RCSS ထိန်းချုပ်နယ်မြေများအတွင်း ရွေးကောက်ပွဲဝင်မည့် နိုင်ငံရေးပါတီများအနေဖြင့် ကြိုတင်အကြောင်းကြား ပြီးမှ မဲဆွယ်ရန်လို ဟုဆို

မင်းဇော်မင်း

.

ရှမ်းပြည်ပြန်လည်ထူထောင်ရေးကောင်စီ (RCSS) အုပ်ချုပ်ရေးနယ်မြေဒေသအတွင်း ရွေးကောက်ပွဲဝင်မည့် နိုင်ငံရေး ပါတီများအနေဖြင့် ကြိုတင်အကြောင်းကြားပြီးမှသာ မဲဆွယ်ခြင်းလုပ်ငန်း ဆောင်ရွက်ရန်လိုကြောင်း RCSS က စက်တင်ဘာလ ၁ ရက်တွင် ထုတ်ပြန်ကြေညာခဲ့သည်ဟု သိရသည်။

.

.

“နိုင်ငံရေးပါတီတွေအနေနဲ့ ကိုယ်မဲဆွယ်မယ့် နယ်မြေခံ ဆက်ဆံရေးရုံးကို လူအင်အား၊ သွားရောက်မယ့် ခရိုင်/မြို့နယ်၊ စတင် စည်းရုံးရေးဆင်းမယ်ဆိုတာကို ကြိုတင်ပေးဖို့လိုပါမယ်။ ပါတီတွေဆင်းချင်တဲ့အချိန်ပါပဲ။ ဆက်ဆံရေးရုံး တွေကနေ သက်ဆိုင်တဲ့ နယ်ခြေခံတပ်တွေကို ညှိနှိုင်းအကြောင်းကြားပေးပါမယ်” ဟု RCSS ဆက်ဆံရေးနှင့်ပြန်ကြား ရေးရုံးမှ ဒုတိယဗိုလ်မှူးကြီးအုမ်ခေးက ကမ္ဘောဇတိုင်းသို့ ပြောသည်။

.

အဆိုပါ ထုတ်ပြန်ကြေညာချက်တွင် RCSS အနေဖြင့် ဒီမိုကရေစီနှင့် ဖက်ဒရယ်ပြည်ထောင်စု တည်ဆောက်ရာတွင် ရွေးကောက်ပွဲသည် မရှိမဖြစ်လိုအပ်သည်ဟု ခံယူထားပြီး ပြီးခဲ့သည့် ၂၀၁၀ နှင့် ၂၀၁၅ အထွေထွေရွေးကောက်ပွဲ များတွင် လွတ်လပ်ပြီး တရားမျှတသည့် ရွေးကောက်ပွဲ ဖြစ်မြောက်ရေးအတွက် တတ်နိုင်သမျှ ဝိုင်းဝန်းကူညီခဲ့ကြောင်း၊ နိုဝင်ဘာလ ၈ ရက် တွင်ကျင်းပမည့် ပါတီစုံဒီမိုကရေစီ အထွေထွေရွေးကောက်ပွဲတွင် တရားဝင်နိုင်ငံရေးပါတီများ သည် RCSS အုပ်ချုပ်ရေး နယ်မြေဒေသအတွင်း လာရောက်မဲဆွယ်ရာ၌ ပြည်ထောင်စုရွေးကောက်ပွဲကော်မရှင်၏ ကြေညာချက်များ၊ အမိန့် နှင့် ညွှန်ကြားချက်များ၊ ကျင့်ဝတ်နှင့် လုပ်ငန်းစဉ်များ၊ ရွေးကောက်ပွဲဥပဒေများ၊ COVID-19 ကပ်ရောဂါဆိုင်ရာ ကျန်းမာရေး လမ်းညွှန်ချက်များနှင့်အညီ လွတ်လပ်စွာ မဲဆွယ်ခြင်းများကို ပြုလုပ်ဆောင်ရွက်နိုင် ကြောင်းနှင့် ထိုသို့ မဲဆွယ်ခြင်းလုပ်ငန်းများ ဆောင်ရွက်ရာ၌ အဆင်ပြေ ချောမွေ့စေရေးအတွက် သက်ဆိုင်ရာ ပါတီ များသည် RCSS ဆက်ဆံရေးရုံးများနှင့် ဖြစ်စေ၊ ဒေသတွင်းရှိ နယ်မြေခံ အုပ်ချုပ်ရေးတာဝန်ရှိ ပုဂ္ဂိုလ်များနှင့်ဖြစ်စေ ကြိုတင်ဆက်သွယ်အကြောင်းကြားရန် လိုအပ်မည်ဖြစ်ကြောင်း ဖော်ပြပါရှိသည်။

.

ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) ဆက်ဆံရေးရုံကို တောင်ကြီးမြို့တွင် အခြေစိုက်၍ ရှမ်းပြည်နယ်တောင်ပိုင်း၊ မိုင်းပန်၊ ခိုလမ်မြို့များတွင်လည်းကောင်း၊ ရှမ်းပြည်နယ်အရှေ့ပိုင်း ကျိုင်းတုံ၊ တာချီလိတ်၊ မိုင်းတုံ မြို့များတွင်လည်းကောင်း၊ ရှမ်းပြည်နယ်မြောက်ပိုင်း၊ ကျောက်မဲ၊ လားရှိုးမြို့များတွင် လည်းကောင်း ဖွင့်လှစ်ထားကြောင်း သိရသည်။

.

ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) သည် ပြီးခဲ့သည့် ၂၀၁၅ ခုနှစ်၊ နိုင်ငံတော်သမ္မတ ဦးသိန်းစိန်လက်ထက်က အစိုးရနှင့် တစ်နိုင်ငံလုံး ပစ်ခတ် တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသားလက်နက်ကိုင်များအနက် တစ်ဖွဲ့အပါအဝင်ဖြစ်ပြီး ဌာနချုပ်ကို ထိုင်း-မြန်မာနယ်စပ် လွယ်တိုင်းလျန်တွင် ဖွင့်လှစ်ထားကြောင်း သိရသည်။

.