.
ကလောမြို့နယ်၊ ဘော်ဆိုင်းကျေးရွာတွင် စက်တင်ဘာလ ၂၈ ရက်၊ ညနေပိုင်းက ခဲသတ္တုချော် တူးဖော်သူ အမျိုးသား ၃ ဦး တွင်းအတွင်း၌ အောက်ဆီဂျင်ပြတ်၍ သေဆုံးခဲ့ကြောင်း သိရသည်။
.
ဘော်ဆိုင်းကျေးရွာ၊ ကံသာရပ်ကွက်နေ ဒေါ်နန်းဟောင်၏ မြေကွက်အတွင်းရှိ ခဲသတ္တုတွင်းအတွင်း၌ စက်တင်ဘာလ ၂၈ ရက်၊ ညနေ ၅ နာရီခွဲခန့်က ပင်းတယမြို့၊ ထိုးပုံကျေးရွာနေ သန့်စင် (ခ) ဆိုးပေ၊ ဖိုးကျော် (ခ) သန်းထွေး၊ ကျော်မျိုးဦးနှင့် ကျောက်စုကျေးရွာအုပ်စု၊ ဘုရားတိုက်ကျေးရွာနေ ဇော်လင်းမောင်တို့ ၄ ဦးအနက် ၃ ဦးမှာ ချော်တူးနေစဉ် အောက်ဆီဂျင်ပြတ်၍ သေဆုံးခဲ့ရခြင်း ဖြစ်ကြောင်း သိရသည်။
.
အဆိုပါ တွင်းမှာ ပေ ၁၀၀ ခန့် အနက် ရှိပြီး ချော်တူးသူ ၄ ဦးအနက် ကျော်မျိုးဦး တစ်ဦးသာ ပြန်တက်လာနိုင်ပြီး ကျန် ၃ ဦးသည် တွင်းအတွင်း၌ အောက်ဆီဂျင်ပြတ်လတ်ကာ သေဆုံးကျန်ရစ်ခဲ့ခြင်း ဖြစ်ကြောင်း ရဲမှတ်တမ်းများတွင် ဖော်ပြထားသည်။
.
အဆိုပါ သေဆုံးသူများ၏ ရုပ်အလောင်းများအား ဘော်ဆိုင်းတိုက်နယ်ဆေးရုံသို့ သယ်ဆောင် ပေးပို့ကာ ဟဲဟိုးနယ်မြေရဲစခန်းမှ သေမှုသေခင်းအမှတ်စဉ် (၆/၂၀၂၀) ဖြင့် အမှုဖွင့်၍ ဓမ္မတာအတိုင်း သေဆုံးခြင်း ဟုတ်/မဟုတ် စုံစမ်းစစ်ဆေးမှုများ ပြုလုပ်နေကြောင်း သိရသည်။
.
