မင်းဇော်မင်း
.
လားရှိုးမြို့ပေါ်တွင် ယနေ့ စက်တင်ဘာလ ၅ ရက်၊ ညနေပိုင်းက အမည်မသိ
သေနတ်သမားတစ်ဦး၏ ပစ်ခတ်မှုကြောင့် အမျိုးသားတစ်ဦး သေဆုံးခဲ့ကြောင်း သိရသည်။
.
.
လားရှိုးမြို့၊ အမှတ် (၇) ရပ်ကွက်၊ နယ်မြေ (၅)၊ အောင်သပြေလမ်းနေ
ဦးလွေဇူးရင် (၆၄ နှစ်) သည် စက်တင်ဘာလ ၅ ရက်၊ ညနေ ၆ နာရီ ၄၀ မိနစ် အခိန်ခန့်က အိမ်ရှေ့ဆိုင်အတွင်း
ထမင်းစားနေစဉ် ကားတစ်စီးပေါ်မှ အမည်မသိ သေနတ်သမားတစ်ဦးက ဆင်းလာပြီး သေနတ်ဖြင့် ၈ ချက်ပစ်ခတ်ကာ
ကား မောင်းနှင်းထွက်ပြေးသွားခဲ့ခြင်း ယင်း ပစ်ခတ်မှုကြောင့် ဦးလွေဇူးရင်မှာ အခင်းဖြစ်နေရာတွင်
သေဆုံးခဲ့ကြောင်း သိရသည်။
အဆိုပါကိစ္စနှင့် ပတ်သက်၍ လားရှိုးမြို့မရဲစခန်းမှ တာဝန်ကျ ရဲအရာရှိက
“ဘာမှသေချာမသိရသေးပါဘူး။ စစ်ဆေးနေဆဲပါ” ဟု ပြောဆိုခဲ့သည်။
.
အဆိုပါပစ်ခတ်မှုတွင် အခြားသူများကို ပစ်ခတ်ခြင်း မရှိသဖြင့်
အခြား ထိခိုက်ဒဏ်ရာရရှိသူ မရှိကြောင်းနှင့် သေဆုံးသူကို လားရှိုးအခြေစိုက် ရွှေသံလွင်လူမှုကူညီရေးအသင်းကားဖြင့်
လားရှိုးဆေးရုံကြီးသို့ ပို့ဆောင်ခဲ့ပြီး ရဲတပ်ဖွဲ့ဝင်များ၊ လုံခြုံရေးတပ်ဖွဲ့ဝင်များက
အခင်းဖြစ်နေရာကို ထိန်းသိမ်းလျက်ရှိကြောင်း ကနဦးသတင်းရရှိသည်။
.
