တရုတ်နိုင်ငံ၊ ကြယ်ဂေါင်၊ ရွှေလီမြို့အတွင်း NLD မဲဆွယ်စည်းရုံးရေး အင်အားပြသည့် မြန်မာနိုင်ငံသား ၈၀၀ ခန့်ကို တရုတ်ရဲမှ ဖမ်းဆီး

မင်းဇော်မင်း

.

တရုတ်နိုင်ငံ၊ ကြယ်ဂေါင်နှင့် ရွှေလီမြို့များတွင် အမျိုးသားဒီမိုကရေစီအဖွဲ့ချုပ် (NLD) ပါတီ မဲဆွယ်စည်းရုံးရေး အင်အားပြသည့် မြန်မာနိုင်ငံသား ၈၀၀ ခန့်ကို ယနေ့ အောက်တိုဘာလ ၈ ရက်၊ နံနက်ပိုင်းက တရုတ်နိုင်ငံရဲတပ်ဖွဲ့မှ ဖမ်းဆီးထားသည်ဟု သိရသည်။

.

.

“အခုချိန်တော့ ရှုပ်နေတယ်။ အသိရဲတွေလည်း သေချာ မပြောနိုင်သေးဘူး။ လူကတော့ ကားတစ်စီးကို ၅၀ ကျော်နဲ့ ၁၅ စီးလောက်ရှိမယ်။ ကြယ်ဂေါင်ဘောလုံးကွင်းမှာ ဒီမနက် ၁၀ နာရီက လူစုပြီး ရွှေလီကိုရောက်တော့ ပန်းခြံမှာ တရုတ်ရဲ တွေ ဝိုင်းဖမ်းလိုက်တာပါ” ဟု ရွှေလီမြို့ အခြေစိုက် မိုးမခလူမှုကူညီရေးအသင်း ဥက္ကဋ္ဌ ဒေါ်အေးလီက ကမ္ဘောဇတိုင်းသို့ ပြောသည်။

.

မိုးမခဖောင်ဒေးရှင်းနာယက ဒေါ်မိုးမခကမူ ၎င်း၏ လူမှုကွန်ရက်စာမျက်နှာတွင် ကားတစ်စီးလျှင် လူ ၇၀/၈၀ နှုန်းဖြင့် ကား ၁၂ စီးဖြင့် ဖမ်းဆီးခေါ်ဆောင်သွားကြောင်း ရုပ်သံဖိုင်များဖြင့် တင်ပြထားပြီး တရုတ်နိုင်ငံအစိုးရက COVID-19 ရောဂါကာကွယ်ရေးအတွက် လူစုလူဝေးမပြုလုပ်ရန် တားမြစ်ချက်ဖြင့် ဖမ်းဆီးခဲ့ခြင်းဖြစ်ကြောင်း ဒေါ်မိုးမခက ထံက သိရသည်။

.

“ဘာမှ တိုင်ပင်ညှိနှိုင်း၊ စုံစမ်းလုပ်ဆောင်တာ မရှိဘဲ ထလုပ်ကြတာ။ အခုတော့ တတ်နိုင်သမျှ ကူညီလုပ်ဆောင်ပေး နေပါတယ်” ဟု ဒေါ်မိုးမခက ပြောသည်။

.

အဆိုပါကိစ္စနှင့် ပတ်သက်၍ မူဆယ်ခရိုင်အထွေထွေအုပ်ချုပ်ရေးဦးစီးဌာနမှ လက်ထောက်ညွှန်ကြားရေးမှူး ဦးမောင်မောင်သန်းက “အခုချိန်အထိတော့ တရားဝင်စာနဲ့ အကြောင်းကြားလာတာ မရှိသေးဘူး။ WeChat ကတော့ ပြောလာတယ်။ ဟိုဘက်မှာ စာအုပ်နဲ့ တရားဝင်နေတဲ့သူတွေ အောင်နိုင်ရေးဆိုပြီး ကြယ်ဂေါင်-ရွှေလီ အသွားအပြန် လှည့်လည်တယ်လို့ ပြောတယ်။ ထောင်တွေကို မျှပို့မယ်လို့ ကြားရတယ်။ ရောဂါကလမှာ သူတို့ဘက်က အရမ်း တင်းကြပ်ထားတယ်။ အခုလိုဖြစ်တော့ ဖမ်းတာပေါ့။ ဒီဘက်ကတော့ သူတို့ပြန်လွှဲပေးလာမှပဲ လက်ခံရတော့မယ်။ သူတို့လည်း အခုနောက်ပိုင်း သိပ်ကြာကြာမထားဘူး။ ဒါပေမဲ့ နေတဲ့သူတွေတော့ သူတို့နေထိုင်ခွင့် ဆုံးရှုံးကုန်ကြမှာပေါ့” ဟု ပြောသည်။

.

NLD ဝန်းရံသူများအနေဖြင့် အနီရောင်ပါတီအင်္ကျီ၊ အလံများကို တပ်ဆင်ကာ လှည့်လည်ခဲ့ကြခြင်းဖြစ်ပြီး ရွှေလီမြို့ လယ်ပန်းခြံအတွင်း တရုတ်နိုင်ငံရဲတပ်ဖွဲ့မှ ဖမ်းဆီးခဲ့ပြီးနောက် ကားများဖြင့်တင်ဆောင်ကာ ရွှေလီမြို့ရှိ၊ စီကိုင်ထောင်သို့ ခေါ်ဆောင်သွားသည်ဟု သိရသည်။

.