မိုင်းကိုင်အား ရွေးကောက်ပွဲ ကျင်းပနိုင်ခြင်းမရှိသည့် မြို့နယ်အဖြစ် သတ်မှတ်ခြင်းကို အံ့ဩမိကြောင်း SNLD ကိုယ်စားလှယ်လောင်း ပြောကြား - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, October 17, 2020

မိုင်းကိုင်အား ရွေးကောက်ပွဲ ကျင်းပနိုင်ခြင်းမရှိသည့် မြို့နယ်အဖြစ် သတ်မှတ်ခြင်းကို အံ့ဩမိကြောင်း SNLD ကိုယ်စားလှယ်လောင်း ပြောကြား

ဆိုင်းနှောင်

.

လွိုင်လင်ခရိုင်အတွင်းရှိ မိုင်းကိုင်မြို့နယ်အား ရွေးကောက်ပွဲကျင်းပနိုင်ခြင်းမရှိသည့် မြို့နယ်အဖြစ် ပြည် ထောင်စု ရွေးကောက်ပွဲကော်မရှင်မှ ထုတ်ပြန်ကြေညာခြင်းကို အံ့ဩမိကြောင်း ရှမ်းတိုင်းရင်းသားများဒီမိုရေစီ အဖွဲ့ချုပ် (SNLD) ပါတီမှ အမျိုးသားလွှတ်တော် ရှမ်းပြည်နယ်မဲဆန္ဒနယ်အမှတ် (၇) တွင် ဝင်ရောက်ယှဉ်ပြိုင်မည့် စိုင်းဝင်းအေး (ခ) စိုင်းထွန်းအေး က ပြောဆိုခဲ့သည်။

.

.

ရှမ်းပြည်နယ်ရှိ ရွေးကောက်ပွဲ ကျင်းပခြင်း မပြုမည့် နယ်မြေများ မဲဆန္ဒနယ်မြေများကို ကြေညာချက်အမှတ် (၁၉၇/၂၀၂၀) ဖြင့် အောက်တိုဘာ ၁၆ ရက်တွင် ပြည်ထောင်စုရွေးကောက်ပွဲကော်မရှင်က ထုတ်ပြန် ကြေညာခဲ့ရာ ယင်း ကြေညာချက်တွင် “ဝ” ကိုယ်ပိုင်အုပ်ချုပ်ခွင့်ရတိုင်းမှ ပန်ဆန်း(ပန်ခမ်း)၊ နားဖန်၊ မိုင်းမော၊ ပန်ဝိုင်မြို့နယ်၊ ရှမ်းပြည်နယ်အရှေ့ပိုင်း၊ မိုင်းလားမြို့နယ်တို့အပြင် လွှတ်တော်ကိုယ်စားလှယ်လောင်း အမည်စာရင်း အတည်ပြု ထုတ်ပြန်ထားသည့် ရှမ်းပြည်နယ်တောင်ပိုင်းမှ မိုင်းကိုင်မြို့နယ်လည်း ပါဝင်လာခဲ့ခြင်း ဖြစ်သည်။

.

“ရွေးကောက်ပွဲ မလုပ်နိုင်ဘူးဆိုရင် အဓိက အကြောင်းပြချက် ရှိရမယ်။ ဒီဒေသမှာ နယ်မြေအေးချမ်းမှု ပျက်ယွင်း နေတာ ဘာမှမရှိဘူး။ လမ်းပန်းဆက်သွယ်ရေး အကုန်ကောင်းတယ်။ လူတွေလည်း အေးအေးချမ်းချမ်း သွားလာနေ ကြပြီး ရွေးကောက်ပွဲ မဖြစ်ဘူးဆိုတော့ အံ့ဩမိတာပေါ့” ဟု စိုင်းဝင်းအေး က ကမ္ဘောဇတိုင်းသို့ ပြောသည်။

.

မိုင်းကိုင်မြို့နယ်အတွင်း တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်ရေးထိုး ထားသည့် ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) တပ်ဖွဲ့များ လှုပ်ရှားလျက် ရှိပြီး ငြိမ်းချမ်းရေးကတိကဝတ်များကို လိုက်နာလျက်ရှိကြောင်းနှင့် ဒို့တာဝန်အရေးသုံးပါးကို ပျက်ပြားအောင် လုပ်ဆောင်မှုမျိုး မမြင်မိကြောင်း၊ ဒေသတွင်း လက်နက်ကိုင်တပ်များက မဲဆွယ်သည့် နိုင်ငံရေးပါတီများကို ခြိမ်းခြောက်သည်ဆိုသည်မှာလည်း မမှန်ကန်ကြောင်း ၎င်းက ဆက်လက်ပြောဆိုခဲ့သည်။

.

ထို့အတူ ယင်းပါတီမှပင် ရှမ်းပြည်နယ်လွှတ်တော် ဗမာတိုင်းရင်းသားလူမျိုးရေးရာကိုယ်စားလှယ် အဖြစ် ရွေးကောက်ပွဲ ဝင်ရောက်ယှဉ်ပြိုင်မည့် ဦးကိုကိုမျိုး ကလည်း “ခိုင်လုံတဲ့ အကြောင်းပြချက် တစ်စုံတစ်ရာကို ပွင့်လင်းမြင်သာမှုရှိ အောင်တော့ ချပြပေးစေချင်ပါတယ်။ သို့မှသာ မလိုလားအပ်တဲ့ သံသယတွေ ဖြစ်ပေါ်မှုကို ရှောင်ရှားစေနိုင်မှာ ဖြစ်ပါတယ်” ဟု ၎င်း၏အမြင်ကို ပြောဆိုခဲ့သည်။

.

မိုင်းကိုင်မြို့နယ်တွင် ရှမ်းတိုင်းရင်းသားများဒီမိုကစီ အဖွဲ့ချုပ်၊ ရှမ်းတိုင်းရင်းသားများ ဒီမိုကရက်တစ်ပါတီ၊ တအာင်း(ပလောင်)အမျိုးသားပါတီ၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ အမျိုးသားဒီမိုကရေစီအဖွဲ့ချုပ်၊ ညီညွတ်သောဒီမိုကရက်တစ်ပါတီတို့မှ ပြည်သူ့လွှတ်တော် ကိုယ်စားလှယ်လောင်း ၆ ဦး၊ ရှမ်းပြည်နယ်လွှတ်တော် ကိုယ်စားလှယ်လောင်း ၁၂ ဦး၊ စုစုပေါင်း လွှတ်တော် ကိုယ်စားလှယ်လောင်း ၁၈ ဦး ရွေးကောက်ပွဲ ဝင်ရောက် ယှဉ်ပြိုင်ရန် အမည်စာရင်း ပေးသွင်းထားကြောင်း သိရသည်။

.

ပြီးခဲ့သည့် ၂၀၁၅ ခုနှစ်၊ ပါတီစုံဒီမိုကရေစီအထွေထွေရွေးကောက်ပွဲကာလက အဆိုပါ မိုင်းကိုင်မြို့နယ်အတွင်းရှိ ပြည်သူ့လွှတ်တော်နှင့် ရှမ်းပြည်နယ်လွှတ်တော်မဲဆန္ဒနယ်နေရာအားလုံး၌ ရှမ်းတိုင်းရင်းသားများဒီမိုကရေစီအဖွဲ့ချုပ် ပါတီက အနိုင်ရရှိထားသည်။

.

No comments:

Post a Comment

Journal Download

Photo of three cats

About