တောင်ကြီးရှိ ကျန်းမာရေးစစ်ဆေးရေးဂိတ်များမှ ဝန်ထမ်းများ၏ စားသောက်ရေးကို ရှမ်းပြည်နယ် ပြည်သူလူထု စားနပ်ရိက္ခာထောက်ပံ့ရေး ကော်မတီက လှူဒါန်းမည်

တောင်ကြီးမြို့နယ်ရှိ COVID-19 ရောဂါ ကာကွယ်တားဆီးရေး စစ်ဆေးရေးဂိတ်များ၌ တာဝန် ထမ်းဆောင်လျက်ရှိသည့် စေတနာ့ဝန်ထမ်းများနှင့် အစိုးရဝန်ထမ်းများ၏ စားသောက်ရေးကို ရှမ်းပြည်နယ် ပြည်သူလူထုစားနပ်ရိက္ခာ ထောက်ပံ့ရေးကော်မတီက ထောက်ပံ့လှူဒါန်းသွားမည် ဖြစ်ကြောင်း သိရသည်။

.

“ စားရေးသောက်ရေး အကုန် တာဝန် ယူမယ်ဗျ၊ ဂိတ်မှာ တာဝန်ကျနေတဲ့သူ အကုန်လုံးရဲ့ စားရေးသောက်ရေးကို တာဝန်ယူ သွားမှာပါ။ နောက်ပြီး Mask ရယ်၊ လက်အိတ်ရယ်၊ လက်ဆေးရည်ရယ် တခြား လိုအပ်တာတွေကို ထောက်ပံ့ပါမယ်။” ဟု ရှမ်းပြည်နယ် ပြည်သူလူထုစားနပ်ရိက္ခာ ထောက်ပံ့ရေးကော်မတီ ဒုဥက္ကဌ(၂) ဦးသူရစောသိန်းက ကမ္ဘောဇတိုင်းသို့ ပြောသည်။

.

တောင်ကြီးမြို့နယ်တွင် COVID-19 ရောဂါ ကာကွယ်တားဆီးရေး စစ်ဆေးရေးဂိတ်အဖြစ် တောင်လေးလုံးကျေးရွာနှင့် တောင်ကြီး-ဟိုပုံးလမ်းမပေါ်ရှိ တိုးဂိတ်အနီးတို့တွင် ဖွင့်လှစ်ထားရှိပြီး ယင်းဂိတ်များ၌ တာဝန်ထမ်းဆောင်နေသည့် စေတနာ့ဝန်ထမ်း၊ အစိုးရဝန်ထမ်း စုစုပေါင်း ၅၀ ဦး ရှိကာ စားသောက်စရိတ်အဖြစ် တစ်ဦးလျှင် ၄၀၀၀ ကျပ်စီ ထောက်ပံ့သွားမည် ဖြစ်ကြောင်း သိရသည်။

.

ရှမ်းပြည်နယ် ပြည်သူလူထုစားနပ်ရိက္ခာ ထောက်ပံ့ရေးကော်မတီတွင် နာယကများအဖြစ် ရှမ်းပြည်နယ်ဝန်ကြီးချုပ် ဒေါက်တာ လင်းထွဋ်၊ ကမ္ဘောဇအုပ်စု နာယက ဦးအောင်ကိုဝင်း၊ ပြည်နယ် စီမံကိန်းနှင့် ဘဏ္ဍာရေး ဝန်ကြီး ဦးစိုးညွန့်လွင်တို့က တာဝန်ယူထားပြီး ပြည်နယ်အတွင်းရှိ စေတနာ့ဝန်ထမ်းများ၊ အသင်းအဖွဲ့ဝင်များဖြင့် ဖွဲ့စည်း၍ ကမ္ဘောဇဘဏ်နှင့် အခြားသော အလှူရှင်များစွာ၏ အလှူငွေများဖြင့် နိုင်ငံအဝှမ်း၌ ထောက်ပံ့မှုများကို ပြုလုပ်နေခြင်း ဖြစ်သည်။