မိုးမိတ်တွင် ငွေကျပ် သိန်း ၁၈၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းမိ

နန်းထက်ထက်

.

မိုးမိတ်မြို့နယ်တွင် ဩဂုတ်လ ၂၉ ရက်၊ ညသန်းခေါင်အချိန်က ငွေကျပ်သိန်း ၁၈၀ တန်ဖိုးရှိ စိတ်ကြွရူးသွပ်ဆေးပြား များအား ဖမ်းဆီးရမိခဲ့ပြီး ကွင်းဆက်များအား ထပ်မံဖမ်းဆီးရမိခဲ့ကြောင်း သိရသည်။

.

.

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဩဂုတ်လ ၂၉ ရက်၊ ည သန်းခေါင် (၁၂ နာရီ) အချိန်ခန့်က သက်သေများနှင့်အတူ မိုးမိတ်မြို့နယ်၊ မိုးမိတ်-မိုးကုတ်သွားကားလမ်းတွင် တားဆီး နှိမ်နင်းရေးလုပ်ငန်းများဆောင်ရွက်နေစဉ် မိုးကုတ်မြို့ဘက်မှ မိုးမိတ်မြို့ဘက်သို့ မိုင်းရယ်မြို့နယ်၊ မန်ဖြတ်ကျေးရွာ နေ မနီလာခိုင် စီးနင်းမောင်းနှင်လာသည့် မော်တော်ဆိုင်ကယ်အား ရပ်တန့်စစ်ဆေးရှာဖွေရာ ဆိုင်ကယ်တွင် သိုဝှက် သယ်ဆောင်လာသော ပလတ်စတစ်ကပ်ခွာအိတ်များဖြင့်ထည့်ထားသည့် စိတ်ကြွရူးသွပ်ဆေးပြား ၁၈၀၀၀ ပြား၊ ဒေသကာလပေါက်စျေးတန်ဖိုးငွေကျပ် ၁၈၀ သိန်းအား ဖမ်းဆီးရမိခဲ့ကြောင်း သိရသည်။

.

ဆက်လက်ပြီး ကွင်းဆက်ပေါ်ပေါက်ချက်အရ မိုးမိတ်မြို့နယ်၊ ဒိုးပင်ကျေးရွာနေ မဇင်မာအား ဩဂုတ်လ ၃၀ ရက်၊ နံနက် ၁ နာရီခန့်တွင် အဆိုပါနေရာ၌ မော်တော်ဆိုင်ကယ်နှင့်အတူ ထပ်မံဖမ်းဆီးရမိခဲ့ကြောင်း သိရသည်။

.

အဆိုပါ မူးယစ်ဆေးဝါးများ ဖမ်းဆီးရမိမှုနှင့် ပတ်သက်၍ မိုးမိတ်မြို့မရဲစခန်းတွင် မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေဖြင့် အမှုဖွင့်အရေးယူပြီး ကွင်းဆက်များ ဖော်ထုတ်စစ်ဆေးလျက်ရှိကြောင်း သိရသည်။

.