခဲ့ကြောင်း သိရသည်။

.

.

COVID-19 ကူးစက်ရောဂါ ထိန်းချုပ်မှုတစ်ရပ် အနေဖြင့် ပြည်တွင်းလေကြောင်းခရီးစဉ်များအား စက်တင်ဘာ လမှ စတင်၍ ခေတ္တရပ်နားထားခြင်းကြောင့် WFP ၏ လူသားချင်းစာနာထောက်ထားမှုဆိုင်ရာ ပြည်တွင်း လေကြောင်းခရီးစဉ်ကို ပြန်လည်စတင်ပြေးဆွဲလိုက်ခြင်းဖြစ်ကြောင်း သိရသည်၊

.

ရန်ကုန်မြို့နှင့် စစ်တွေမြို့တို့အကြား ဆက်သွယ်ထားသည့် ကုန်းလမ်း၊ ရေလမ်းများမှာ လတ်တလော သွားလာရန် ခက်ခဲသည့် အခြေအနေတွင် ရှိနေသည့်အတွက် ယင်းကဲ့သို့ လေယာဉ်ခရီးစဉ် ပြေးဆွဲခြင်း ဖြစ်သည်ဟု သိရသည်။

.

“WFP အနေနဲ့ မြန်မာနိုင်ငံမှာ လူသားချင်းစာနာထောက်ထားမှုအကူအညီပေးနေတဲ့ အဖွဲ့အစည်းတွေ အားလုံးအတွက် အခုလို လေကြောင်းခရီးစဥ်တွေကနေတစ်ဆင့် သယ်ယူပို့ဆောင်ရေး ဝန်ဆောင်မှု ပေးခွင့်ရတဲ့အတွက် ဂုဏ်ယူမိပါတယ်” ဟု WFP ၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Stephen Anderson က ပြောသည်။ 

.

“လိုအပ်ချက်ရှိတဲ့အပေါ်မှာမူတည်ပြီး အခုလိုပြည်တွင်းလေကြောင်းခရီးစဉ်တွေကို တိုးချဲ့ပြေးဆွဲသွားနိုင်ဖို့ ကျွန်တော်တို့ ပြင်ဆင်ထားပါတယ်။ COVID-19 တုံ့ပြန်မှုလုပ်ငန်းတွေနဲ့ လူသားချင်းစာနာထောက်ထားမှု လုပ်ငန်းတွေမှာ ရှေ့တန်းကနေပါဝင်ကူညီကြမယ့်သူတွေကို လိုရာခရီးရောက်အောင် သယ်ယူပို့ဆောင်ပေး နိုင်ဖို့ဖြစ်ပါတယ်” ဟု Mr. Anderson က ဆက်လက်ပြောဆိုခဲ့သည်။

.

WFP ၏ လေကြောင်းခရီးစဉ်တွင် လိုက်ပါသူခရီးသည်များသည် ခရီးစဉ်မတိုင်မီ ကျန်းမာရေးနှင့်အားကစား ဝန်ကြီးဌာန၏ ပံ့ပိုးကူညီမှုဖြင့် COVID-19 ဆေးစစ်မှုခံယူကြရပြီး၊ နိုင်ငံတော်အစိုးရက ချမှတ်ထားသော လေကြောင်းခရီးဆိုင်ရာ စည်းမျဥ်းစည်းကမ်းများနှင့် အသွားအလာကန့်သတ်မှု စည်းမျဉ်း စည်းကမ်းများကို ခရီးစဉ်အတွင်းနှင့် ခရီးစဉ်ပြီးဆုံးချိန်တွင် အတိအကျ လိုက်နာကြရသည်ဟုသိရသည်။

.

ယခုလေကြောင်းခရီးစဥ်ကို ဥရောပသမဂ္ဂ European Civil Protection and Humanitarian Aid Operations (ECHO) ၏ ဘဏ္ဍာငွေအထောက်အပံ့နှင့်အတူ နိုင်ငံခြားရေးဝန်ကြီးဌာန၊ ကျန်းမာရေးနှင့် အားကစား ဝန်ကြီးဌာန၊  လေကြောင်းပို့ဆောင်ရေးညွှန်ကြားမှုဦးစီးဌာန နှင့် အခြားမိတ်ဖက်အဖွဲ့အစည်းများ၏ ပေါင်းစပ်ညှိနှိုင်းပေးမှု ဖြင့်  စတင်ပြေးဆွဲနိုင်ခြင်းဖြစ်ကြောင်းသိရသည်။

.

ထို့အတူ အပြည်ပြည်ဆိုင်ရာ စီးပွားဖြစ်လေကြောင်းခရီးစဉ်များ  ခေတ္တရပ်ဆိုင်းထားခြင်းကြောင့် WFP သည် မေလအစောပိုင်းမှစတင်ကာ ရန်ကုန်၊ ဗီယန်ကျင်းနှင့် ကွာလာလမ်ပူမြို့များကိုဆက်သွယ်သည့် အထူးလေကြောင်းခရီးစဉ်များကို အပတ်စဉ်ပုံမှန်ပြေးဆွဲပေးလျက်ရှိပြီး၊ မြန်မာနိုင်ငံအတွင်းသို့ ဆေးပစ္စည်း အထောက်အပံ့များနှင့် အကူအညီပေးရေးဝန်ထမ်းများအား ပုံမှန်သယ်ယူပို့ဆောင်ပေးလျက်ရှိသည်ဟု သိရသည်။

.

WFP သည် COVID-19 တုံ့ပြန်မှုအထောက်အပံ့ တစ်စိတ်တစ်ပိုင်းအနေဖြင့် မြန်မာနိုင်ငံနေရာအနှံ့အပြားရှိ အသွားအလာကန့်သတ်‌စောင့်ကြည့်မှုစင်တာများ၊ COVID-19  ကုသရေးဌာနများ နှင့် နယ်စပ်ဂိတ်များ၌ ထမင်းဟင်းလျာ စားနပ်ရိက္ခာများကို ဆက်လက်ထောက်ပံ့ပေးအပ်လျက်ရှိကြောင်း သိရသည်။

.