တောင်ကြီးတွင် သတင်းရဲတပ်ဖွဲ့ တပ်ဖွဲ့ဝင် ၃ ဦးအား ကားဖြင့် တိုက်၍ ထွက်​ပြေး​​မောင်းနှင်သူအား ဖမ်းမိ

စုလှိုင်

.

တောင်ကြီးမြို့ ၊ သစ်တောရပ်ကွက် ၊ နီလာရိုးမ ဓာတ်ဆီဆိုင်အနီး ၊ ဗိုလ်ချုပ်လမ်းအတိုင်း လမ်းလျှောက်​နေသော အမှတ်(၁၄)ရဲသတင်းတပ်ဖွဲ့ခွဲ(SB)မှ ရဲတပ်သား ၃ ဦးအား မော်တော်ယာဥ်ဖြင့် ဝင်တိုက်မိပြီး ​မောင်းနှင် ထွက်​ပြေးသူအား စက်တင်ဘာလ ၁၈ ရက် ည​နေပိုင်းက   ပြန်လည် ဖမ်းမိခဲ့​ကြောင်း သိရသည်။

.

တောင်ကြီးမြို့ ၊ သစ်တောရပ်ကွက် ၊ ဗိုလ်ချုပ်လမ်းအတိုင်း SB မှ ရဲတပ်သားများ ဖြစ်သည့် အောင်ညီညီဇင် ၊ သီဟအောင်နှင့် အောင်ရဲဇော် ၃ ဦးတို့သည် ရုံးမှ နေအိမ်တန်းလျားသို့ စက်တင်ဘာလ ၁၇ ရက်၊ ညပိုင်းက လမ်းလျှောက် ပြန်စဥ်  ​အေးသာယာမြို့​နေ ယာဥ်မောင်း အသက် ၂၇ နှစ် အရွယ်ရှိ ခွန်ကျော်ခေါင် (ခ)တခေါင် ​မောင်းနှင်သည့် ယာဥ်မှာ အရှိန်မထိန်းနိုင်ဘဲ နောက်မှ ဝင်တိုက်ခဲ့ပြီး ထွက်ပြေး တိမ်းရှောင်သွားခဲ့ခြင်း ဖြစ်ကြောင်း သိရသည်။

.

ယာဥ်တိုက်မှုကြောင့် ရဲတပ်သား အောင်ညီညီဇင်တွင် ဝဲဦးခေါင်း ပေါက်ပြဲ၊ ဝဲ/ယာ နားရွက်ပြတ်ရှ၊ ယာပုခုံးပေါက်ပြဲ၊ ဝဲ/ယာ ခြေသလုံးပွန်းပဲ့ ဒဏ်ရာ (စိုးရိမ်ရ ) ၊ ရဲတပ်သား သီဟအောင်တွင် ဝဲမျက်နှာပွန်း ၊ ယာပေါင် ပေါက်ပြဲနာကျင် ၊ ဝဲ/ယာ ခြေထောက်ပေါက်ပြဲ ဒဏ်ရာ (မစိုးရိမ်ရ )နှင့် ရဲတပ်သား အောင်ရဲဇော်တွင် ဝဲဦးခေါင်းဂျိုစောင်း ပေါက်ပြဲ ၊ ယာခြေထောက် ပွန်းပဲ့ဒဏ်ရာ (မစိုးရိမ်ရ )ဒဏ်ရာများ ရရှိခဲ့ကြောင်း သိရသည်။

.

အဆိုပါ ယာဥ်အား မဆင်မခြင် မောင်းနှင် တိုက်ပြေးသွားသူ ခွန်ကျော်ခေါင် (ခ) တခေါင်အား အထူးအမှုစစ်အဖွဲ့  ဖွဲ့စည်း၍ လိုက်လံ စုံစမ်း ရှာ​ဖွေရာ တောင်ကြီးမြို့ ၊ ဟော်ကုန်းရပ်ကွက်၊ မဟာဗန္ဓုလလမ်း၊ အိမ်အမှတ်(၁၀) တွင် ဖမ်းမိခဲ့ပြီး တောင်ကြီးမြို့မ ရဲစခန်း၌ ယာဥ်(ပ) ၂၁/ ၂၀၂၀ ရာဇသတ်ကြီးပုဒ်မ - ၂၇၉/၃၃၇/ ၃၃၈/၂၀၂ တို့ဖြင့် အမှုဖွင့် အရေးယူ ဆောင်ရွက်လျက် ရှိကြောင်း သိရသည်။