ရှမ်းပြည်နယ်မှ အထွက်ကားများတွင် လိုက်ပါလာသူများကို တစ်ဦးလျှင် ၂၀၀၀၀ ကျပ်နှုန်းဖြင့် COVID-19 စစ်ဆေးပေး

မင်းဇော်မင်း

.

ရှမ်းပြည်နယ်တောင်ပိုင်းဒေသမှ မြန်မာနိုင်ငံ ဒေသအသီးသီးသို့ ထွက်ခွာမည့် ကားများပေါ်တွင် လိုက်ပါလာသူများအား တစ်ဦးလျှင် ၂၀၀၀၀ ကျပ်နှုန်းဖြင့် ယနေ့ အောက်တိုဘာလ ၆ ရက်၊ မွန်းလွဲပိုင်းမှ စတင်၍ COVID-19 ရောဂါပိုး ရှိ/မရှိ စစ်ဆေးပေးလျက်ရှိကြောင်း သိရသည်။

.

.

“ကျန်းမာရေးဝန်ကြီးဌာနရဲ့ လမ်းညွှန်ချက်အရ အခုလို သတ်မှတ်လုပ်ဆောင်တာပါ။ ထုတ်ထားတဲ့ Test Kit က တစ်ထောင်ကျော်ပဲ သုံးရသေးတယ်။ ၂၀၀၀၀ ကျပ်နှုန်းနဲ့ စစ်ခယူတာ ဒီနေ့ စပါပြီ။ အဝင်ကားတွေကတော့ Negative ထောက်ခံချက် မပါရင် ပေးမဝင်ဘူး” ဟု ကလောမြို့နယ်အုပ်ချုပ်ရေးမှူး ဦးခင်မင်းက ကမ္ဘောဇတိုင်းသို့ ပြောသည်။

.

ရှမ်းပြည်နယ်အတွင်းသို့ ဝင်ရောက်လာသူများအနက် အောင်ပန်းမြို့၊ ဟိုက်ဒရိုကွင်းတွင် ကုန်ချ၍ ပြန်ထွက်မည့် ကုန်တင်ယာဉ်များမှ ယာဉ်မောင်းနှင့် ယာဉ်နောက်လိုက်များမှာ Quarantine ဝင်ရောက်ရန် မလိုအပ်ဘဲ မိမိ နေအိမ်သို့ ပြန်ခြင်း အပါအဝင် ပြည်နယ် အတွင်း အခြားနေရာများသို့ သွားရောက်မည်ဆိုပါက Quarantine ဝင်ရောက်ရန် လိုအပ်ကြောင်း ၎င်းက ဆက်လက် ပြောဆိုခဲ့သည်။

.

ကျန်းမာရေးနှင့် အားကစားဝန်ကြီးဌာနမှ ရှမ်းပြည်နယ်တောင်ပိုင်းဒေသအတွက် ကိုရီးယားနိုင်ငံထုတ် Rapid Test Kit အခုရေ ၃၀၀၀ ချထားပေးရာ ယနေ့အထိ ၁၂၈၂ ခု သုံးစွဲခဲ့ပြီး ၁၇၁၈ ခု ကျန်ရှိကာ နောက်ရက်များတွင် ဆက်လက် စစ်ဆေးနိုင်ရေးအတွက် Rapid Test Kit များ ထပ်မံရရှိဖွယ်ရှိနေကြောင်း ၎င်းထံက သိရသည်။

.

ရှမ်းပြည်နယ်တောင်ပိုင်းဒေသအတွင်း COVID-19 စစ်ဆေးရေးဂိတ်အဖြစ် ကလောမြို့နယ်၊ ရေယားကျေးရွာတွင် အောက်တိုဘာလ ၂ ရက်က စတင်ဖွင့်လှစ်ခဲ့ပြီးနောက် အောက်တိုဘာလ ၅ ရက်တွင် ရှမ်းပြည်နယ်နှင့် မန္တလေးတိုင်း ဒေသကြီးနယ်စပ်၊ နန့်ပန်တက်ကျေးရွာသို့ ပြောင်းရွှေ့စစ်ဆေးပေးနေခြင်းဖြစ်ကြောင်း သိရသည်။

.

ထိုသို့ စစ်ဆေးပေးရာတွင် အောက်တိုဘာလ ၂ ရက်က ရှမ်းပြည်နယ်မှ အထွက်ကားများကို သွားခွင့်မပြုခဲ့ဘဲ အဝင်ကားများတွင် လိုက်ပါလာသူများကို Rapid Test Kit များဖြင့် အခမဲ့ စစ်ဆေး၍ Negative ဖြစ်သူများကို ပြည်နယ်အတွင်း ဝင်ရောက်ခွင့် ပြုခဲ့ပြီး အောက်တိုဘာလ ၅ ရက်တွင် အတက်ကားများကို ဝင်ရောက်ခွင့်မပြုတော့ဘဲ အဆင်း ကားများဖြင့် လိုက်ပါလာသူများကိုသာ အခမဲ့ စစ်ဆေးပေးခဲ့ရာမှ ယခုအခါ ငွေကျပ် ၂၀၀၀၀ သတ်မှတ်၍ Rapid Test Kit ဖြင့် စစ်ဆေးပြီး ထောက်ခံချက် ထုတ်ပေးနေခြင်းဖြစ်ကြောင်း သိရသည်။

.