ကျောက်မဲမြို့တွင် COVID-19 ပိုးတွေ့လူနာ တစ်ဦး ထပ်တွေ့သောကြောင့် စုစုပေါင်း လူနာ ၆ ဦး ရှိပြီ ဖြစ်

မိုင်းထွန်း

.

ကျောက်မဲမြို့ရှိ Quarantine Center တွင် အသွားအလာ ကန့်သတ် စောင့်ကြည့်ထားသည့် အသက် ၂၅ နှစ်အရွယ် ယာဉ်မောင်းတစ်ဦးထံတွင် အောက်တိုဘာလ ၂၆ ရက်က COVID-19 ပိုး တွေ့ရှိခဲ့သဖြင့် ကျောက်မဲမြို့နယ်၌ COVID-19 ပိုးတွေ့လူနာ စုစုပေါင်း ၆ ဦး ရှိပြီ ဖြစ်ကြောင်း သိရသည်။

.

အဆိုပါ ပိုးတွေ့ လူနာသည် ကျောက်မဲမြို့နယ်၊ နမ့်ဟူးတောင်းကျေးရွာအုပ်စု၊ ပန်းပေါင်း‌ကျေးရွာတွင် နေထိုင်သူ ဖြစ်ပြီး ပိုးတွေ့လူနာနှင့် ‌ထိတွေ့ခဲ့ဖူးသူ ဖြစ်ကာ အောက်တိုဘာလ ၉ ရက်တွင် မူဆယ် ၁၀၅ မိုင်၌ RDT Antigen Test ဖြင့်  စစ်ဆေးစဉ် ပိုးမတွေ့ (Negative) အဖြေ ရရှိသောကြောင့် ကုန်စည် သယ်ယူပို့ဆောင်ရေး လုပ်ငန်း ဆောင်ရွက်ပြီး ကျောက်မဲမြို့နယ်၊ ပန်းပေါင်းကျေးရွာရှိ ၎င်း၏နေအိမ်သို့ ပြန်လည် ရောက်ရှိ၍ ၃ ရက်ခန့် ‌နေထိုင်ခဲ့ပြီးနောက် ၂၃ ရက်မှ စတင်ကာ ကျောက်မဲမြို့ ၊ အလက(၃) ရှိ Quarantine Center တွင် ဝင်ရောက်နေထိုင်သူ ဖြစ်ကြောင်း သိရသည်။

.

၎င်း၏ ဓါတ်ခွဲနမူနာများကို ရယူ၍ အောက်တိုဘာ ၂၆ ရက်က စစ်ဆေးစဉ် COVID-19 ပိုး တွေ့ရှိခဲ့ခြင်း ဖြစ်ပြီး လူနာ၏ နေအိမ်ကို ကန့်သတ်နယ်မြေအဖြစ် သတ်မှတ်ထားကာ ၎င်းနှင့်ထိ‌တွေ့ ခဲ့သူ ၁၀ ဦးအား ကျောက်မဲမြို့ ၊ အလက(၃) ရှိ Quarantine Center တွင် အသွားအလာ ကန့်သတ် စောင့်ကြည့်ထားကြောင်း သိရသည်။

.

ကျောက်မဲမြို့နယ်တွင် COVID-19 ပိုးတွေ့ အတည်ပြုလူနာ စုစုပေါင်း ၆ ဦး ရှိပြီ ဖြစ်ကာ ယင်းအနက် ၃ ‌ဦးမှာ ဆေးရုံဆင်းခွင့်ရပြီ ဖြစ်ကြောင်း သိရသည်။

.