ကမ္ဘောဇတိုင်း
.
ရှမ်းပြည်နယ်မြောက်ပိုင်း၊ ကျောက်မဲနှင့် နောင်ချိုမြို့များတွင်
စက်တင်ဘာလ ၂၂ ရက်၊ ညပိုင်းက မူးယစ်ဆေးဝါးများ ဖမ်းဆီးရမိခဲ့ကြောင်း သိရသည်။
.
.
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ
ပါဝင်သော ပူးပေါင်းအဖွဲ့သည် စက်တင်ဘာလ ၂၂ ရက်၊ ညနေ ၆ နာရီခွဲ အချိန်က သတင်းအရ
သက်သေများနှင့်အတူ နောင်ချိုမြို့နယ်၊ ငုက္ခလေးကျေးရွာအုပ်စု၊ ငုက္ခလေးကျေးရွာနေ
ကျော်ဇင်ထွေး ၏နေအိမ်အား ဝင်ရောက်ရှာဖွေရာ ၎င်းအားနေအိမ်တွင်တွေ့ရှိပြီး နေအိမ်မှ
ပလတ်စတစ်ကပ်ခွာအိတ်များဖြင့်ထည့်ထားသည့် စိတ်ကြွရူးသွပ်ဆေးပြား ၅၈၀၀ ပြား၊ ဒေသကာလ
ပေါက်စျေးတန်ဖိုးငွေကျပ် ၅၈ သိန်း၊
ဖန်ပုလင်း/ရောင်စုံဆပ်ပြာခွက်များဖြင့်ထည့်ထားသည့် ဘိန်းဖြူအလေးချိန် ၆၃ ဂရမ်၊ ဒေသကာလပေါက်စျေးတန်ဖိုးငွေကျပ်
၉၄၅၀၀၀ တို့ကို တွေ့ရှိသိမ်းဆည်းရမိခဲ့ကြောင်း သိရသည်။
.
အလားတူ ယင်းနေ့ ည ၁၀ နာရီ ၄၀ အချိန်က ကျောက်မဲမြို့နယ်၊ မူဆယ်-မန္တလေး
သွားကားလမ်းတွင် တားဆီးနှိမ်နင်းရေးလုပ်ငန်းများဆောင်ရွက်နေစဉ် သီပေါမြို့ဘက်မှ
ကျောက်မဲမြို့ဘက်သို့ ကျောက်မဲမြို့၊ ရပ်ကွက် (၉)နေ ဟန်ထွန်းဇော် စီးနင်းမောင်းနှင်လာသည့်မော်တော်ဆိုင်ကယ်အား
ရပ်တန့်စစ်ဆေးရှာဖွေရာ ၎င်းခါးတွင် ပတ်ထားသောခါးပတ်အိတ်အတွင်းမှ
ပလတ်စတစ်ကပ်ခွာအိတ်များဖြင့်ထည့်ထားသည့် စိတ်ကြွရူးသွပ် ဆေးပြား ၂၀၀၀ ပြား၊ ဒေသကာလပေါက်စျေးတန်ဖိုးငွေကျပ်
၂၀ သိန်းအား တွေ့ရှိသိမ်းဆည်းရမိခဲ့ကြောင်း သိရသည်။
.
အဆိုပါ မူးယစ်ဆေးဝါးများ ဖမ်းဆီးရမိမှုနှင့် ပတ်သက်၍ သက်ဆိုင်ရာ
ရဲစခန်းများတွင် မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေဖြင့်
အမှုဖွင့် အရေးယူပြီး ကွင်းဆက်များ ဖော်ထုတ်စစ်ဆေးလျက် ရှိကြောင်း သိရသည်။
.
