မိုင်းယောင်းမြို့နယ် ကြက်ခြေနီတပ်ဖွဲ့သို့ အလှူငွေ ပေးအပ်

စိုင်းအောင်ဇော်လင်း

.

မိုင်းယောင်းမြို့နယ် သံဃနာယကအဖွဲ့ မိုင်းဟန်ဆရာတော် ဘဒ္ဒန္တ ဇဋိလက ၄၃ နှစ်ပြည့် မွေးနေ့အလှူ အဖြစ် ယနေ့ အောက်တိုဘာလ ၂၄ ရက်၊ နံနက်ပိုင်းက မိုင်းယောင်းမြို့နယ် ကြက်ခြေနီသူနာပြု တပ်ဖွဲ့အတွက် အလှူငွေကျပ် ၁ သိန်း ပေးအပ်ခဲ့ကြောင်း သိရသည်။

.

.

လှူဒါန်းပွဲတွင် ဆရာတော်က ဩဝါဒချီးမြှင့်ပြီးနောက် မြို့နယ် ကြက်ခြေနီသူနာပြုတပ်ဖွဲ့မှူး ဦးသန့်ဇင်ဦးထံ ဆရာတော်က အလှူငွေ ကျပ်တစ်သိန်းကို ပေးအပ်ကာ တပ်ဖွဲ့မှူးက ဂုဏ်ပြုမှတ်တမ်းလွှာ ပြန်လည် ဆက်ကပ်ခဲ့ကြောင်း သိရသည်။

.

မိုင်းယောင်းမြို့နယ် ကြက်ခြေနီသူနာပြုတပ်ဖွဲ့သည် ကန့်သတ်စောင့်ကြည့်စခန်း ဝင်နေသူများအား COVID-19 ရောဂါကာကွယ်ရေး အသိပညာပေးခြင်း၊ လိုက်နာဆောင်ရွက်ရမည့်အချက်များ နှိုးဆော်ခြင်း၊ စိတ်ပိုင်း ဆိုင်ရာ အားပေးနှစ်သိမ့်ခြင်း၊ Swab နမူနာများ ရယူစစ်ဆေးခြင်းနှင့် မြို့နယ်အတွင်း နှာခေါင်းစည်း တပ်ဆင်ရေး လှုပ်ရှားမှုတွင် ပူးပေါင်းပါဝင်ဆောင်ရွက်လျက်ရှိပြီး Facility Quarantine နေထိုင်ပြီးစီးသူများအား အိမ်တိုင်ရာရောက် ကူညီပို့ဆောင်ပေးလျက်ရှိကြောင်း သိရသည်။

.

ထို့အပြင် မြို့နယ်အတွင်း တောင်ပေါ်ဒေသ တိုင်းရင်းသားကျေးရွာများမှ ပြည်သူများအား COVID-19 ရောဂါ ကြိုတင်ကာကွယ်ရေး အသိပညာပေးခြင်း၊ ကိုယ်အပူချိန်တိုင်းပေးခြင်း၊ ဆပ်ပြာခဲများ ထောက်ပံ့ ပေးအပ်ခြင်း၊ နှာခေါင်းစည်းနှင့် လက်ကမ်းစာစောင်များ၊ ဖြန့်ဝေပေးခြင်း၊  ပိုစတာများ ကပ်ခြင်းနှင့် လိုက်နာဆောင်ရွက်ရမည့်အချက်များ တိုက်တွန်းဆော်ဩခြင်းတို့ကို လုပ်ဆောင်လျက်ရှိပြီး သွေးအလှူရှင်များ စုဆောင်းခြင်း၊ ကိုယ်တိုင်သွေးလှူဒါန်းခြင်းတို့ကိုလည်း ဆောင်ရွက်ပေးလျက်ရှိကာ မတော်တဆမှုနှင့် သဘာဝဘေး ဖြစ်ပွားချိန်တွင် အသုံးပြုရန် အရေးပေါ်လူနာတင်ယာဉ် လိုအပ်နေ၍ လှူဒါန်းလိုသူများအနေဖြင့် ကြက်ခြေနီသူနာပြုတပ်ဖွဲ့မှူး ထံသို့ ဆက်သွယ်လှူဒါန်းနိုင်ကြောင်း သိရသည်။

.