နန်းဝင်းရီ
.
ဟိုပုံးမြို့၊ မြို့ဦးကွက်သစ်၊ ပြည်ထောင်စုလမ်း၊ အမှတ်(မသ/၂)တွင် ယနေ့ (စက်တင်ဘာလ ၂၄ ရက်)၊ နေ့လယ်ပိုင်းက နေအိမ် တစ်လုံး မီးလောင်မှု ဖြစ်ပွားခဲ့ကြောင်း သိရသည်။
.
“ နေ့လယ် ၁၂ နာရီ ၅၀ မှာ မီး စလောင်တာ ၁ နာရီမှာ မီးငြိမ်းတယ်။ မီးသတ်ယာဉ် ၃ စီးနဲ့ပါ။ ပစ္စည်းဆုံးရှုံးတဲ့ တန်ဖိုးတော့ မသိရသေးဘူး။ TV Safeguard အပူ လွန်ကဲပြီး လောင်တာပါ။” ဟု ဟိုပုံးမြို့နယ် အုပ်ချုပ်ရေးမှူး ဦးနန်းတင့်က ကမ္ဘောဇတိုင်းသို့ ပြောသည်။
.
ယင်း နေအိမ် မီးလောင်မှုအား မီးသတ်တပ်ဖွဲ့ဝင်များ၊ ဒေသခံပြည်သူများ၊ ရဲတပ်ဖွဲ့ဝင်များ၊ ကြက်ခြေနီ တပ်ဖွဲ့ဝင်များက မီးသတ်ယာဉ် ၃ စီးဖြင့် မီးငြှိမ်းသတ်ပေးခဲ့ကြောင်း ဟိုပုံးမြို့နယ် အုပ်ချုပ်ရေးမှူးထံမှ သိရသည်။
.
အဆိုပါ မီးလောင်မှု အခြေအနေနှင့် ပတ်သက်၍ ဟိုပုံးမြို့မရဲစခန်းနှင့် ဟိုပုံးမြို့နယ် မီးသတ်ဦးစီးဌာနများသို့ ဆက်သွယ် မေးမြန်းရာတွင် အသေးစိတ် အချက်အလက်များ မသိရှိရသေးကြောင်းသာ ပြောဆိုခဲ့သည်။
.
