ပအိုဝ်း​ဒေသ ဥက္ကဋ္ဌတာဝန် ထမ်းဆောင်ရန်မှာ ရွေးချယ်မှုအပေါ်တွင် မူတည်ဟု ဦးခွန်စံလွင် ပြော - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Thursday, October 29, 2020

ပအိုဝ်း​ဒေသ ဥက္ကဋ္ဌတာဝန် ထမ်းဆောင်ရန်မှာ ရွေးချယ်မှုအပေါ်တွင် မူတည်ဟု ဦးခွန်စံလွင် ပြော

ကမ္ဘောဇတိုင်း

.

ပအိုဝ်းကိုယ်ပိုင်အုပ်ချုပ်ခွင့်ရဒေသ ဥက္ကဌ အဖြစ် တတိယအကြိမ် ထပ်မံ တာဝန်ထမ်းဆောင်ရန်မှာ အားလုံး၏ ရွေးချယ်မှု အပေါ်တွင် မူတည်ကြောင်း ဟိုပုံးမြို့နယ် မဲဆန္ဒနယ်အမှတ် (၂) မှ ရှမ်းပြည်နယ်လွှတ်တော် ကိုယ်စားလှယ်အဖြစ် ဝင်ရောက် ယှဉ်ပြိုင်မည့် ဦးခွန်စံလွင်က ပြောဆိုခဲ့သည်။

.



.

ဦးခွန်စံလွင်သည် ပြီးခဲ့သည့် ၂၀၁၀ နှင့် ၂၀၁၅ ရွေးကောက်ပွဲများက အဆိုပါ မဲဆန္ဒနယ်မှပင် ဝင်ရောက် ယှဉ်ပြိုင် အနိုင်ရရှိခဲ့ပြီး ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဋ္ဌအဖြစ် ၂ ကြိမ်ဆက် တာဝန် ထမ်းဆောင်နေသူ ဖြစ်သည်။

.

“ဥက္ကဋ္ဌအဖြစ် ဆက်ပြီး တာဝန်ထမ်းဆောင်ဖို့ ဆိုတာကတော့ အားလုံးရဲ့ ရွေးချယ်မှုအပေါ်မှာ မူတည် တာပေါ့။ ရွေးကောက်ပွဲ နိုင်တဲ့ အပေါ်မှာလည်း မူတည်တယ်။ လွှတ်တော်ကိုယ်စားလှယ်တွေနဲ့ ဒေသ တာဝန်ရှိသူတွေရဲ့ ဆုံးဖြတ်ချက်အပေါ်မှာ မူတည်တာပေါ့။ နောက်ကို လက်ဆင့်ကမ်း ပေးသင့်တာလည်း ပေးရမှာပေါ” ဟု ဦးခွန်စံလွင်က ကမ္ဘောဇတိုင်းသို့ ပြောသည်။

.

PNO အနေဖြင့် ပအိုဝ်းကိုယ်ပိုင်အုပ်ချုပ်ခွင့်ရဒေသကို သက်တမ်း ၂ ကြိမ်ဆက်တိုက် ဦးဆောင်မှု ပြုခဲ့ရာ၌ အတတ်နိုင်ဆုံး အကောင်းဆုံး ဆောင်ရွက်ခဲ့ကြောင်း၊ သို့သော် တိုင်းပြည်၏ အနေအထားအရ လိုချင်သလောက် အပြည့်အဝ မရရှိနိုင်သေးကြောင်း၊ ဘတ်ဂျက် ရရှိရေး၊ အစိုးရ/ပြည်သူ ပူးပေါင်းဆောင်ရွက်ရေး၊ နိုင်ငံတကာ အဖွဲ့အစည်းများနှင့် ပူးပေါင်းဆောင်ရွက်ရေး လုပ်ငန်းများကို အတတ်နိုင်ဆုံးနည်းဖြင့် ကြိုးပမ်း ဆောင်ရွက်လျက်ရှိကြောင်း ၎င်းက ဆက်လက် ပြောဆိုခဲ့သည်။

.

“မဲဆန္ဒရှင် ပြည်သူတွေကို ဒီ ၂၀၂၀ မှာ ကျွန်တော်တို့ ပါတီကို ဆက်ပြီးတော့ မဲပေးဖို့ မေတ္တာရပ်ခံလိုပါတယ်။ ကျွန်တော်တို့ကတော့ ရွေးကောက်ပွဲဝင်ပြီ ဆိုကတည်းက အနိုင်ရဖို့ ယုံကြည်ထားတယ်။ မျှော်လည်း မျှော်လင့်တယ်။ ပြည်သူလူထုကလည်း နားလည်သဘောပေါက်ပြီး ကျွန်တော်တို့ကို ပေးမယ်လို့ ယုံကြည်ပါတယ်” ဟု ဦးခွန်စံလွင်က ပြောသည်။

.

ပအိုဝ်းအမျိုးသားအဖွဲ့ချုပ်ပါတီသည် ၂၀၁၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲတွင် ပြည်သူ့ လွှတ်တော်ကိုယ်စားလှယ် ၃ နေရာ၊ အမျိုးသားလွှတ်တော်ကိုယ်စားလှယ် ၁ နေရာ၊ ပြည်နယ်လွှတ်တော် ကိုယ်စားလှယ် ၆ နေရာဖြင့် ပအိုဝ်းကိုယ်ပိုင်အုပ်ချုပ်ခွင့်ရဒေသတွင် ရာနှုန်းပြည့် မဲအနိုင် ရရှိထားသော နိုင်ငံရေးပါတီတစ်ခု ဖြစ်ပြီး လာမည့် ၂၀၂၀ ရွေးကောက်ပွဲတွင် ပအိုဝ်းကိုယ်ပိုင်အုပ်ချုပ်ခွင့်ရဒေသ ၃ မြို့နယ် အပါအဝင် ရှမ်းပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်နှင့် ပဲခူးတိုင်းဒေသကြီး အတွင်းရှိ မဲဆန္ဒနယ် များတွင် ကိုယ်စားလှယ်လောင်း ၃၅ ဦး ဝင်ရောက်ယှဉ်ပြိုင်သွားမည် ဖြစ်ကြောင်း သိရသည်။

.

No comments:

Post a Comment

Journal Download

Photo of three cats

About