ကျောက်မဲတွင် တပ်မတော် ကြိုတင်ဆန္ဒမဲလက်မှတ်များ ထုတ်ပေး

မိုင်းထွန်း

.

ကျောက်မဲမြို့နယ်တွင် ကြိုတင်ဆန္ဒမဲပေးပိုင်ခွင့်ရှိသူ တပ်မတော်သားများနှင့် အတူနေ မိသားစုဝင်များ၏ ကြိုတင် ဆန္ဒမဲလက်မှတ်နှင့် စာအိတ်များကို ယမန်နေ့ အောက်တိုဘာလ ၆ ရက်၊ ညနေပိုင်းက မြို့နယ်ကော်မရှင်အဖွဲ့ခွဲ ဥက္ကဋ္ဌ ဦးစိုးထွန်းမှ တပ်ရင်းတပ်ဖွဲ့ တာဝန်ရှိသူများအား ထုတ်ပေးခဲ့ကြောင်း သိရသည်။

.

.

ယင်းကဲ့သို့ ကြိုတင်ဆန္ဒမဲပေးရန် တပ်ရင်းတပ်ဖွဲ့များမှ မြို့နယ်ကော်မရှင်အဖွဲ့ခွဲသို့ ပုံစံ ၁-၂ ဖြင့် လျှောက်ထားခဲ့ခြင်း ဖြစ်ကြောင်း သိရသည်။

.

ရွေးကောက်ပွဲတွင်  သက်ဆိုင်ရာ မဲဆန္ဒနယ် ပြင်ပရောက်ရှိနေသည့် တပ်မတော်သားများနှင့် အတူနေအိမ်ထောင်စုဝင် များ၊ မဲဆန္ဒနယ်ပြင်ပရောက် ကျောင်းသားများ၊ မဲဆန္ဒနယ်ပြင်ပရောက် သင်တန်းသားများ၊ မဲဆန္ဒနယ်ပြင်ပရောက် အခြားမဲဆန္ဒရှင်များ၊ အချုပ်ခံနေရသူများ၊ ဆေးရုံသို့ တက်ရောက်နေရသော အတွင်းလူနာများ၊ အစိုးရ၏ ခွင့်ပြုချက် ဖြင့် နိုင်ငံပြင်ပတွင် ရောက်ရှိနေသူများသည် သက်ဆိုင်ရာ မဲဆန္ဒနယ်အသီးသီးအတွက် ကြိုတင်ဆန္ဒမဲလက်မှတ်ဖြင့် ကြိုတင်ဆန္ဒမဲပေးပိုင်ခွင့်ရှိပြီး အဆိုပါ ကြိုတင်မဲများ ကို အောက်တိုဘာ ၈ ရက်နေ့မှ အောက်တိုဘာလ ၂၁ အတွင်း ပေးရမည်ဖြစ်ကာ ဆန္ဒမဲပေးပြီးသည့် ကြိုတင်ဆန္ဒမဲလက်မှတ်များကို ရွေးကောက်ပွဲ ကျင်းပပြုလုပ်သည့် နိုဝင်ဘာလ ၈ ရက်နေ့ ညနေ ၄ နာရီမတိုင်မီ သက်ဆိုင်ရာ ရွေးကောက်ပွဲ ကော်မရှင်အဖွဲ့ခွဲ သို့ ပြန်လည်ပေးပို့ရမည်ဖြစ်ကြောင်း သိရသည်။

.

ကျောက်မဲမြို့နယ်တွင် စုစုပေါင်းလျာထားမဲရုံ ၁၁၁ ရုံရှိပြီး တပ်မဲရုံ ၁ ရုံသာ ရှိကာ ဒုတိယအကြိမ် ကပ်ထားကြေညာ ထားသည့်  မဲဆန္ဒရှင်စာရင်းအရ  မဲပေးပိုင်ခွင့်ရှိသူ ၁၂၉၇၁၃ ဦးရှိကြောင်း သိရသည်။

.