သိန္နီမြို့နယ်တွင် လက်နက်ခဲယမ်းများ ဖမ်းမိ

ချစ်လှ

.

လားရှိုးခရိုင်၊ သိန္နီမြို့နယ်၊ အိုရီယမ်တယ် တိုးလ်ဂိတ်အနီးတွင် အောက်တိုဘာလ ၁၄ ရက်၊ ညပိုင်းက လက်နက်ခဲယမ်းများ ဖမ်းဆီးရမိခဲ့ကြောင်း သိရသည်။

.

.

အမှတ် (၄) မူးယစ်တပ်ဖွဲ့စု (လားရှိုး)မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် အောက်တိုဘာလ ၁၄ ရက်၊ ည ၇ နာရီအချိန်ခန့်က သိန္နီမြို့မှ ကွတ်ခိုင်မြို့အထွက် အိုရီယမ်တယ် တိုးလ်ဂိတ်အနီးတွင် မူးယစ်ဆေးဝါးတားဆီးနှိမ်နင်းရေး လုပ်ငန်းများ ဆောင်ရွက်နေစဉ် စစ်ဆေးရာနေရာနှင့် မြောက်ဘက် ၂ မိုင်ခန့်အကွာရှိ ဗြုန်းတောင်အနီးတွင် မသင်္ကာဖွယ်ရာ ယာဉ်တစ်စီး ရပ်တန့်နေကြောင်း သတင်းအရ သွားရောက်စစ်ဆေးရာ ကွတ်ခိုင်မြို့ဘက်မှ သိန္နီမြို့ ဘက်သို့ ကားခေါင်းလှည့်၍ရပ်တန့်ထား‌သော CROWN အမျိုးအစား ခဲ‌ရောင်ယာဉ်အား တွေ့ရှိရပြီးစစ်ဆေးရာ ကွတ်ခိုင်မြို့နယ်နေ ယာဉ်မောင်း လီစီချီအား ယာဉ်ပေါ်တွင် အသင့်တွေ့ရှိခဲ့ရကြောင်း သိရသည်။

.

ထို့နောက် ယာဉ်အား ဆက်လက်စစ်‌ဆေးခဲ့ရာ ယာဉ်၏နောက်ခန်းအံဝှက် အတွင်း သယ်ဆောင်လာသည့် P320 ဆူဂါအမျိုးအစား 9mm ကျည်ကတ်ပါသေနတ် ၁ လက်၊ .25CZ-92 အမျိုးအစား ကျည်ကတ်ပါ မိန်းမကိုင်သေနတ် ၁ လက်၊ အမေရိကန်နိုင်ငံထုတ် GLOCK Gem-4 9mm ကျည်ကဒ်ပါ သေနတ် ၁ လက်၊ သြစတြေးလျနိုင်ငံထုတ် GLOCK  9mm ကျည်ကတ်ပါ သေနတ် ၁ လက်၊ တရုတ်နိုင်ငံထုတ် Type-81(ပါရီ)ခေါင်ဒင်သေနတ် ၁ လက်၊ တရုတ်နိုင်ငံထုတ် Type-81(ပါရီ) သေနတ် ၁ လက်၊ Type-56 M22 ၁ လက်၊ M22 ကျည်ဘောက်(ကော်) ၁၂ ခု၊ M22 ကျည်ဘောက် (သံ) ၃ ခု၊ M22 ကျည် ၁၂၉၀ တောင့်၊ 7.62 စက်လက်ကျည် ၉၀၀ တောင့်၊ .22ကျည် ၂၀၀ တောင့်၊ 9mm Luger ကျည် ၁၀၀ တောင့် တို့အားသိမ်းဆည်းရမိ ခဲ့ခြင်းဖြစ်ကြောင်း သိရသည်။

.

အဆိုပါ လက်နက်ခဲယမ်းများ ဖမ်းဆီးရမိမှုနှင့် ပတ်သက်၍ သယ်ဆောင်လာသူ လီစီချီ အား သိန္နီမြို့မရဲစခန်းတွင် (ပ)၈၅/၂၀၂၀ ရှမ်းလက်နက်၁၂(ခ)ဖြင့် အမှုဖွင့်အရေးယူ ဆောင်ရွက်လျက်ရှိကြောင်း သိရသည်။

.