ရှမ်းပြည်နယ်အတွင်း အသက် ၆၀ နှစ် အထက် မဲဆန္ဒရှင်ပြည်သူများ ကြိုတင်ဆန္ဒမဲ စတင်ပေး - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, October 29, 2020

ရှမ်းပြည်နယ်အတွင်း အသက် ၆၀ နှစ် အထက် မဲဆန္ဒရှင်ပြည်သူများ ကြိုတင်ဆန္ဒမဲ စတင်ပေး

ကမ္ဘောဇတိုင်း

.

လာမည့် နိုဝင်ဘာလ ၈ ရက်တွင် ကျင်းပမည့် ပါတီစုံဒီမိုကရေစီအထွေထွေရွေးကောက်ပွဲတွင် မဲပေးပိုင်ခွင့်ရှိသူ မဲဆန္ဒရှင်ပြည်သူများအနက် ရှမ်းပြည်နယ်အတွင်းရှိ အသက် ၆၀ နှစ်အထက် မဲဆန္ဒရှင်များ ယ‌နေ့ အောက်တိုဘာလ ၂၉ ရက်မှ စတင်၍ သက်ဆိုင်ရာ ရပ်ကွက်/ကျေးရွာအုပ်စု ကော်မရှင်အဖွဲ့ခွဲရုံးများတွင် ကြိုတင်ဆန္ဒမဲများ ပေးလျက် ရှိကြောင်း သိရသည်။

.

.

“အသက် ၆၀ နှစ်အထက်တွေ စတင်ပေးနေတာပါ။ အသက် ၆၀ အောက် နေမကောင်း/မကျန်းမာရင်တော့ သက်ဆိုင်ရာ ရပ်/ကျေးကော်မရှင်အဖွဲ့ခွဲရုံးမှာ ဆက်သွယ်ပြီးတော့ ကော်မရှင်အဖွဲ့ခွဲက သတ်မှတ်တဲ့ရက်မှာ လာပေးပေါ့။ ဒါမှမဟုတ် လုံးဝ မသွားနိုင် မလာနိုင်ရင်တော့ လာကောက်ပေးမှာပေါ့။ သူ့ရဲ့ မိသားစုဝင် တစ်ဦး ကတော့ ရပ်/ကျေးကော်မရှင်ရုံးမှာ ကြိုပြီး အကြောင်းကြားရမှာပေါ့” ဟု ရှမ်းပြည်နယ်ရွေးကောက်ပွဲ ကော်မရှင်အဖွဲ့ခွဲ ဥက္ကဋ္ဌ ဦးထင်ကျော်က ကမ္ဘောဇတိုင်းသို့ ပြောသည်။

.

ထို့အပြင် ကျန်းမာသန်စွမ်းပြီး သက်ဆိုင်ရာမဲဆန္ဒနယ်အတွင်း နေထိုင်သူဖြစ်သော်လည်း ရွေးကောက်ပွဲ ကျင်းပမည့် နိုဝင်ဘာလ ၈ ရက်တွင် အကြောင်းကြောင်းကြောင့် မအားလပ်သဖြင့် မဲရုံသို့ ကိုယ်တိုင် လာရောက်၍ မဲမပေးနိုင် သူများအနေဖြင့်လည်း ကြိုတင်ဆန္ဒမဲပေးခွင့် ရရှိရေးအတွက် သက်ဆိုင်ရာ ရပ်/ကျေးကော်မရှင်အဖွဲ့ခွဲများနှင့် ဆက်သွယ်ဆောင်ရွက်နိုင်ပြီး အမှန်တကယ် ကြိုတင်ဆန္ဒမဲပေးရန် လိုအပ်သူဖြစ်ကြောင်း အထောက်အထားများ လိုအပ်မည်ဖြစ်သည်ဟု ၎င်းက ဆက်လက်ပြောဆိုခဲ့သည်။

.

ရွေးကောက်ပွဲနေ့တွင် မဲဆန္ဒနယ်အတွင်း ရှိနေသော်လည်း အကြောင်းအမျိုးမျိုးကြောင့် မဲရုံသို့ လာရောက်ဆန္ဒမဲ မပေးနိုင်သော မဲဆန္ဒရှင်ပြည်သူများသည် နိုဝင်ဘာလ ၆ ရက်မှ ၇ ရက်အတွင်း လည်းကောင်း၊ ဆေးရုံတက်ရောက် နေသူများ၊ အချုပ်ခံနေရသူများနှင့် ရွေးကောက်ပွဲကျင်းပသည့်နေ့တွင် မိမိမဲဆန္ဒနယ်ကို ကျော်လွန်၍ နိုင်ငံတော် တာဝန်ဖြင့် ခရီးသွားလာနေသူများသည် အောက်တိုဘာလ ၂၉ ရက်မှ နိုဝင်ဘာလ ၇ ရက်အတွင်း လည်းကောင်း၊ COVID-19 ကပ်ရောဂါ ကာကွယ်ထိန်းချုပ်ရေးအတွက် Stay Home သတ်မှတ်ထားသည့် မြို့နယ်များနှင့် လူဦးရေ ထူထပ်သော မြို့နယ်များတွင် နေထိုင်သော အသက် ၆၀ နှစ်အထက် မဲဆန္ဒရှင်ပြည်သူများ၊ ကျန်မြို့နယ် များတွင် နေထိုင်သည့် အသက် ၆၀ နှစ်အထက် မဲဆန္ဒရှင်ပြည်သူများ၊ Quarantine ဝင်ရောက်နေသူ မဲဆန္ဒရှင် ပြည်သူများသည် အောက်တိုဘာလ ၂၅ ရက်မှ နိုဝင်ဘာလ ၇ ရက်အတွင်း လည်းကောင်း ကြိုတင်ဆန္ဒမဲ ပေးနိုင်ကြမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က ယမန်နေ့ အောက်တိုဘာလ ၂၄ ရက်တွင် ထုတ်ပြန်ကြေညာထားသည်။

.

၂၀၂၀ ပြည့်နှစ်၊ ပါတီစုံဒီမိုကရေစီအထွေထွေရွေးကောက်ပွဲကို လာမည့် နိုဝင်ဘာလ ၈ ရက်တွင် ကျင်းပ ပြုလုပ် သွားမည်ဖြစ်ပြီး ရှမ်းပြည်နယ်အတွင်း မြို့နယ် ၅၅ မြို့နယ် ရှိသည့်အနက် “ဝ” ကိုယ်ပိုင်အုပ်ချုပ်ခွင့်ရတိုင်းမှ ၄ မြို့နယ်၊ ကျိုင်းတုံခရိုင်မှ မိုင်းလားမြို့နယ်၊ လွိုင်လင်ခရိုင်မှ မိုင်းကိုင်မြို့နယ်နှင့် မြို့နယ်အချို့ရှိ ရပ်ကွက်/ကျေးရွာအုပ်စု ၁၃၈ ခုတို့မှ အပ ကျန်ဒေသများတွင် ရွေးကောက်ပွဲ ကျင်းပသွားမည်ဖြစ်ကြောင်း သိရသည်။

.

No comments:

Post a Comment

Journal Download

Photo of three cats

About