မြန်မာနိုင်ငံမူးယစ်ဆေးဝါးဆန့်ကျင်ရေးအသင်းမှ ကျောက်မဲမြို့နယ်၊ ပါလင် (ကွင်းစလန်း) မူးယစ်ဆေးဖြတ်စခန်းသို့ သွားရောက်၍ ဆေးကုသရေးနှင့် နှစ်သိမ့်ဆွေးနွေး ပညာပေးမှုများ ပြလုပ်

မင်းဇော်မင်း

.

မြန်မာနိုင်ငံမူးယစ်ဆေးဝါးဆန့်ကျင်ရေးအသင်း (MANA) မှ အောက်တိုဘာလ ၂ ရက်နှင့် ၃ ရက်များတွင် ကျောက်မဲမြို့နယ်၊ ပါလင်ကျေးရွာတွင် ဖွင့်လှစ်ထားသည့် မူးယစ်ဆေးဖြတ်စခန်းသို့ သွားရောက်၍ ဆေးကုသရေးနှင့် နှစ်သိမ့်ဆွေးနွေး ပညာပေးမှုများ ပြုလုပ်ခဲ့သည်ဟု သိရသည်။

.

.

ယင်း ပါလင် (ကွင်းစလန်း) မူးယစ်ဆေးဖြတ်သင်တန်းကို ကျေးရွာဘုန်းတော်ကြီးကျောင်းမှ ဆရာတော် ဦးခေမာနန္ဒနှင့် TNLA ခရိုင်အုပ်ချုပ်ရေးပိုင်းမှ ကြီးကြပ်ဖွင့်လှစ်ပေးခြင်းဖြစ်ကြောင်း ကျောက်မဲခရိုင် မူးယစ်ဆေးဝါးဆန့်ကျင်ရေး အသင်း ဥက္ကဋ္ဌ ဦးတင်မောင်သိန်းထံက သိရသည်။

.

“သူတို့ အုပ်ချုပ်ရေးပိုင်းက နယ်မြေထဲကမူးယစ်ဆေးစွဲသူတွေကို စုစည်းပြီး လိုအပ်တာတွေကို အလှူရှင်တွေ၊ ကျေးရွာ တွေက အထောက်အပံ့နဲ့ လုပ်တယ်လို့ သိရတယ်။ ကျွန်တ်ောတို့ကတော့ မူးယစ်ဆေးဝါးနဲ့ ပတ်သက်တဲ့ ပညာပေး နှစ်သိမ့်ဆွေးနွေးမှုတွေ၊ ဆေးဝါးတွေ ကူညီပေးပါတယ်” ဟု ဦးတင်မောင်သိန်းက ပြောသည်။

.

သင်တန်းအား ဦးဆောင်သူ ဆရာတော် ဦးခေမာနန္ဒ၏ ဆက်သွယ် အကူအညီတောင်းခံလာချက်အရ ဇီဝိတလူမှု ကူညီရေးအသင်းနှင့် ကျောက်မဲခရိုင် MANA အသင်းဥက္ကဋ္ဌ ဦးတင်မောင်သိန်း၊ စီမံကိန်းအရာရှိ ဒေါက်တာသိန်းဇော်နှင့် အဖွဲ့ဝင် ၁၁ ဦးတို့က လိုက်ပါကွင်းဆင်း ဆောင်ရွက်ပေးခဲ့ခြင်းဖြစ်ကြောင်း သိရသည်။

.

“ကျန်းမာရေးဆိုင်ရာ ပံ့ပိုးမှုတွေ၊ စိတ်ပိုင်းဆိုင်ရာ အားပေးမှုနဲ့ ပညာပေးမှုဆိုင်ရာမှာ မူးယစ်ဆေးဝါးရဲ့ ဆိုးကျိုးတွေ အသိပညာပေးမှုကို တတ်နိုင်တဲ့ဘက်က ဆောင်ရွက်ပေးနိုင်ဖို့ အခုလို ဖိတ်ကြားရခြင်းဖြစ်ပါတယ်။ သင်တန်းကတော့ ဆရာတော် ဦးစီးတာ ပထမဆုံးအကြိမ် ဆိုပေမဲ့ ဒေသမှာတော့ ဒါနဲ့ဆိုရင် ၄ ကြိမ် ရှိပါပြီ” ဟု ဆရာတော် ဦးခေမာနန္ဒ က မိန့်ကြားခဲ့သည်။

.

