စုလှိုင်
.
ကျိုင်းတုံမြို့နယ်တွင် COVID-19 သံသယလူနာ ၂ ဦး တွေ့ရှိထားသည့်အတွက်
ကျိုင်းတုံမြို့ပေါ်ရှိ မြို့မဈေးနှင့် မြို့သစ် ဈေး (အာခါဈေး) တို့အား စက်တင်ဘာလ
၂ ရက်မှ ၄ ရက်အထိ ၃ ရက် ယာယီပိတ်ထားမည်ဖြစ်သည်ဟု ကျိုင်းတုံ မြို့နယ်စည်ပင်သာယာရေးဌာနမှ
သိရသည်။
.
.
“၃ ရက် ယာယီပိတ်မှာပါ။ ကျိုင်းတုံမြို့ပေါ်မှာ သံသယလူနာ ၂
ဦးဆေးရုံရောက်လာတယ်။ အနံ့အသက် မရဘူး ဆိုတော့ ရောဂါဖြစ်နိုင်ချေရှိလို့ လူစုလူဝေးရှိတဲ့နေရာ
သွားခဲ့ရင် အန္တရာယ်ဖြစ်လာမှာစိုးလို့ ကြိုတင်ကာကွယ်တဲ့ သဘောအနေနဲ့ ဈေးကို ၃ ရက် ပိတ်ဖို့
စီစဉ်ခဲ့တာပါ။ ပျံကျဈေးနဲ့ စားသောက်ကုန်၊ ကုန်စိမ်းတွေတော့ မပါပါဘူး။ အဲဒါတွေက အများပြည်သူအတွက်
Social
Distancing ထားပြီး ရောင်းပေးမှာပါ” ဟု ကျိုင်းတုံမြို့နယ်စည်ပင် သာယာရေးဌာနမှ
အမှုဆောင်အရာရှိ ဦးကျော်မင်းထိုက်က ကမ္ဘောဇတိုင်းသို့ ပြောသည်။
ယင်းကဲ့သို့ ဈေးများအား ၃ ရက် ယာယီပိတ်ပြီးနောက်ပိုင်းတွင် ကျိုင်းတုံမြို့
ပြည်သူ့ဆေးရုံ၌ ရောက်ရှိနေသော သံသယလူနာ ၂ ဦး၏ ဓာတ်ခွဲအဖြေပေါ်မူတည်၍ ဈေးပြန်ဖွင့်လှစ်မည့်
အခြေအနေကို ခရိုင် COVID-19 ကာကွယ်၊ ထိန်းချုပ်၊
ကုသရေးကော်မတီနှင့် ဈေးကော်မတီတို့ ညှိနှိုင်းအစည်းအဝေး ပြုလုပ်ပြီး ပြန်လည်စီစဉ်သွားမည်
ဖြစ်သည်ဟု ၎င်းထံက သိရသည်။.
ကျိုင်းတုံ မြို့မဈေးကြီးအား ပိတ်သိမ်းထားသော်လည်း ဈေးအနောက်ဘက်ရှိ
ကုန်စိမ်းသည်များ၊ ပျံကျသည်များနှင့် ဈေးတွင်းရှိ သား/ငါးဆိုင်များအရောင်းဆိုင်များ၊
ကုန်စုံဆိုင်များအား ဖွင့်လှစ်ရောင်းချခွင့်ပြုမည်ဖြစ်ကြောင်း သိရသည်။
.
ကျိုင်းတုံအထွေထွေရောဂါကု ပြည်သူ့ဆေးရုံကြီးတွင်
ရန်ကုန်တိုင်းဒေသကြီးမှ ရောက်ရှိလာသည့် အနံ့အသက် မရရှိသော သတင်းထောက် ၂ ဦးအား ယမန်နေ့
ဩဂုတ်လ ၃၁ ရက်မှ စတင်၍ သီးခြားဆောင်၌ ထားရှိကာ ကြပ်မတ်ကုသပေးနေခြင်းဖြစ်ကြောင်း သိရသည်။
.
