ကျောက်မဲမြို့အထွက် တိုးဂိတ်အနီးရှိ တည်းခိုခန်းမန်နေဂျာ လင်မယား ၂ ဦး အသတ်ခံရ

စိုင်းသိင်္ခသူ

.

ကျောက်မဲမြို့မှ လားရှိုးမြို့ဘက် အထွက် တိုးဂိတ်အနီးရှိ တည်းခိုခန်းတစ်ခုမှ မန်နေဂျာ လင်မယား ၂ ဦးသည် စက်တင်ဘာလ ၈ ရက်၊ ညပိုင်းက အသတ်ခံရကြောင်း သိရသည်။

.

“ မြင်တွေ့ရတာတော့ အမျိုးသားက အဝင်နားမှာ လဲကျနေပြီး လည်ပင်းပြတ်ရှ ဒဏ်ရာနဲ့၊ သူ့အမျိုးသမီးကတော့ အခန်းထဲမှာ ဗိုက်ကို ဓားထိုး ခံရပြီး သေနေတာ တွေ့ရတယ်။ တည်းခိုခန်းမှာ အမျိုးသမီးငယ် ၂ ဦး တွေ့ရလို့ တာဝန်ရှိသူတွေက စစ်မေးနေပါတယ်။” ဟု အခင်းဖြစ် နေရာသို့ ရောက်ရှိခဲ့သည့် ကျောက်မဲမြို့ ဇီဝိတလူမှုကူညီရေးအသင်းမှ ဦးတင်မောင်သိန်းက ပြောသည်။

.

ကျောက်မဲမြို့မှ လားရှိုးမြို့ဘက်သို့အထွက် တိုးဂိတ်အနီး၊ ပန်ပေါင်းကျေးရွာရှိ တည်းခိုခန်းတွင် မန်နေဂျာ လင်မယား ၂ ဦး အသတ်ခံထားရကြောင်း သတင်းအရ တာဝန်ရှိသူများက သွားရောက်ကြည့်ရှု စစ်ဆေးရာ သေဆုံးသူများမှာ အသက် ၅၆ နှစ်အရွယ် ဦးတင်မောင်အေးနှင့် ၎င်း၏ဇနီးဖြစ်သူ အသက် ၅၅ နှစ်အရွယ် ဒေါ်ခင်ဝင်းတို့အား ဓါး ဒဏ်ရာများဖြင့် သေဆုံးနေခြင်း တွေ့ရှိရပြီး ၎င်းတို့၏ ရုပ်အလောင်းများကို ကျောက်မဲ နာရေးကူညီမှုအသင်း မော်တော်ယာဉ်ဖြင့် ဆေးရုံသို့ ပို့ဆောင်ခဲ့ကြောင်း သိရသည်။

.

သေဆုံးသူများသည် ရုန်းရင်းဆန်ခတ် ဖြစ်ပွားမှု မတွေ့ရသည့် အပြင် တည်းခိုသူ အမည်စာရင်း ပျောက်ဆုံးနေခြင်း၊ သေဆုံးသူ ဒေါ်ခင်ဝင်း ဝတ်ဆင်ထားသည့် ရွှေထည်များ ပျောက်ဆုံးနေသည်ကို တွေ့ရှိရကြောင်း ရဲမှတ်တမ်းအရ သိရသည်။

.

အဆိုပါ လူသတ်မှု ကျူးလွန်သူအား စုံစမ်းဖော်ထုတ် ဖမ်းဆီးရန်အတွက် ကျောက်မဲမြို့မရဲစခန်းမှ (ပ) ၈၆/၂၀၂၀၊ ရာဇသတ်ကြီးပုဒ်မ ၃၀၂ ဖြင့် အမှုဖွင့်လှစ် စစ်ဆေးနေလျက် ရှိကြောင်း သိရသည်။