ရာနှုန်းပြည့် ဒီမိုကရေစီ မရမချင်း အမျိုးသားဒီမိုကရေစီအဖွဲ့ချုပ်ကို ရဲရဲတာဝန်ပေးပါ ဟု ရှမ်းပြည်နယ် NLD အောင်နိုင်ရေး ဥက္ကဋ္ဌ ပြောကြား

ကိုစိုး (ကမ္ဘောဇတိုင်း)

.

ရာနှုန်းပြည့် ရွေးကောက်ပွဲ မကျင်းပနိုင်မချင်း၊ ရာနှုန်းပြည့် ဒီမိုကရေစီ မရမချင်း အမျိုးသားဒီမိုကရေစီအဖွဲ့ချုပ်ကို ရဲရဲသာ တာဝန်ပေးပါဟု တောင်ကြီးမြို့နယ် မဲဆန္ဒနယ်အမှတ် (၁) မှ ရှမ်းပြည်နယ်လွှတ်တော် ကိုယ်စားလှယ် အဖြစ် ဝင်ရောက်ယှဉ်ပြိုင်မည့် အမျိုးသားဒီမိုကရေစီအဖွဲ့ချုပ်ပါတီ ရှမ်းပြည်နယ်အောင်နိုင်ရေးကော်မတီ ဥက္ကဋ္ဌ ဦးစိုးညွန့်လွင်က ပြောဆိုခဲ့သည်။

.

.

ဦးစိုးညွန့်လွင်က ယနေ့ အောက်တိုဘာလ၁၉ ရက်၊ နေ့လယ်ပိုင်းက သတင်းမီဒီယာများနှင့် တွေ့ဆုံစဉ် ယင်းကဲ့သို့ ပြောဆိုခဲ့ခြင်းဖြစ်သည်။

.

“ကျွန်တော့်အနေနဲ့ ပြည်သူလူထုကို မေတ္တာရပ်ခံချင်တာကတော့ လွတ်လပ်ပြီး တရားမျှတတဲ့ ရွေးကောက်ပွဲ မဖြစ်မချင်း၊ ရာနှုန်းပြည့် ရွေးကောက်ပွဲ မဖြစ်မချင်း၊ ရာနှုန်းပြည့် ဒီမိုကရေစီ မရမချင်း အမျိုးသားဒီမိုကရေစီ အဖွဲ့ချုပ်ကို ရဲရဲကြီး တာဝန်ပေးပါလို့ ပြောချင်ပါတယ်” ဟု ဦးစိုးညွန့်လွင်က ပြောဆိုခဲ့သည်။

.

ထို့အပြင် ရွေးကောက်ပွဲသည် နိုင်ငံအတွက် အရေးကြီးကြောင်း၊ COVID-19 ရောဂါ ကာကွယ်ရေးသည်လည်း အရေးကြီး ကြောင်း၊ စနစ်တစ်ခုကို ပြောင်းလဲနိုင်ရေးအတွက် အမျိုးသားဒီမိုကရေစီအဖွဲ့ချုပ်ပါတီ အောင်နိုင်ရေး သည်လည်း အရေးကြီးကြောင်း ၎င်းက ဆက်လက်ပြောဆိုခဲ့သည်။

.

NLD ပါတီသည် လာမည့် နိုဝင်ဘာလ ၈ ရက်တွင် ကျင်းပမည့် ၂၀၂၀ ပြည့်နှစ် ပါတီစုံဒီမိုကရေစီ အထွေထွေ ရွေးကောက်ပွဲတွင် ရှမ်းပြည်နယ်အတွင်း၌ ပြည်သူ့လွှတ်တော်တွင် မဲဆန္ဒနယ် ၄၆ နေရာ၊ အမျိုးသားလွှတ်တော်တွင် မဲဆန္ဒနယ် ၁၁ နေရာ၊ ရှမ်းပြည်နယ်လွှတ်တော်တွင် မဲဆန္ဒနယ် ၉၂ နေရာ၊ တိုင်းရင်းသားလူမျိုးမဲဆန္ဒနယ်တွင် ၇ နေရာ၊ စုစုပေါင်း ၁၅၆ နေရာတွင် ဝင်ရောက်ယှဉ်ပြိုင် အရွေးချယ်ခံသွားမည် ဖြစ်ကြောင်း သိရသည်။

.