Mask မတပ်ဆင်သူများအား ပညာပေး အရေးယူမှုများ ပြုလုပ်နေသော်လည်း ပြည်သူ ပူးပေါင်းပါဝင်မှသာ အဆင်ပြေမည်ဖြစ် ဟုဆို - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။

Mask မတပ်ဆင်သူများအား ပညာပေး အရေးယူမှုများ ပြုလုပ်နေသော်လည်း ပြည်သူ ပူးပေါင်းပါဝင်မှသာ အဆင်ပြေမည်ဖြစ် ဟုဆို

ဆိုင်းနှောင်

 

မြို့တော်တောင်ကြီးတွင် နှာခေါင်းစည်း (Mask) မတပ်ဆင်သူများအား ဒဏ်ရိုက် အရေးယူမှုများ ပြုလုပ်နေ သော်လည်း လိုက်နာမှု အားနည်းနေဆဲဖြစ်၍ ပြည်သူလူထု ပူးပေါင်းပါဝင်မှသာ အဆင်ပြေမည်ဖြစ်ကြောင်း တောင်ကြီးမြို့နေ စေတနာ့ဝန်ထမ်း ဦးဝင်းနိုင်စိုးက ပြောကြားခဲ့သည်။

.



.

“ကျွန်တော်တို့ကတော့ ပညာပေးတာ အရေးယူတာတွေ ဆက်လုပ်နေတာပဲ။ ပြည်သူလူထုက ပူးပေါင်း ပါဝင်မှု မရှိရင် ဘာမှမထူးဘူးပေါ့။ ဒဏ်ကြေး ၂၀၀ ကလည်း နိုင်ငံတော်က သတ်မှတ်ထားတာဆိုတော့ ဒီထက်တိုးကောက်လို့က မရဘူး။ နောက်ပြီးတော့ ကျွန်တော်တို့က ငွေလိုချင်လို့ ဒဏ်ရိုက်နေတာ မဟုတ်ဘူး။ ပြည်သူတွေကို အသိတရားလေးဝင်ပြီး Mask တပ်စေချင်လို့ပါ” ဟု ဦးဝင်းနိုင်စိုးက ကမ္ဘောဇတိုင်းသို့ ပြောသည်။

.

ထို့အပြင် COVID-19 ရောဂါ ကာကွယ်ထိန်းချုပ်ကုသရေးကော်မတီနှင့် စေတနာ့ဝန်ထမ်းများ ပူးပေါင်း၍ Mask ပညာပေးခြင်း၊ အရေးယူခြင်းများအပြင် စွန့်ပစ်ထားသည့် Mask များကို စနစ်တကျ လိုက်လံကောက်ပေး လျက်ရှိကြောင်း ၎င်းက ဆက်လက်ပြောဆိုခဲ့သည်။

.

တောင်ကြီးမြို့နယ် COVID-19 ရောဂါ ကာကွယ်၊ ထိန်းချုပ်၊ ကုသရေးနှင့် အရေးပေါ်တုံ့ပြန်ရေးကော်မတီ၊ မြို့နယ် အထွေထွေအုပ်ချုပ်ရေးဦးစီးဌာနနှင့် တာဝန်ရှိသူများ ဦးဆောင်ကာ ပြီးခဲ့သည့် အောက်တိုဘာလ ၇ ရက်မှ စတင်၍ တောင်ကြီးမြို့ပေါ်တွင် Mask မတပ်ဆင်သူများကို ငွေကျပ် ၂၀၀ စီ ဒဏ်ရိုက်အရေးယူမှုများ ပြုလုပ်ခဲ့ရာ ယမန်နေ့ အောက်တိုဘာလ ၂၃ ရက်၊ ညနေပိုင်းအထိ စည်းကမ်းမလိုက်နာသူ ၂၀၀၀ ခန့်အား အရေးယူနိုင်ခဲ့ပြီး ဒဏ်ကြေးငွေကျပ် ၄၀၀၀၀၀  ကျော်ခန့်ကောက်ခံရရှိပြီဟု သိရသည်။

.

ကျန်းမာရေးနှင့် အားကစားဝန်ကြီးဌာန၏ လမ်းညွှန်ချက်များနှင့်အညီ စနစ်တကျ Mask တပ်ဆင်၍ သွားလာသူ အနည်းငယ်ခန့် ရှိနေသော်လည်း အများစုမှာ Mask တပ်ဆင်ခြင်းမရှိသည့်အပြင် Mask တပ်ဆင်ရာတွင် စနစ်တကျ မသုံးစွဲခြင်း၊ စနစ်တကျ မစွန့်ပစ်ခြင်း၊ စည်းကမ်းလိုက်နာမှု အားနည်းခြင်း များကို တွေ့နေရကြောင်း ဒေသခံများထံက သိရသည်။

.

Mask တပ်ရမယ်ဆိုတာတော့ COVID-19 စကတည်းက ကြေညာပေးနေတာပဲလေ။ ဒီထက်ပိုပြီး အရေးယူစေချင်ပေမဲ့လည်း ဒီအပိုင်းကျတော့ ကျန်းမာရေးဌာနက တာဝန်ယူနိုင်တဲ့ အပိုင်း မဟုတ်ဘူးပေါ့။ အုပ်ချုပ်ရေးမှူးတွေနဲ့ စည်ပင်ကိုတော့ ဒီထက်ပိုပြီး တင်းကျပ်စေချင်ပါတယ်” ဟု ရှမ်းပြည်နယ် ပြည်သူ့ကျန်းမာရေးဌာနမှ ပြည်နယ်ဦးစီးမှူး ဒေါက်တာ သူဇာချစ်တင်ကလည်း ပြောဆိုခဲ့သည်။

.

တောင်ကြီးမြို့နယ်အုပ်ချုပ်ရေးမှူး ဦးဖြိုးမင်းထိုက်ကမူ မြို့နယ်အတွင်း Mask အသိပညာပေးမှုများ ဆောင်ရွက်ခဲ့ရာ လူထု ၉၅ ရာခိုင်နှုန်းခန့် လိုက်ပါဆောင်ရွက်လာပြီဖြစ်ကြောင်း ကမ္ဘောဇတိုင်းသို့ ပြောဆိုထားသည်။

.

ယမန်နေ့ အောက်တိုဘာလ ၂၃ ရက်၊ ညပိုင်းအထိ မြန်မာနိုင်ငံတွင် COVID-19 ရောဂါ အတည်ပြုလူနာ ၄၂၃၆၅ ဦး ရှိလာပြီဖြစ်ပြီး ယင်းတို့အနက် ၁၀၃၈ ဦး သေဆုံး၍ ၂၂၄၅၄ ဦးမှာ ပြန်လည် သက်သာ၍ ဆေးရုံမှဆင်းခွင့် ရရှိပြီ ဖြစ်ကြောင်း သိရသည်။

.

Journal Download

Photo of three cats