COVID-19 အတည်ပြုလူနာ အသစ် ၉၄၆ ဦး ထပ်မံ တွေ့ရှိ၊ ရှမ်းတောင်မှ ၃ ဦး ပါဝင် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, September 30, 2020

COVID-19 အတည်ပြုလူနာ အသစ် ၉၄၆ ဦး ထပ်မံ တွေ့ရှိ၊ ရှမ်းတောင်မှ ၃ ဦး ပါဝင်

COVID-19 ပိုး​​တွေ့ အတည်ပြုလူနာ အသစ် ၉၄၆ ဦး ထပ်မံ ​တွေ့ရှိကြောင်း ကျန်းမာရေးနှင့် အားကစားဝန်ကြီးဌာန၏ ယနေ့ (စက်တင်ဘာလ ၃၀ ရက်)၊ ည ၈ နာရီ ထုတ်ပြန်ချက်အရ သိရသည်။

.



ထို့အတူ ပြည်သူ့ကျန်းမာ​ရေး ဓါတ်ခွဲမှုဆိုင်ရာဌာန(​PHL-တောင်ကြီး)က စစ်​ဆေးခဲ့သည့် ဓါတ်ခွဲနမူနာ ၁၈၈ ခုအနက် ပင်းတယမှ ၁ ဦးနှင့် ညောင်ရွှေမှ ၂ ဦးတွင် COVID-19 ပိုး တွေ့​ကြောင်း ပြည်သူ့ကျန်းမာ​ရေး ဓါတ်ခွဲမှုဆိုင်ရာဌာန(​PHL-တောင်ကြီး)မှ ထုတ်ပြန်ထားသည်။

.

“ အမျိုးသား ၃ ဦးပါ၊ ပင်းတယက ၃၆ နှစ်အရွယ် ၁ ယောက်က ရန်ကုန်က ပြန်လာပြီး Quarantine ကို တန်းပြီး ဝင်တာပါ။ သူနဲ့ ပြန်လာတာက ၆ ယောက် ရှိတယ်၊ အဲ ၆ ယောက်ကလည်း Quarantine မှာ၊ မနက်ဖြန် ဓါတ်ခွဲနမူနာ စစ်မယ်။ ညောင်ရွှေက ၂ ယောက်က ကုန်ကား နောက်လိုက်တွေပါ။ ၁၉ နှစ်အရွယ် ၁ ယောက်က အောင်ပန်းမှာ အိမ်ရှိတော့ သူ့အိမ်မှာ တစ်ညနေတယ်။ သူ့မိသားစုနဲ့ ထိတွေ့မှု ရှိနိုင်တယ်။ သူ့အိမ်ကို သေချာ မပြောပြတော့ မသိဘူး၊သူနဲ့ မိသားစုက ၄ ယောက် ရှိတယ်လို့ သိရတယ်။ စုံစမ်းနေတုန်းပေါ့။ နောက်နေ့မှာ ညောင်ရွှေ Quarantine မှာ ဝင်တယ်။ နောက် ၂၁ နှစ်အရွယ် ၁ ယောက်က သူလည်း ကားသမားပဲ၊ ၁၈ ရက်နေ့မှ ပြန်ရောက်တယ်၊ ရောက်ပြီးတော့ သူ့အိမ်မှာ နေလိုက်သေးတယ်။ မြို့ထဲမှာ သွားလာတာတွေလည်း ရှိတယ်။ ၂၁ ရက်မှာ Quarantine ဝင်တယ်။ အဲဒီတော့ သူက ထိတွေ့မှု ရှိ(များ) နိုင်တယ်။” ဟု ရှမ်းပြည်နယ် ပြည်သူ့ကျန်းမာရေး ဦးစီးဌာနမှ ဒေါက်တာ ဇဝနကိုက ကမ္ဘောဇတိုင်းသို့ ပြောသည်။

.

အဆိုပါ ရှမ်းပြည်နယ်တောင်ပိုင်းမှ COVID-19 ပိုးတွေ့ အတည်ပြု လူနာများကို တောင်ကြီးမြို့ စဝ်စံထွန်းဆေးရုံတွင် ဆေးကုသမှု ပေးမည် ဖြစ်ကြောင်း သိရသည်။

.

အတည်ပြု လူနာများ၏ အ​သေးစိတ် အချက်အလက်များကို ထုတ်ပြန်ခြင်း မရှိ​သေးဘဲ အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်)၊ ဆေးသု​တေသနဦးစီးဌာန၊ ပြည်သူ့ကျန်းမာ​ရေး ဓါတ်ခွဲမှုဆိုင်ရာဌာနများ၊ ပြည်သူ့​ဆေးရုံများနှင့် တပ်မ​တော်​ဆေးရုံတို့တွင် ဓါတ်ခွဲ စစ်ဆေး ပြီးစီးခဲ့သော ဓာတ်ခွဲနမူနာများအနက် ၉၄၆ ဦးတွင် COVID-19 ပိုး တွေ့ရှိခြင်း ဖြစ်​ကြောင်း သိရသည်။

.

မြန်မာနိုင်ငံတွင် မတ်လ ၂၃ ရက်မှ ယနေ့ (စက်တင်ဘာလ ၃၀ ရက်)၊ ည ၈ နာရီထိ COVID-19 ပိုးတွေ့ အတည်ပြုလူနာ ၁၃၃၇၃ ဦး ရှိကာ၊ ယင်းအနက် ၃၁၀ ဦး သေဆုံး၍ ၃၇၅၅ ဦးမှာ ပြန်လည် သက်သာ၍ ​ဆေးရုံမှ ဆင်းခွင့် ရရှိပြီ ဖြစ်​ကြောင်း သိရသည်။

No comments:

Post a Comment

Journal Download

Photo of three cats

About