မိုင်းရှူးမြို့နယ်၊ နမ့်ပန်ချောင်းတံတား တည်ဆောက်ပြီးစီး

ကမ္ဘောဇတိုင်း

.

လွိုင်လင်ခရိုင်၊ မိုင်းရှူးမြို့နယ်၊ မိုင်းနောင်-မိုင်းရှူးလမ်းပေါ်ရှိ နမ့်ပန်ချောင်းကူးတံတား တည်ဆောက်မှု ပြီးစီး၍ စက်တင်ဘာလ ၃၀ ရက်မှ စတင်ကာ ဖြတ်သန်းသွားလာခွင့် ပြုထားပြီဖြစ်ကြောင်း သိရသည်။

.

.

အဆိုပါတံတားသည် သံကူကွန်ကရစ်အမျိုးအစား၊ သံမဏိသံဘောင်ရက်မ၊ သံကူကွန်ကရစ် ကြမ်းခင်း ဖြစ်ပြီး အရှည် ၁၃၀ မီတာ၊ ယာဉ်သွားလမ်းအကျယ် ၈ ဒသမ ၅ မီတာ၊ လူသွားလမ်းတစ်ဖက် ၁ မီတာ၊ တံတားကင်း လွတ်နယ်အကျယ် ၅၀ မီတာ၊အမြင့် ၄ မီတာရှိပြီး၊ တံတားခံနိုင်ဝန် ယာဉ်တစ်စီးချင်း ၇၅ တန် ဖြတ်သန်းသွားလာနိုင်ကြောင်း သိရသည်။

.

နမ့်ပန်ချောင်းတံတားကို တံတားဦးစီးဌာန၊ တံတားအထူးအဖွဲ့(၁၂)၊ ရွှေညောင်မှ တာဝန်ယူတည်ဆောက်ခဲ့ ခြင်းဖြစ်ပြီး ၂၀၁၈ ခုနှစ်၊ နိုဝင်ဘာလ ၁ ရက်နေ့မှလုပ်ငန်းများ စတင်ခဲ့ကာ ၂၀၂၀ ပြည့်နှစ်၊ စက်တင်ဘာလ ၃၀ ရက်နေ့တွင် လုပ်ငန်းများ ရာနှုန်းပြည့်ပြီးစီးခဲ့ပြီး စီမံကိန်း တန်ဖိုးငွေ ကျပ်သန်း ၃၃၀၀ ဖြစ်ကြောင်း သိရသည်။

.

ယခင်အသုံးပြုသည့် နမ့်ပန်ချောင်းတံတား (မိုင်းရှူးကြိုးတံတား)သည် နှစ်ကာလကြာမြင့်လာသည်နှင့်အမျှ သဘာဝရာသီဥတု ဒဏ်များကြောင့် ရေရှည်တွင် ကုန်စည်စီးဆင်းမှု နှောင့်နှေးမှုများ ဖြစ်လာနိုင်သဖြင့် တံတားသစ်တည်ဆောက်ရေးဆောင်ရွက်ရခြင်းဖြစ်ကာ ယခုအခါ နမ့်ပန်ချောင်းတံတားအသစ် တည်ဆောက်ပြီးစီးပြီဖြစ်၍ မိုင်းရှူးမြို့နယ်၏ဒေသဖွံ့ဖြိုးရေးလုပ်ငန်းများနှင့် ကုန်စည်စီးဆင်းမှုများ ပုံမှန်လည် ပတ်ရာတွင် များစွာအထောက်အကူပြုစေမည်ဖြစ်ကြောင်း သိရသည်။

.