ရှမ်းယူနိုက်တက်နှင့် ရတနာပုံတို့၏ ပွဲစဉ်ကို MRTV နှင့် MRTV Sports ရုပ်သံလိုင်းတို့တွင် တိုက်ရိုက် ထုတ်လွှင့်ပြသမည် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, September 30, 2020

ရှမ်းယူနိုက်တက်နှင့် ရတနာပုံတို့၏ ပွဲစဉ်ကို MRTV နှင့် MRTV Sports ရုပ်သံလိုင်းတို့တွင် တိုက်ရိုက် ထုတ်လွှင့်ပြသမည်

စိုင်းမျိုးမြတ်

.

မြန်မာနေရှင်နယ်လိဂ် နောက်ဆုံးအဆုံးအဖြတ် ပွဲစဉ်တွေထဲက တစ်ခုဖြစ်တဲ့ အောက်တိုဘာလ ၁ ရက်မှာ ကျင်းပမယ့် ရှမ်းယူနိုက်တက် ဘောလုံးအသင်းနဲ့ ရတနာပုံ ဘောလုံးအသင်းတို့ရဲ့ ဘောလုံးပွဲစဉ် ယှဉ်ပြိုင်မှုတွေကို မြန်မာ့ရုပ်မြင် သံကြား (MRTV) နဲ့ MRTV Sports ရုပ်သံလိုင်းတွေကနေ တိုက်ရိုက်ထုတ်လွှင့် တင်ဆက်ပေးသွားမှာ ဖြစ်ပါတယ်။

.


ဓါတ်ပုံ - ရှမ်းယူနိက်တက် ရရှိခဲ့သည့်ဆုဖလားများအားတွ့ရစဉ် 

.

ယခုနှစ် မြန်မာနေရှင်နယ်လိဂ် ပြိုင်ပွဲကြီးဟာ COVID-19 အခက်အခဲကြားကနေ ယဉ်ပြိုင်ကစားခဲ့ကြရာကနေ မနက်ဖြန်မှာတော့ နောက်ဆုံး ပွဲစဉ်ကို ရောက်ရှိလာခဲ့ပြီဖြစ်ပါတယ်။

.

ရင်ခုန်စရာ စိတ်လှုပ်ရှားမှုတွေနဲ့အတူ မနက်ဖြန်နောက်ဆုံးပွဲစဉ်မှာတော့ ချန်ပီယံဆုအတွက် ရေပန်းစားနေတဲ့ လက်ရှိချန်ပီယံဖြစ်တဲ့ ရှမ်းယူနိုက်တက်၊ ဟံသာဝတီ ယူနိုက်တက်နဲ့ ဧရာဝတီ ယူနိုက်တက်အသင်းတို့ရဲ့ ပွဲစဉ်တွေ ယှဉ်ပြိုင်ကစားသွားဖို့ ရှိနေပါတယ်။

.

လက်ရှိချန်ပီယံ ရှမ်းယူနိုက်တက် အသင်းကတော့ ကျန် ၂ သင်းထက် နှာတစ်ဖြားသာလို့နေပါတယ်။ လက်ရှိ အမှတ်ပေးဇယား အရလည်း ရှမ်းယူနိုက်တက်ဟာ ရမှတ် ၄၁ မှတ်နဲ့ ထိပ်ဆုံးမှာ ရပ်တည်နေပြီး၊ ဟံသာဝတီ အသင်းက ၄၀ မှတ်နဲ့ ဧရာဝတီအသင်းကတော့ ၃၉ မှတ် ရရှိထားပါတယ်။

.

မနက်ဖြန်ပွဲစဉ်မှာလည်း ရှမ်းယူနိုက်တက် အသင်းဟာ အဆင့် ၅ နေရာက ရတနာပုံ အသင်းနဲ့ တွေ့ဆုံရမှာဖြစ်ပြီးတော့ ဧရာဝတီနဲ့ ဟံသာဝတီကတော့ ထိပ်တိုက်တွေ့ဆုံကာ သူနိုင်ကိုယ်နိုင် အပြိုင်ကျဲရမယ့် ပွဲစဉ်ပါ။

.

ဒါကြောင့်လည်း လက်ရှိ အမှတ်ပေးဇယား ရပ်တည်မှု၊ မနက်ဖြန်တွေ့ရမယ့် ပြိုင်ဘက် ခြေစွမ်း၊ ကစားသမားစုဖွဲ့မှု အနေအထားဟာ အကုန်ခြုံကြည့်ရမယ် ဆိုရင် ရှမ်းယူနိုက်အသင်းဟာ  ဗိုလ်စွဲဖို့ အခွင့်အရေး အများဆုံး အနေအထား ဖြစ်ပါတယ်။

.

သို့သော်လည်း ဘောလုံးဆိုတဲ့ အားကစားဟာ ပွဲသိမ်းခရာ မမှုတ်မချင်း ဘာမဆိုဖြစ်နိုင်တာကြောင့် မထင်မှတ်ဘဲ မမျှော်လင့်တဲ့ ရလဒ်တွေ ဖြစ်ခဲ့ကြတာလည်း ဒုနဲ့ဒေးပါ။

.

