လားရှိုးမြို့နယ်အတွင်း လူသစ်စုဆောင်းမည့် သတင်းများကြောင့် ကျေးရွာများမှ ဒေသခံ ၂၀၀ ကျော် မြို့ပေါ်သို့ တိမ်းရှောင်ရောက်ရှိနေ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, September 2, 2020

လားရှိုးမြို့နယ်အတွင်း လူသစ်စုဆောင်းမည့် သတင်းများကြောင့် ကျေးရွာများမှ ဒေသခံ ၂၀၀ ကျော် မြို့ပေါ်သို့ တိမ်းရှောင်ရောက်ရှိနေ


မင်းဇော်မင်း
.
လားရှိုးမြို့နယ်အတွင်း တိုက်ပွဲဖြစ်ပွားမည်ကို စိုးရိမ်ပြီး လူသစ်စုဆောင်းမည့် သတင်းများကြောင့် နောင်ဖော့ ကျေးရွာအုပ်စု၊ ပန်ခန်ကျေးရွာမှ ဒေသခံ ၂၀၀ ကျော်သည် စက်တင်ဘာလ ၁ ရက်၊ ညပိုင်းက လားရှိုးမြို့၊ အမှတ် (၁၂) ရပ်ကွက်ရှိ သီရိမင်္ဂလာ မန်ဆူ ရှမ်းကျောင်းသို့ တိမ်းရှောင်လာကြကြောင်း သိရသည်။
.
.
“လူတော့ မစုသေးပါဘူး။ ဒါပေမဲ့ တစ်ဘက်မှာ တိုက်ပွဲဖြစ်တဲ့နေရာကို တပ်ကူပို့ လှုပ်ရှားနေတော့ လူသစ်စုတာတွေ၊ ငွေတောင်းတာတွေကို ရှောင်တဲ့အနေနဲ့ လာရောက်ကြတာပါ။ တစ်ဘက်သတ် အပစ်ရပ်တယ် ပြောပေမဲ့ ဒါမျိုးက အင်အားစုတတ်တာဖြစ်လို့ ဒေသခံတွေကကြောက်ကြတယ်” ဟု တိမ်းရှောင်လာသူများ အား ကူညီပေးနေသူ လားရှိုးမြို့မှ ကိုမျိုးက ကမ္ဘောဇတိုင်းသို့ ပြောသည်။
.
ပန်ခန်ကျေးရွာမှ မန်ဆူကျောင်းသို့ တိမ်းရှောင်ရောက်ရှိလာသူများမှာ အိမ်ထောင်စု ၉၀ စုမှ ကျား ၈၀ ဦး၊ မ ၁၃၇ ဦး၊ စုစုပေါင်း ၂၁၈ ဦးဖြစ်ပြီး ကလေးငယ်များ၊ သက်ကြီးရွယ်အိုများပါရှိကြောင်း သိရသည်။
.
အဆိုပါ တိမ်းရှောင်လာသူများအား မန်ဆူကျောင်းဆရာတော် ဘဒ္ဒန္ဒ ပညာနန္ဒ နှင့် ၎င်းတည်ထောင်ထားသည့် ဂရုဏာဖောင်ဒေးရှင်းနှင့် လူမှုရေးအသင်းအဖွဲ့များ၊ ဌာနဆိုင်ရာများမှ Mask များ၊ ရေသန့်များ၊ မုန့်များကို လှူဒါန်း ပေးလျက်ရှိပြီး နေထိုင်ရေး၊ စားသောက်ရေး၊ ကျန်းမာရေးကိစ္စရပ်များအတွက် အဆင်ပြေစွာ ခိုလှုံနိုင်ရန် စီစဉ် ဆောင်ရွက်ပေးလျက်ရှိကြောင်း သိရသည်။
.
ထို့အပြင် လူစုလူဝေးမဖြစ်စေရန် တတ်နိုင်သမျှ အဆောင်များတွင် ဖြန့်ခွဲထားရှိကာ စေတနာရှင်များက ဆန်အိတ်၊ အဝတ်အစား စသည်များ လာရောက်လှူဒါန်းပေးလျက်ရှိကြောင်း သိရသည်။
.
“သွားခေါ်တော့ ခြုံတွေထဲက ထွက်လာကြတယ်။ လူငယ်တွေများတယ်။ လာခေါ်ပါဆိုလို့ အသင်းက ကား ၂ စီးနဲ့ ရွာက ထော်လာဂျီ ၄ စီးလောက်နဲ့ရောက်လာကြတာ။ ရှန်ခိုက်နားရောက်ခါနီး ထော်လာဂျီလမ်းကို မီးမှိတ်ပြီး မောင်းပါဆိုလို့ မောင်းခဲ့ရတယ်။ ရွာမှာ အမျိုးသမီးတချို့နဲ့ သက်ကြီးရွယ်အို ၃၀/၄၀ လောက်က နွားတွေ တိရစ္ဆာန်တွေကျန်နေလို့ မလိုက်ဘူး။ ဖြစ်လဲမတတ်နိုင်ဘူးပြောကြတယ်။ အားလုံး ၂၁၈ ဦး ဆိုပေမဲ့ ကျွန်တော် မှတ်ထားတာက ကလေးတွေပါရင် ၂၂၄ ဦးပါ” ဟု လားရှိုးမြို့၊ မေတ္တာစမ်းရေလူမှုကူညီရေးအသင်းမှ ဒုတိယဥက္ကဋ္ဌ ဦးမောင်ကြိုင်က ပြောသည်။
.
ပန်ခန်ကျေးရွာသည် လားရှိုးမြို့၏အနောက်ဘက် ၁၆ မိုင်ခန့်အကွာ ရှန်ခိုက်လမ်းခွဲ အနီးတွင် တည်ရှိသော ကျေးရွာတစ်ရွာဖြစ်ကြောင်း သိရသည်။
.
မြောက်ပိုင်းလက်နက်ကိုင်အဖွဲ့များဖြစ်သည့် AAMNDAA နှင့် TNLA တို့သည် စက်တင်ဘာလ ၁ ရက်မှ နိုဝင်ဘာလ ၉ ရက်အထိ ရက်ပေါင်း ၇၀ တစ်ဘက်သတ် အပစ်အခတ်ရပ်စဲကြောင်း ထုတ်ပြန်ကြေညာထားသည်။
.

No comments:

Post a Comment

Journal Download

Photo of three cats

About