ကိုစိုး (ကမ္ဘောဇတိုင်း)
.
ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ အောင်မြင်စွာ
ကျင်းပနိုင်ခြင်းနှင့် ပြည်ထောင်စုသဘောတူစာချုပ် အစိတ်အပိုင်း (၃) အား လက်မှတ်ရေးထိုးချုပ်ဆိုနိုင်ခြင်းအတွက်
ဝမ်းမြောက်ကြောင်း ရှမ်းပြည်ပြန်လည်ထူထောင်ရေး ကောင်စီ (RCSS) က ယမန်နေ့ ဩဂုတ်လ ၂၈ ရက်တွင် ထုတ်ပြန်ကြေညာခဲ့သည်ဟု သိရသည်။
.
.
ထိုအပြင် ပြီးခဲ့သည့် ဩဂုတ်လ ၂၆ ရက်က နေပြည်တော်တွင် ပြုလုပ်ခဲ့သည့်
ပြည်ထောင်စုလွှတ်တော် အစည်းအဝေး တွင် ပြည်ထောင်စုသဘောတူစာချုပ် အစိတ်အပိုင်း (၃) အား
မှတ်တမ်းတင်ပေးခဲ့သည့်အတွက် RCSS အနေဖြင့် ဂုဏ်ယူ ဝမ်းမြောက်ကြောင်း ယင်းထုတ်ပြန်ကြေညာချက်တွင်
ဖော်ပြပါရှိသည်။
ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ စတုတ္ထအကြိမ်
အစည်းအဝေးများကို ဩဂုတ်လ ၁၉ ရက်မှ ၂၁ ရက်အထိ နေပြည်တော်ရှိ
မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၁ (MICC-1) တွင် ပြုလုပ်ခဲ့ပြီး အစည်းအဝေးတွင်
ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) မှ တင်သွင်းလာသော အဆိုပြုချက်များအား ညှိနှိုင်းဆွေးနွေးပြီး ရရှိလာသည့်
အဆိုပြုချက်များကို ပြည်ထောင်စု သဘောတူ စာချုပ် အစိတ် အပိုင်း (၃) အဖြစ် သဘောတူ လက်မှတ်ရေးထိုး
ချုပ်ဆိုခဲ့ခြင်းဖြစ်သည်ဟု သိရသည်။
.
အစည်းအဝေးသို့ တက်ရောက်လာသော ရှမ်းပြည်ပြန်လည်ထူထောင်ရေးကောင်စီ
ဥက္ကဋ္ဌ ဗိုလ်ချုပ်ကြီး ယွက်စစ်သည် နေပြည်တော်တွင် ကျင်းပခဲ့သည့်
ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အစည်းအဝေးများ တက်ရောက် ခြင်း အပါအဝင် (၉) ကြိမ်မြောက် JICM အစည်းအဝေးသို့ တက်ရောက်ခြင်း၊
ပြည်ထောင်စုငြိမ်းချမ်းရေးညီလာခံ -၂၁ ရာစုပင်လုံ စတုတ္ထအစည်းအဝေး ဖွင့်ပွဲတွင် အဖွင့်အမှာစကား
ပြောကြားခြင်း၊ နေပြည်တော်တွင် ရောက်ရှိနေစဉ် ကာလအတွင်း ငြိမ်းချမ်းရေးလုပ်ငန်းစဉ်၊
လက်ရှိနိုင်ငံရေး အခြေအနေ၊ ရွေးကောက်ပွဲဆိုင်ရာကိစ္စ၊ ကမ္ဘာလုံးဆိုင်ရာ COVID-19 ကပ်ရောဂါ ကာကွယ်၊
ထိန်းချုပ်၊ ကုသရေးဆိုင်ရာ ပူးပေါင်းဆောင်ရွက်ရေးကိစ္စ၊ ဒေသဖွံ့ဖြိုးရေးလုပ်ငန်း များနှင့်
ပတ်သက်၍ အစိုးရ၊ တပ်မတော်၊ နိုင်ငံရေးပါတီများ၊ နိုင်ငံတကာသံတမန်များနှင့် အမြင်ချင်းဖလှယ်
ဆွေးနွေး ခြင်းများကို ဆောင်ရွက်နိုင်ခဲ့သည်ဟု သိရသည်။
.
ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) သည် ပြီးခဲ့သည့် ၂၀၁၅ ခုနှစ်က အစိုးရနှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်
လက်မှတ်ရေးထိုးခဲ့သည့် လက်နက်ကိုင် အဖွဲ့အစည်းများအနက် တစ်ဖွဲ့ အပါအဝင်ဖြစ်ပြီး ထိုင်း-မြန်မာနယ်စပ်
လွယ်တိုင်းလျှံတွင် ဌာနချုပ် ဖွင့်လှစ်ထားရှိ ကြောင်း သိရသည်။
.