လက်ရှိ ရှမ်းယူနိုက်တက် အသင်းရဲ့ ကစားသမားစုဖွဲ့မှုအရ နောက်တန်းတစ်ခုလုံးဟာ မြန်မာနေရှင်နယ်လိဂ်မှာ အတောင့်တင်းဆုံး နောက်တန်းကစားသမား ဖြစ်တဲ့ ဟိန်းသီဟဇော်နဲ့ ဟိန်းဖြိုးဝင်းတို့ ပြန်ပါလာဖွယ် ရှိပါတယ်။

.

အဓိက နောက်တန်းတွေ ဖြစ်တဲ့ ဒေးဗစ်ထန်းနဲ့ နန္ဒကျော်ဟာလည်း ခံစစ်စွမ်းဆောင်ရည် အကောင်းဆုံးပုံစံ ဖြစ်သလို တိုက်စစ်ကိုလည်း ပုံဖော်နိုင်တဲ့ ကစားသမားတွေပါ။

.

ဒါအပြင် နိုင်ငံခြား တိုက်စစ်ကစားသမားတွေ ဖြစ်တဲ့ အဘူဘာကာနဲ့ မက်ဆီမန်တို့ဟာလည်း အကောင်းဆုံးပုံစံ ရရှိနေပါတယ်။

.

ရတနာပုံကတော့ အောင်သူပြန်ပါလာရင် ရှမ်းတို့အတွက် ခက်ခဲနိုင်ပါတယ်။

.

ဘောလုံးမှာ ဘာမဆိုဖြစ်သွားနိုင်တဲ့ အနေအထားမှာ ရှမ်းယူနိုက်တက်အတွက် အသာရနေသော်လည်း ဖိအားများ နိုင်တဲ့ အားနည်းချက်တော့ရှိပါတယ်။

.

ရတနာပုံကတော့ လက်ရှိ အဆင့် ၅ နေရာဖြစ်လို့ သက်တောင့်သက်သာနဲ့ ကစားရမှာ ဖြစ်ပေမယ့် အသင်းကြီး ဖြစ်တာကြောင့် ဂုဏ်သိက္ခာအရ အကြိတ်အနယ် ခြေကုန်ထုတ်မှာလည်း အသေအချာပဲ ဖြစ်ပါတယ်။

.

ပထအကျော့ တွေ့ဆုံမှုအရတော့ ရှမ်းယူနိုက်တက်ဟာ ရတနာပုံ အိမ်ကွင်းမှာ ၃ ဂိုး ၁ ဂိုးဆိုတဲ့ ဂိုးပြတ် အနိုင်ရထား ပါတယ်။

.

ရှမ်းတို့အတွက် အနိုင်ရခဲ့ရင်တော့ ထပ်ဆင့် ချန်ပီယံအဖြစ် ဗိုလ်စွဲရမှာ ဖြစ်ပြီး သရေ (သို့) အရှုံးဖြစ်ခဲ့ရင်တော့ အောက်က ဧရာဝတီနဲ့ ဟံသာဝတီ ထဲက အနိုင်ရတဲ့အသင်း ရလဒ်ကို စောင့်ကြည့်ရမှာ ဖြစ်ပါတယ်။

.

ရှမ်းယူနိုက်တက်က သရေကျခဲ့ပြီး ဧရာဝတီ နဲ့ ဟံသာဝတီပွဲလည်း သရေကျခဲ့ရင်တော့ ရှမ်းအတွက် သာသာယာယာ ဗိုလ်စွဲနိုင်ပေမဲ့လည်း ဧရာဝတီကသာ ဟံသာဝတီကို နိုင်ခဲ့ရင်တော့ ရှမ်းနဲ့ ရမှတ်တူ ဂိုးကွာခြားချက် ဆုံးဖြတ်ရမှာ ဖြစ်လို့ ရင်မောစရာလေးတွေ ဖြစ်နိုင်ပါတယ်။

.

ဘယ်လိုပဲဖြစ်စေ ရှမ်းအသင်းအနေနဲ့ လက်ရှိချန်ပီယံ ဂုဏ်သိက္ခာအရ အောက် ၂ သင်း ရလဒ်ကို ထည့်မတွက်ထားဘဲ အနိုင်ကစားရမှာ ဖြစ်ပါတယ်။

.

လက်ရှိ COVID-19 ထိန်းချုပ်မှု အခြေအနေအရ ရှမ်းပြည်သားတွေအနေနဲ့ ကွင်းထဲကြည့်ရှုဖို့ မဖြစ်နိုင်ပေမဲ့ MRTV နဲ့ MRTV Sport Channel က တိုက်ရိုက် ထုတ်လွှင့်မှာ ဖြစ်လို့ စောင့်မျှော်ကြည့်ရှုရင်း ရှမ်းယူနိုက်တက်အသင်း တတိယအကြိမ် အဖြစ် ၂ နှစ်ဆက် မြန်မာနေရှင်နယ်လိဂ် ဆုဖလားကြီး ကိုင်မြှောက်နိုင်ဖို့ အားပေးကြပါလို့ တိုက်တွန်းလိုက်ပါတယ်။

.

No comments:

Post a Comment

Journal Download

Photo of three cats

About