တောင်ကြီးမြို့မဈေးအတွင်းရှိ ဆိုင်ခန်းအချို့ အရောင်းအဝယ်ပါး သဖြင့် ယာယီ ပိတ်သိမ်းထား

အောင်ဆန်းဝင်း

.

တောင်ကြီးမြို့၏ အဓိက အချက်အချာဖြစ်သည့် မြို့မဈေးအတွင်း အရောင်း အဝယ် နည်းပါးလာသဖြင့် ဈေးဆိုင် ခန်းအချို့ ယာယီ ပိတ်သိမ်းထားကြောင်း သိရသည်။

.

COVID-19 ရောဂါ ဖြစ်ပွားလာချိန်မှစ၍ တောင်ကြီးမြို့ပေါ်ရှိ စျေးများအား ယာယီ ပိတ်သိမ်းခဲ့ပြီး နောက်ပိုင်းတွင် အလှည့်ကျ စနစ်ဖြင့် ပြန်လည် ဖွင့်လှစ်ခွင့်ပြုခဲ့သော်လည်း ယခုအခါ ရောဂါဖြစ်ပွားမှု ပြန်လည် များပြားလာသည့် အတွက် လူစုလူဝေး ရှောင်ရှားလာခြင်းကြောင့် စျေး အတွင်း ဆိုင်ခန်းများသို့ ဝင်ရောက် ဝယ်ယူသူ နည်းပါးလာခြင်း ဖြစ်ကြောင်း သိရသည်။

.

“ အခုနောက်ပိုင်း ဈေးထဲကို ဝင်တဲ့လူ အတော် နည်းသွားတယ်။ အရောင်းအဝယ်ကတော့ တချို့ ရက်တွေဆိုရင် ဈေးဦး ပေါက်တယ်ဆိုရုံ လောက်ပဲ။ ဈေးဦး မပေါက်တဲ့ရက်တွေက ပို များလာတယ်။ ကိုယ်ပိုင်ဆိုင်ခန်းနဲ့ ဖွင့်တာတောင် အဆင်မပြေတော့ဘူး။ အဲဒါကြောင့် ဆိုင်ပိတ်ပြီး ခဏ နားထားလိုက်တာပါ” ဟု တောင်ကြီးမြို့မစျေးအတွင်း အဝတ် အထည်နှင့် အားကစားဝတ်စုံရောင်းချသူ တစ်ဦးက ကမ္ဘောဇတိုင်းသို့ ပြောသည်။

.

ယင်းကဲ့သို့ အရောင်းအဝယ် ပါးလာသဖြင့် ဆိုင်ခန်း ငှားရမ်းဖွင့်လှစ်သူများ အနေဖြင့်လည်း အဆင်မပြေမှုများ ရှိလာနေပြီး ဈေးသည်အချို့မှာ ဆိုင်ခန်းပြန်လည် အပ်နှံမှုများလည်း ရှိလာကြောင်း သိရသည်။

.

“ ကျွန်မတို့လည်း အခုလိုအချိန်မှာ ကိုယ်ချင်းစာစိတ် ထားပြီး ဆိုင်ခန်းငှားရမ်းခကို တတ်နိုင်သလောက် လျှော့ပေးပါတယ်။ အရောင်းအဝယ်တွေ ပါးနေတော့ ငှားရမ်းတဲ့လူတွေ ကိုယ်တိုင် မတတ်နိုင်တော့ဘူးပေါ့။ အခု နောက်ပိုင်း ဆိုင်ခန်း ပြန်အပ်တဲ့လူ တော်တော် များ လာတယ်” ဟု ဆိုင်ခန်းပိုင်ရှင် တစ်ဦးကလည်း ပြောဆိုခဲ့သည်။

.

ဈေးဆိုင်ခန်းပိုင်ရှင် အချို့ အနေဖြင့် ဆိုင်ခန်းငှားရမ်းခများ လျှော့ချပေးသော်လည်း အရောင်းအဝယ် မရှိသလောက် ပါးနေသည့် အတွက် ဆိုင်ခန်း ပြန်လည် အပ်နှံသူများလည်း ရှိနေကြာင်း သိရသည်။

.

တောင်ကြီးမြို့မဈေး အတွင်း၌ ဈေးရုံပေါင်း ၁၉ ရုံ၊ ဆိုင်ခန်းပေါင်း ၁၈၆၈ ခန်း ရှိပြီး မြို့မဈေးသည် မြို့တော် တောင်ကြီး၏ အထင်ကရ နေရာ တစ်ခု ဖြစ်ကာ တောင်ကြီးမြို့တွင် မြို့မဈေးအပြင် အမှတ်(၅)ဈေး၊ စဝ်စံထွန်းဈေး၊ ရဲဘော်ဈေး၊ ဘူတာဈေးတို့ တည်ရှိသည်။