ပါတီ ဝန်းရံသူများအား မေတ္တာရပ်ခံရုံသာ တတ်နိုင်ဟု ရှမ်း NLD အောင်နိုင်ရေးဥက္ကဋ္ဌ ပြောကြား

ဆိုင်းနှောင်

.

COVID-19 ကပ်ရောဂါ ကာကွယ်ထိန်းချုပ်ရေးအတွက် လူစုလူဝေး မပြုလုပ်ရန် သက်ဆိုင်ရာဌာနများမှ ညွှန်ကြားထား သော်လည်း နိုင်ငံရေးပါတီများမှ အင်အားပြ လှည့်လည်မှုများနှင့် ပတ်သက်၍ မေတ္တာရပ်ခံရုံသာ တတ်နိုင်ကြောင်း အမျိုးသားဒီမိုကရေစီအဖွဲ့ချုပ် ရှမ်းပြည်နယ် အောင်နိုင်ရေး ဥက္ကဋ္ဌ ဦးစိုးညွန့်လွင်က ပြောဆိုခဲ့သည်။

.

.

နိုင်ငံရေးပါတီများအနေဖြင့် COVID-19 ဆိုင်ရာ ညွှန်ကြားချက်များကို ဖောက်ဖျက်ပြီး လူစုလူဝေးဖြင့် အင်အားပြ မဲဆွယ် စည်းရုံးမှုများအပေါ် ဦးစိုးညွန့်လွင်က အောက်တိုဘာလ ၁၉ ရက်တွင် သတင်းမီဒီယာများနှင့် တွေ့ဆုံစဉ် ယင်းကဲ့သို့ ပြောဆိုခဲ့ခြင်းဖြစ်သည်။

.

“ကျွန်တော့် အနေနဲ့ ရွေးကောက်ပွဲ campainge ကာလမှာကတော့ ပါတီအသီးသီးက ဝန်းရံသူတွေက ဆိုင်ကယ်တွေ ကားတွေနဲ့ လူတွေ ထောင်ချီ ထွက်လာကြတာလည်း တွေ့တယ်။ သို့သော် ရှမ်းအစိုးရ အနေနဲ့ကတော့ မေတ္တာ ရပ်ခံရုံကလွဲပြီး ဘာမှမတတ်နိုင်ဘူး။ လက်ရှိ COVID-19 ကပ်ရောဂါက အရေးကြီးသလို ရွေးကောက်ပွဲကလည်း အရေးကြီးပါတယ်။ တစ်ဘက်ကလည်း ပြည်သူလူထုရဲ့ စားဝတ်နေရေးကလည်း အရေးကြီးပါတယ် အလားတူပါပဲ ကျနော်တို့ NLD ရဲ့ပါတီ အောင်နိုင်ရေးကလည်း အရမ်းအရေးကြီးပါတယ် ” ဟု ဦးစိုးညွှန့်လွင်က ပြောသည်။

.

အမျိုးသားဒီမိုကရေစီအဖွဲ့ချုပ်ပါတီသည် လာမည့် နိုဝင်ဘာလ ၈ ရက်တွင် ကျင်းပမည့် ၂၀၂၀ ပြည့်နှစ် ပါတီစုံဒီမိုကရေစီ အထွေထွေ ရွေးကောက်ပွဲတွင် ရှမ်းပြည်နယ်အတွင်း၌ ပြည်သူ့လွှတ်တော်တွင် မဲဆန္ဒနယ် ၄၆ နေရာ၊ အမျိုးသားလွှတ်တော်တွင် မဲဆန္ဒနယ် ၁၁ နေရာ၊ ရှမ်းပြည်နယ်လွှတ်တော်တွင် မဲဆန္ဒနယ် ၉၂ နေရာ၊ တိုင်းရင်းသားလူမျိုးမဲဆန္ဒနယ်တွင် ၇ နေရာ၊ စုစုပေါင်း ၁၅၆ နေရာတွင် ဝင်ရောက်ယှဉ်ပြိုင် အရွေးချယ်ခံသွားမည် ဖြစ်ကြောင်း သိရသည်။

.