စိုင်းမျိုးမြတ်
.
တောင်ကြီးမြို့နယ်၊ အေးသာယာမြို့မှ COVID-19 အတည်ပြုလူနာနှင့် ထိတွေ့ဆက်စပ်မှု ရှိခဲ့သည့် တောင်ကြီးမြို့၊ ကန်အောက်ရပ်ကွက်၊
နဂါးပွက်ကျောင်းလမ်းရှိ နေအိမ်တစ်လုံးအား ယမန်နေ့ (အောက်တိုဘာလ ၂ ရက်)၊ ည ၁၂ နာရီမှ
စတင်၍ Home Quarantine ပြုလုပ်ပြီး နေအိမ်ရှိ လူများအား အသွားအလာ
ကန့်သတ်ထားကြောင်း သိရသည်။
.
“Positive
လူနာနဲ့ ထိတွေ့မှုရှိခဲ့လို့ မနေ့ည (အောက်တိုဘာလ ၂ ရက်) ၁၂
နာရီလောက်က Home
Quarantine ထားထားတာပါ။ မန္တလေးက ပြန်လာတာပေါ့။ တောင်လေးလုံးဂိတ်မှာ
စစ်ဆေးတော့ မောင်းပြေးသွားလို့ တောင်လေးလုံးဂိတ်က လူတွေ လိုက်လာပြီး လာခေါ်တာပေါ့”
ဟု အဆိုပါ နေအိမ်အား စောင့်ကြည့်ရန် တာဝန်ပေး ခံရသူ ကန်အောက်ရပ်ကွက် လူမှုရေးအသင်းမှ
ဦးခင်မောင်ချစ်က ကမ္ဘောဇတိုင်းသို့ ပြောသည်။
.
ထို့အတူ ကန်အောက်ရပ်ကွက် အုပ်ချုပ်ရေးမှူး ဦးအေးကိုကလည်း “အေးသာယာက
စပယ်ယာနဲ့ ဆက်စပ်မှုရှိတယ်လို့ သိရပါတယ်။ အသေးစိတ်တော့ မသိရသေးပါဘူး” ဟု ပြောဆိုခဲ့သည်။
.
အဆိုပါ Home Quarantine ပြုလုပ်ထားသည့် နေအိမ်မှာ ကန်အောက်ရပ်ကွက်၊ နဂါးပွက်ကျောင်းလမ်းနှင့် စပယ် လမ်းထောင့်ရှိ ကုန်စည်ပို့ဆောင်ရေးဂိတ် နေအိမ်ဖြစ်ကြောင်း သိရသည်။
.
