COVID-19 အတည်ပြုလူနာ အသစ် ၈၈၈ ဦး ထပ်မံ တွေ့ရှိ၊ ရှမ်း​တောင်မှ ၂ ဦး ပါဝင်

COVID-19 ပိုး​​တွေ့ အတည်ပြုလူနာ အသစ် ၈၈၈ ဦး ထပ်မံ ​တွေ့ရှိကြောင်း ကျန်းမာရေးနှင့် အားကစားဝန်ကြီးဌာန၏ ယနေ့ (​အောက်တိုဘာလ ၁၄ ရက်)၊ ည ၈ နာရီ ထုတ်ပြန်ချက်အရ သိရသည်။

.

ထို့အတူ ပြည်သူ့ကျန်းမာ​ရေး ဓါတ်ခွဲမှုဆိုင်ရာဌာန(​PHL-တောင်ကြီး)မှ စစ်​ဆေးခဲ့သည့် ဓါတ်ခွဲနမူနာ ၁၅၆ ခုအနက် ရှမ်းပြည်နယ်​တောင်ပိုင်းမှ ၂ ဦးတွင် COVID-19 ပိုး တွေ့​ကြောင်း ပြည်သူ့ကျန်းမာ​ရေး ဓါတ်ခွဲမှုဆိုင်ရာဌာန(​PHL-တောင်ကြီး)က ထုတ်ပြန်ခဲ့သည်။

.

ယင်း လူနာများမှာ ပင်​လောင်းမြို့နယ်၊ အမက(ကုန်းချိုင်း)၌ အသွားအလာ ကန့်သတ်ထားသည့် အသက် ၂၁ နှစ်အရွယ် အမျိုးသမီးနှင့် ပင်းတယမြို့နယ်၊ ​ပွေးလှ​ကျေးရွာမှ အသွားအလာ ကန့်သတ်ထားသည့် အသက် ၁၉ နှစ် အမျိုးသားတို့ ဖြစ်​ကြောင်း သိရသည်။

.

" ၂ ​ယောက်လုံးက Quarantine မှာပဲ ​နေတဲ့သူတွေပါ။ ပင်​လောင်း တစ်​ယောက်က ရန်ကုန် စက်မှုဇုန်မှာ အလုပ် လုပ်ခဲ့တာ၊ အလုပ် အတူ လုပ်ခဲ့တဲ့ စက်မှုဇုန်က သူ့ သူငယ်ချင်း​တွေမှာလည်း Positive ​တွေ့ခဲ့တာ ရှိတယ်။ အဲဒီက​နေ ပြန်လာကတည်းက ပင်​လောင်းမြို့နယ်က ရွာတစ်ရွာက သီးခြားအိမ်မှာ Quarantine ထားပြီး စစ်လိုက်​တော့ Positive ​တွေ့တာပါ။ ပင်းတယ တစ်​ယောက်က ယာဥ်​နောက်လိုက်၊ ​ထောက်ကြန့်က​နေ လာတယ်၊ ​နေပြည်​တော် ​ရောက်​တော့ test kit နဲ့ စစ်​တော့ သူနဲ့အတူလာတဲ့ ကားဆရာက Positive ထွက်​တော့ ​နေခဲ့တယ်၊ သူက Negative ဖြစ်လို့ တခြားကားနဲ့ ဆက်ထွက်လာတယ်။ ပင်းတယမြို့နယ်၊ ​ပွေးလှကို ​ရောက်ပြီး Positive ဖြစ်နိုင်​ခြေရှိလို့ Quarantine ထားပြီး စစ်လိုက်​တော့ Positive ထွက်တာ။ contact ​တော့ မရှိဘူး၊ ​သေချာ​အောင်လို့ မိသားစုဝင်​တွေကို စစ်သွားပါမယ်။" ဟု ရှမ်းပြည်နယ် ပြည်သူ့ကျန်းမာ​ရေး ဦးစီးဌာနမှ ​ဒေါက်တာ ဇဝနကိုက က​မ္ဘောဇတိုင်းသို့ ​ပြောသည်။

.

မြန်မာနိုင်ငံတွင် မတ်လ ၂၃ ရက်မှ ယနေ့ (​အောက်တိုဘာလ ၁၄ ရက်)၊ ည ၈ နာရီထိ COVID-19 ပိုးတွေ့ အတည်ပြုလူနာ ၃၁၃၂၅ ဦး ရှိကာ၊ ယင်းအနက် ၇၃၂ ဦး သေဆုံး၍ ၁၃၈၆၆ ဦးမှာ ပြန်လည် သက်သာ၍ ​ဆေးရုံမှဆင်းခွင့် ရရှိပြီ ဖြစ်​ကြောင်း သိရသည်။