မိုင်းပန်မြို့နယ်တွင် CERP အစီအစဉ်အရ သက်ကြီးရွယ်အိုများအား အိမ်တိုင်ရာရောက် ထောက်ပံ့ငွေများ ပေးအပ်

စိုင်းသိင်္ခသူ

.

လင်းခေးခရိုင်၊ မိုင်းပန်မြို့နယ်တွင် COVID-19 ရောဂါကာလက စီးပွားရေးကုစားမှုအစီအစဉ် CERP အရ အသက် ၈၀ နှစ် ပြည့်ပြီး သက်ကြီးရွယ်အိုများအား ယနေ့ အောက်တိုဘာလ ၇ ရက်က အိမ်တိုင်ရာရောက် ထောက်ပံ့ငွေများ သွားရောက်ပေးအပ် လှူဒါန်းခဲ့သည်ဟု သိရသည်။

.

.

ထိုသို့ ထောက်ပံ့ရာတွင် အသက် ၈၀ မှ ၈၅ နှစ်ကြား သက်ကြီးရွယ်အို များအား တစ်ဦးလျှင် ထောက်ပံ့ငွေကျပ် ၃၀၀၀၀ စီကို မြို့နယ်အုပ်ချုပ်ရေးမှူး ဦးစိုးမင်းထက် ဦးဆောင်၍ ရပ်ကွက်/ကျေးရွာအုပ်စု စာရေးဝန်ထမ်းများ၊ မြို့နယ် လူမှုဝန်ထမ်းရုံးမှာ တာဝန်ရှိသူများက အဘိုးအဘွားများအား လက်ဝယ်အရောက် သွားရောက်ထောက်ပံ့ ခဲ့ခြင်း ဖြစ်ကြောင်း သိရသည်။

.

“အရင်က အဖိုးအဖွားတွေ အသက် ၈၅ နှစ်ပြည့်မှ ထောက်ပံ့ကြေး ရတာပါ။ အခု အသက် ၈၀ ပြည့်ကို CERP အစီအစဉ် အရ ပထမဆုံးပေးတာပါ” ဟု မိုင်းပန်မြို့နယ် အုပ်ချုပ်ရေးမှူး ဦးစိုးမင်းထက်က ကမ္ဘောဇတိုင်းသို့ ပြောသည်။

.

ယနေ့ ထောက်ပံ့မှုတွင် မိုင်းပန်မြို့နယ်အတွင်းရှိ မြို့ပေါ်ရပ်ကွက် ၄ ခုနှင့် ကျေးရွာအုပ်စုများမှ အဖိုး ၄၁ ဦး၊ အဖွား ၅၁ ဦး၊ စုစုပေါင်း ၉၂ ဦး တို့ကို တစ်ဦးလျှင် ငွေကျပ် ၃၀၀၀၀ နှုန်းဖြင့် စုစုပေါင်း ငွေကျပ် ၂၇၆၀၀၀၀ အား ထောက်ပံ့ပေးအပ်နိုင်ခဲ့ကြောင်း သိရသည်။

.