နမ္မတူ-ဘော်တွင်းလမ်းတွင် မိုးရွာသွန်းမှုကြောင့် ကျောက်တောင်ကမ်းပါး ပြိုကျ

စောဦး (ရတနာမြေ)

.

ကျောက်မဲခရိုင်၊ နမ္မတူမြို့နယ်၊ နမ္မတူ-ဘော်တွင်းသွား ကားလမ်း၊ နမ္မတူမြို့နယ်မှ ၃ မိုင်ခန့်အကွာတွင် ယနေ့ ဩဂုတ်လ ၁၉ ရက်၊ နံနက် ၉ နာရီခန့်က မိုးအဆက်မပြတ် ရွာသွန်းမှုကြောင့် ကျောက်တောင်ကမ်းပါး ပြိုကျမှု ဖြစ်ပွားခဲ့ ကြောင်း သိရသည်။

.

.

ကျောက်တောင်ကမ်းပါးပြိုကျမှုဖြစ်ပွားခဲ့သည့်နေရာသို့ နမ္မတူမြို့နယ် အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးစိုးရာဇာလင်း၊ ဒုတိယဦးစီးမှူး ဦးဝေထွန်းအောင်၊ မြို့နယ်မီးသတ်ဦးစီးဌာနမှ မြို့နယ်ဦးစီးမှူး ဦးဝဏ္ဏထွန်းအေးနှင့် တပ်ဖွဲ့ဝင်များ၊ ဌာနဆိုင်ရာဝန်ထမ်းများမှ မြို့နယ်လမ်းဦးစီးဌာနနှင့် ပူးပေါင်း၍ လမ်းအထူးအဖွဲ့ (၆)မှ Loader ၁ စီးဖြင့် ကျောက်တောင်ကမ်းပါး လမ်းပေါ်သို့ပြိုကျပိတ်ဆို့ခဲ့သော အရှည် ၁၈ ပေခန့် အမြင့် ၁၀ ပေခန့် ကျောက်ခဲနှင့် မြေသားများကို ဖယ်ရှားလျက်ရှိရာ နေ့လယ် ၁ နာရီခွဲ အချိန်ခန့်တွင် တစ်ဝက်ခန့်နီးပါး ဖယ်ရှားရှင်းလင်း နိုင်ခဲ့ပြီး ညနေပိုင်းတွင် အပြီးဖယ်ရှားရှင်းလင်းနိုင်မည် ဖြစ်ကြောင်း သိရသည်။

.

အဆိုပါ ကျောက်တောင်ကမ်းပါးပြိုကျမှုကြောင့် လူ၊ မော်တော်ယာဉ်နှင့် တိရစ္ဆာန်များ ထိခိုက်ဆုံးရှုံးမှုမရှိကြောင်း သိရသည်။

.