ရှမ်းရှေ့တွင် ဆုံဆို့နာ ဖြစ်ပွားသူ များပြားလာသဖြင့် လူနာတွေ့ရှိရာ မြို့နယ်အလိုက် လွှမ်းခြုံ အမီလိုက် ကာကွယ်ဆေး ထိုးနှံပေးနေ

စိုင်းသိင်္ခသူ

.

ရှမ်းပြည်နယ်အရှေ့ပိုင်းရှိ မြို့နယ် ၆ ခုတွင် ဆုံဆို့နာ ဖြစ်ပွားသူ များပြားလာသဖြင့် မြို့နယ်အလိုက် လွှမ်းခြုံ အမီလိုက်ကာကွယ်ဆေး ထိုးနှံခြင်းများကို ပြုလုပ်နေလျက် ရှိကြောင်း ရှမ်းပြည်နယ်အရှေ့ပိုင်း ပြည်သူ့ ကျန်းမာရေးဦးစီးဌာနမှ သိရသည်။

.

ဆုံဆို့နာ အတည်ပြုလူနာများမှာ တာချီလိတ်မြို့နယ်တွင် ၅၀ ဦး ၊ မိုင်းခတ်မြို့နယ်တွင် ၄၆ ဦး၊ မိုင်းဆတ်မြို့နယ်တွင် ၃၈ ဦး၊ မိုင်းဖြတ်မြို့နယ်တွင် ၁၂ ဦး၊ မိုင်းတုံမြို့နယ်တွင် ၂၉ ဦးနှင့် ကျိုင်းတုံမြို့နယ်တွင် ၉ ဦး စုစုပေါင်း ၁၈၄ ဦး ရှိကြောင်း ကျိုင်းတုံမြို့ရှိ EOC ၏ စက်တင်ဘာ ၆ ရက် ၊ ညနေပိုင်းအထိ စာရင်းများအရ သိရသည်။

.

အဆိုပါ လူနာများအနက် သက်သာ ပျောက်ကင်းသူ ၁၀၆ ဦး ရှိကာ သေဆုံးသူ ၁၀ ဦး ရှိပြီး သေဆုံးသူများမှာ တာချီလိတ်မြို့နယ်မှ ၆ ဦး၊ မိုင်းခတ်မြို့နယ်များမှ ၂ ဦး၊ မိုင်းဆတ်မြို့နယ်မှ ၂ ဦး ဖြစ်ကြောင်း သိရသည်။

.

“ မိုင်းတုံမှာ အခု (စက်တင်ဘာ ၆ ရက် ညနေ ၅နာရီ) မှာပဲ လူနာ ၂ ဦး တိုးတယ်၊ အမီလိုက် ကာကွယ်ဆေး ထိုးခြင်းကိုတော့ မိုင်းတုံမြို့မှာ  ၄၈၇ ဦး ထိုးပြီး ကျန် နေရာတွေမှာ အဖွဲ့တွေ ခွဲပြီး တစ်မြို့နယ်လုံး ရက်အလိုက်၊ နေရာအလိုက် ထိုးနှံနေပါတယ်။ စုစုပေါင်း ၁၀၀၀၀ ကျော် ရှိပါမယ်။” ဟု မိုင်းတုံမြို့နယ်ဆေးရုံအုပ်ကြီး ဒေါက်တာ သက်ခိုင်မင်းက ပြောသည်။

.

ရှမ်းပြည်နယ် အရှေ့ပိုင်းတွင် အမီလိုက် ကာကွယ်ဆေးထိုးနှံ ပြီးစီးသူ ကျိုင်းတုံမြို့နယ်တွင် ၈၃၆ ဦး၊ တာချီလိတ်မြို့နယ်တွင် ၄၄၅၇ ဦး၊ မိုင်းခတ်မြို့နယ်တွင် ၁၁၀၂ ဦး၊ မိုင်းဖြတ်မြို့နယ်တွင် ၂၈၂၆ ဦး၊ မိုင်းဆတ်မြို့နယ်တွင် ၅၀၅၈ ဦးနှင့် မိုင်းတုံမြို့နယ်တွင် ၄၀၄၉ ဦး ရှိကြောင်း သိရသည်။