ထို့အတူ TNLA ခရိုင်အုပ်ချုပ်‌ရေးမှ တာကေကေက “တအာင်းလူထုတွေသာမက ရှမ်းပြည်နယ်မြောက်ပိုင်းမှာ မူးယစ် ဆေးဝါးကြောင့် ဘက်စုံဖွံ့ဖြိုးမှု ကျဆင်းရတာ ဘယ်သူ့ကြောင့်လဲ။ အစိုးရလူကြီးပိုင်းတွေ မသိတာ အများကြီးပဲ။ ၂၀၁၃-၂၀၁၄ ကတည်းက တစ်စိုက်မတ်မတ် လုပ်လာတာ။ NGO တွေ၊ CSO တွေအနေနဲ့ ကြားထဲမှာ ၁၇ (၁)၊ (၂) တွေ ရှိနေတယ်။ ပရဟိတလုပ်ငန်းတွေ လုပ်တာမှာ ကောင်းတာလုပ်တယ်ဆို ကျွန်တ်ောတို့က လက်ခံတယ်” ဟု MANA အဖွဲ့သို့ ပြောဆိုခဲ့သည်ဟု သိရသည်။

.

“သူတို့ကို HIV စစ်တာ ၁၅ ယောက်တွေ့တော့ ရာခိုင်နှုန်းအရ ၂ ရာခိုင်နှုန်း နီးပါး ဖြစ်နေတယ်။ သူတို့အတွက် ART ဆေးရဖို့ တင်ပြတောင်းခံပေးရမယ်။ ကျောက်မဲဆေးရုံကြီးကို လာပြီး သမားတော်နဲ့ ကုသဖို့ စရိတ်တွေကအစ တင်ပြ သွားဖို့ ရှိနေတယ်” ဟု ကျောက်မဲခရိုင် MANA စီမံကိန်းဆရာဝန် ဒေါက်တာသိန်းဇော်က ပြောသည်။

.

မူးယစ်ဆေးစွဲ၍ ဆေးဖြတ်သူ ၁၂၀ ဦးအနက် အများစုမှာ နှစ်ပင်လိမ်၊ သုံးပင်လိမ် ဟု ခေါ်သည့် ဘိန်းဖြူအကြောတွင်း ထိုးသူ၊ ဘိန်းမဲနှင့် ရာမ သုံးစွဲသူ သုံးပုံတစ်ပုံခန့် ရှိသည်ဟု ၎င်းထံက သိရသည်။

.

ထို့အပြင် အသည်းရောင်အသားဝါ ဘီပိုး ၂ ဦး၊ စီပိုး ၉ ဦး ဦးတွေ့ရှိသဖြင့် ကျန်လူများအား ကာကွယ်ဆေးထိုးနှံပေး၍ နောက်တစ်ပတ်အကြာတွင် ဒေသဆရာမမှ ထိုးနှံပေးရေး ဆေးများပေးအပ်ထားကာ မူးယစ်ဆေးထိန်းဆေး၊ အားဆေး စသည်များ ပေးအပ်ခဲ့ပြီး လာမည့် အောက်တိုဘာ ၂၂ ရက် တွင် တတိယအကြိမ် ထိုးနှံပေးရေး သွားရောက်ရန် ရှိကြောင်း ဒေါက်တာသိန်းဇော်က ဆက်လက်ပြောဆိုခဲ့သည်။ 

.

အဆိုပါဆေးဖြတ်စခန်းကို ၃ လကြာ ဖွင့်လှစ်နေခြင်းဖြစ်ပြီး ဆေးဝါးအကူအညီဖြင့် မူးယစ်ဆေးဝါးဖြတ်ခြင်းမဟုတ်ဘဲ အစိမ်းဖြတ်ခြင်းဖြစ်ကာ လူဦးရေ ၁၂၀ အနက် အမျိုးသမီး ၃ ဦးပါဝင်၍ အသက်အရွယ်မှာ ၁၈ နှစ်မှ ၆၂ နှစ်အထိ ဖြစ်ကြောင်းသိရပြီး တအာင်း(ပလောင်)အများစုပါဝင်ကာ ရှမ်း၊ ကချင်လူမျိုးများ ပါဝင်ကြောင်း သိရပါသည်။

.