ကျောက်မဲမြို့နယ်အတွင်း တပ်မတော်နှင့် RCSS တို့ တိုက်ပွဲဖြစ်ပွားပြီး တစ်ဦးဒဏ်ရာရ၊ တိုက်ပွဲရှောင် ၇၀၀ ကျော် တိမ်းရှောင်နေ

မင်းဇော်မင်း

.

ကျောက်မဲမြို့နယ်အတွင်း တပ်မတော်နှင့် ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) တို့ တိုက်ပွဲဖြစ်ပွားမှုကြောင့် အမျိုးသားတစ်ဦး ထိခိုက်ဒဏ်ရာရရှိခဲ့ပြီး ဒေသခံ ၇၀၀ ကျော် တောင်ထိပ် ကျေးရွာဘုန်းတ်ောကြီးကျောင်းတွင် ရောက်ရှိခိုလှုံနေကြောင်း သိရသည်။

.

.

အောက်တိုဘာလ ၃ ရက်၊ မွန်းလွဲပိုင်းက စတင်ဖြစ်ပွားခဲ့သည့် တိုက်ပွဲများကြောင့် တောင်ထိပ်ကျေးရွာ ဘုန်းတော်ကြီး ကျောင်းသို့ အောက်တိုဘာလ ၄ ရက်တွင် တိုက်ပွဲရှောင် ၄၀၀ ကျော် ရောက်ရှိလာသော်လည်း အောက်တိုဘာ ၅ ရက် တွင် ၇၀၀ ကျော်ရောက်ရှိနေပြီဖြစ်ကြောင်း ယင်းကျေးရွာသို့ ထောက်ပံ့ရေးပစ္စည်းများ သွားရောက်ကူညီလှူဒါန်းသည့် နောင်ပိန်အခြေစိုက်ကမ်းလှမ်းလက်များ လူမှုကူညီရေးအသင်းမှ ဦးနေအောင်က ထံက သိရသည်။

.

“မနေ့က တိုက်ပွဲသံကြားရင် ရပ်လိုက်၊ မကြားရင် ရှေ့တိုးလိုက်နဲ့ မွန်းလွဲ ၂ နာရီလောက်ရောက်သွားပြီး သူတို့ အခက်အခဲဖြစ်နေတဲ့ စားစရာတွေနဲ့ထောက်ပံ့ရေးပစ္စည်းတွေ ကား ၄ စီးနဲ့ သွားပို့တာပါ။ တိုက်ပွဲအခြေအနေ ပေါ်မူတည်ပြီး ၁၅ မိနစ်လောက်ပဲ နေခဲ့နိုင်လို့ လူစာရင်းအတိအကျတော့ မရခဲ့ဘူး။ တိုက်ပွဲမှာ ဒေသခံတစ်ယောက် တော့ ဒဏ်ရာရတာသူတို့ကျောက်မဲဆေးရုံကို ပို့တယ်ပြောတယ်။ ထပ်ပြီးလိုအပ်တာတွေ ကူညီဖို့လုပ်ဆောင်နေ ပါတယ်” ဟု ဦးနေအောင်က ပြောသည်။

.

ယင်း တိုက်ပွဲရှောင်များတွင် ကလေးသူငယ် ၂၀၀ ကျော်ပါဝင်ပြီး လူဦးရေများပြားခြင်းကြောင့် အိမ်သာမလုံလောက် မှုကို ဆောက်လုပ်ပေးရန်ရှိနေပြီး အခြားလိုအပ်သည့် အကူအညီများအတွက် ဆက်သွယ်ဆောင်ရွက်လျက်ရှိသည်ဟု ၎င်းက ဆက်လက်ပြောဆိုခဲ့သည်။

.

“မနေ့က သူတို့အတွက် ကျောက်မဲခရိုင်တိုက်ပွဲရှောင်ရန်ပုံငွေနဲ့ ဆန်အိတ် ၃၀ ကို နမ့်ခုံးရှမ်းများပရဟိတအသင်းက တစ်ဆင့် ပေးပို့လှူဒါန်းလိုက်ပါတယ်။ ဆေးရုံက လူနာကိုလည်း သွားရောက်ကြည့်ရှုပြီး အားပေးကူညီမှုတွေ လုပ်ပေးနေပါတယ်”ဟု ကျောက်မဲမြို့နယ် ဇီဝိတဒါနလူမှုကူညီရေးအသင်းဥက္ကဌ ဦးတင်မောင်သိန်းက ပြောသည်။

.

ယင်းတိုက်ပွဲများကြောင့် ဒဏ်ရာရရှိခဲ့သူမှာ ခန့်ခိုင်း(ပေါက်အင်း)ရွာမှ အသက် ၄၆ နှစ်အရွယ် တောင်သူ ဦးမောင်ဟိန်း ဆိုသူဖြစ်ပြီး တိုက်ပွဲကြောင့် ယာခြေထောက်၊ ယာခြေကျင်းဝတ်၊ ဝမ်းဗိုက်၊ ကျောဘက် နှင့် ဦးခေါင်း၊ ယာလက်တို့တွင် ဒဏ်ရာများရရှိကာ ကျောက်မဲဆေးရုံကြီးတွင် ဆေးကုသနေကြောင်း သိရသည်။

.

ဒဏ်ရာရ လူနာအတွက် ကျောက်မဲခရိုင်စစ်ရှောင်ကော်မတီမှ ကျပ် ၅၀၀၀၀၊ ဘေး/စီမံ ဌာနမှ ကျပ် ၅၀၀၀၀၊ လာရောက်သတင်းမေးသူ တပ်မတော်အရာရှိတစ်ဦးမှ ကျပ်ငွေ ၁၀၀၀၀ နှင့် ကျောက်မဲမြို့နယ်အုပ်ချုုပ်ရေးမှူး ဦးနိုင်ဝင်းမှ ကြက်ဥနှင့်ခေါက်ဆွဲဖာများကို လူနာ၏ အစ်မဖြစ်သူ ပါစိန်ထံသို့ ပေးအပ်လှူဒါန်းခဲ့ကြောင်း သိရသည်။

.

မြေပြင်သတင်းများအရ တပ်မတော်နှင့် RCSS တို့ ကျောက်မဲမြို့နယ် တောင်ဘက် မိုင်၃၀ ကျော်အကွာ ခိုင်ခန့် ကျေးရွာအနီးတွင် အောက်တိုဘာ ၃ ရက်၊ မွန်းလွဲပိုင်းမှစတင်ကာ တိုက်ပွဲများ ဖြစ်ပွားနေသဖြင့် ခိုင်ခန့်၊ ပေါက်အင်း ကျေးရွာရှိ ဒေသခံများက ကြောက်ရွံ့တိုက်ပွဲရှောင်ကြခြင်းဖြစ်ကြောင်း သိရသည်။

.