ကလောမြို့နယ်၊ အောင်ပန်းမြို့ရှိ အမှတ်(၂) တပ်မတော်ဆေးရုံတွင် ဆေးကုသမှု ခံယူနေသည့် COVID-19 လူနာအမှတ်(၁၂၁၆)၏ မိသားစုဝင်များကို ယင်းဆေးရုံ၌ အသွားအလာ ကန့်သတ်ထားပြီး စောင့်ကြပ်ကုသမှု ပေးနေကြောင်းနှင့် ၎င်း နေထိုင်ခဲ့သည့် ကျေးရွာအား လိုအပ်ပါက Lockdown ပြုလုပ်မည် ဖြစ်ကြောင်း သိရသည်။
.
“ တပ်ပိုင်းကတော့ တပ်အနေနဲ့ပဲ ကုသတာ စောင့်ကြပ် ကြည့်ရှုတာ လုပ်ပါတယ်၊ ကျန်းမာရေး ဝန်ကြီးဌာနက ထုတ်ပြန်တာလောက်ပဲ ရှိပါတယ်။” ရှမ်းပြည်နယ် ပြည်သူ့ကျန်းမာရေး ဦးစီးဌာနမှ ဒေါက်တာ ဇဝနကိုက ပြောသည်။
.
ယင်း COVID-19 လူနာအမှတ်(၁၂၁၆)သည် ပင်လောင်းမြို့နယ်၊ တီကျစ်မြို့ အခြေစိုက် တပ်ရင်းတစ်ခုမှ အသက် ၃၁ နှစ်အရွယ် တပ်မတော်သား တစ်ဦး ဖြစ်ပြီး ရခိုင်ပြည်နယ်၌ စစ်ဆင်ရေး တာဝန် ထမ်းဆောင်ကာ ဩဂုတ်လ ၂၈ ရက်တွင် တီကျစ်မြို့ရှိ တပ်ရင်းသို့ ပြန်လည် ရောက်ရှိပြီးနောက် တီကျစ်မြို့၊ လွင်ရွာကျေးရွာတွင် မိသားစုနှင့်အတူ နေထိုင်နေစဉ် ကျန်းမာရေး မကောင်းသဖြင့် စက်တင်ဘာလ ၁ ရက်၌ ၄င်း၏ ဓါတ်ခွဲနမူနာအား ရယူ၍ နေပြည်တော်ရှိ တပ်မတော်ဆေးရုံသို့ ပို့ဆောင် စစ်ဆေးခဲ့ခြင်း ဖြစ်ကြောင်း သိရသည်။
.
အဆိုပါ တပ်မတော်သားအား စက်တင်ဘာလ ၂ ရက်၊ ညပိုင်းတွင် အောင်ပန်းမြို့ရှိ တပ်မတော်ဆေးရုံသို့ ခေါ်ဆောင်ကာ သီးသန့်ဆောင်၌ ထားရှိ၍ ဆေးကုသမှု ပေးနေစဉ် ကျန်းမာရေးနှင့် အားကစား ဝန်ကြီးဌာနက ယနေ့ ဩဂုတ်လ ၅ ရက်၊ နံနက်ပိုင်း ထုတ်ပြန်ချက်တွင် COVID-19 ပိုးတွေ့လူနာ အဖြစ် အတည်ပြုထုတ်ပြန်ခဲ့ခြင်း ဖြစ်သည်။
.
“ သူ့ (လူနာ) မိသားစုကိုလည်း တပ်ပိုင်းကပဲ စောင့်ကြည့်က ုသနေတယ်လို့ သိရပါတယ်။ အဲဒီ ကျေးရွာကိုတော့ လောလောဆယ် Lockdown မလုပ်သေးပေမယ့် ထိတွေ့မှု ရှိနိုင်တဲ့သူ အားလုံးကို Home Querantine ထားပါတယ်။ သူ့ တပ်ရှေ့မှာပဲ ဆိုတော့ တပ်က အားလုံးကို လုပ်ဆောင်နေပါတယ်။” ဟု ပင်လောင်းမြို့နယ်အုပ်ချုပ်ရေးမှူး ဦးဘုန်းထက်နိုင်က ကမ္ဘောဇတိုင်းသို့ ပြောသည်။
.
ကလောမြို့နယ်နှင့် ပင်လောင်းမြို့နယ်တို့တွင် ကြိုတင်စုဖွဲ့ ဇာတ်တိုက် လေ့ကျင့်ထားသော COVID-19 ရောဂါ ကာကွယ်၊ ထိန်းချုပ်၊ ကုသမှုဆိုင်ရာ ဆေးအဖွဲ့များဖြင့် ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်များနှင့် အညီ ဆောင်ရွက်လျက် ရှိပြီး ပိုးတွေ့လူနာ နေထိုင်ခဲ့သည့် လွင်ရွာကျေးရွာအား လိုအပ်ပါက Lockdown ပြုလုပ်ရန် စီစဉ်လျက် ရှိကြောင်း သိရသည်။
