တာချီလိတ်တွင် ငွေကျပ်သန်းပေါင်း ၁၅၀၀၀ ကျော် တန်ဖိုးရှိ ICE မူးယစ်ဆေးဝါးများ ဖမ်းမိ

မင်းဇော်မင်း

.

တာချီလိတ်မြို့နယ်၊ မယ်လိတ်ပါကော်-ဝေလလန်ကျေးရွာချင်းဆက်လမ်းတွင် ဩဂုတ်လ ၁၃ ရက်၊ နေ့လယ်ပိုင်းက ငွေကျပ် သန်းပေါင်း ၁၅၆၅၀ တန်ဖိုးရှိ ICE ဟုယူဆရသော အဖြူရောင်ပုံဆောင်ခဲ ၆၂၆ ကလိုအား ဖမ်းဆီးရမိ ခဲ့ကြောင်း သိရသည်။

.

.

ပူးပေါင်းအဖွဲ့သည် သတင်းအရ ဩဂုတ်လ ၁၃ ရက်၊ နေ့လယ် ၁ နာရီအချိန်ခန့်က တာချီလိတ်မြို့နယ်၊ မယ်ပါလိတ် ပါကော်-ဝှေလလန်ကျေးရွာချင်းဆက်လမ်းတွင် စောင့်ဆိုင်းနေစဉ် ဖတ်ဟိကျေးရွာဘက်မှ ဝမ်ဆောက်ခုံကျေးရွာ ဘက်သို့ စိုင်းကျောက် မောင်းနှင်လာသည့် ဆိုင်ကယ်အား ဝိုင်းဝန်းပိတ်ဆို့ ဖမ်းဆီးရှာဖွေနေစဉ် စိုင်းနော်ခမ်း မောင်းနှင်လာသည့် FORTUNER အမျိုးအစား အနက်ရောင်မော်တော်ယာဉ် ရောက်ရှိလာသဖြင့် ဝိုင်းဝန်းပိတ်ဆို့ ဖမ်းဆီးရှာဖွေရာ ယာဉ်နောက်ခန်းအတွင်းမှ ICE ဟု ယူဆရသော အဖြူရောင်ပုံဆောင်ခဲ အလေးချိန် ၂၁၀ ကီလိုအား ရှာဖွေတွေ့ရှိ သိမ်းဆည်းရမိခဲ့ကြောင်း သိရသည်။

.

အဆိုပါ မော်တော်ဆိုင်ယာဉ်နှင့် မော်တော်ဆိုင်ကယ်အား စစ်ဆေးရှာဖွေနေစဉ် နောက်မှ လိုက်ပါလာသော ယာဉ်တစ်စီးက မောင်းနှင် ထွက်ပြေးသဖြင့် ပူးပေါင်းအဖွဲ့မှ လက်နက်ငယ်များဖြင့် ပစ်ခတ်ခဲ့သော်လည်း ဆက်လက်မောင်းနှင်ထွက်ပြေးသွား သဖြင့် လိုက်လံရှာဖွေရာ ယင်းနေ့ညနေ ၄ နာရီ၊ ၁၅ မိနစ်ခန့်တွင် အဆိုပါ မော်တော်ယာဉ်အား ဝမ်ဆောက်ခုံကျေးရွာ အဝင်လမ်းတွင် တွေ့ရှိခဲ့ကြောင်း သိရသည်။.

ဆက်လက်ပြီး ယာဉ်တွေ့ရှိရာနေရာ ပတ်လည်အား ရှာဖွေရာ ကိုက် ၅၀ ခန့်အကွာ လျှိုအတွင်းမှ ICE ဟု ယူဆရသော အဖြူရောင်ပုံဆောင်ခဲ အလေးချိန် ၇၈ ကီလိုအား ထပ်မံသိမ်းဆည်းရမိခဲ့ကြောင်း သိရသည်။

.

အလားတူ ပူးပေါင်းအဖွဲ့မှ အသေးစိတ်ရှာဖွေရာ ဝမ်ဆောက်ခုံရွာ၏ အနောက်ဘက် ရာဘာတောအတွင်း ယာဉ်တစ်စီး ၏ နောက်ခမ်းအတွင်းမှ ICE ဟုယူဆရသော အဖြူရောင်ပုံဆောင်ခဲ အလေးချိန် ၃၃၈ ကီလိုခန့်ကိုထပ်မံတွေ့ရှိ သိမ်းဆည်းရမိခဲ့ကြောင်း သိရသည်။

.

ဖမ်းဆီးရမိသူ တာချီလိတ်မြို့၊ ဝမ်ကောင်းမွန်ရပ်ကွက်နေ စိုင်းကျော်၏ ထွက်ဆိုချက်အရ ဩဂုတ်လ ၁၃ ရက်၊ နံနက် ၇ နာရီတွင် မယ်လိတ်ပါကော်ကျေးရွာသွား လမ်းဘေးရှိ ၎င်း၏ လယ်အတွင်းရေသွင်းနေမှဒကို ကြည့်ရှုနေစဉ် ယခင်က ရင်းနှီးခဲ့ဖူးသည့် ပီအိုက် (ခ) စိုင်းခမ်း ဆိုသူ ရောက်ရှိလာပြီး မယ်လိတ်ပါကော်-ကျေးရွာသွားလမ်းကို မသိသဖြင့် လိုက်ပို့ရန်နှင် လမ်းပြက ထိုင်းနိုင်ငံသုံး ဘတ်ငွေ ၁၀၀၀ ပေးမည်ဟု ဆိုသဖြင့် သဘောတူပြီး ပီအိုက် (ခ) စိုင်းခမ်းမှ ၎င်း၏သူငယ်ချင်းများကို သွားရောက်ခေါ်မည်ဆိုကာ ယာဉ်နောက်မှ ဆိုင်ကယ်ဖြင့်လိုက်ခဲ့ရန်ခေါ်သဖြင့် ဝမ်မုံကျေးရွာ အနီးရှိဖရဲခြံဆိုင်တွင် ၎င်းအားခေါ်ဆောင်လာသူနှင့် ဖမ်းဆီးရမိသူ အပါအဝင် အမျိုးသား ၄ ဦးကို တွေ့ရှိကာ နေ့လယ်စာ အတူစားသောက်ပြီး ရှေ့ပြေးခေါ်ဆောင်လာစဉ် ပူးပေါင်းအဖွဲ့မှ ဖမ်းဆီးမိခြင်းဖြစ်ကြောင်း သိရသည်။

.

မူးယစ်ဆေးဝါးများတင်ဆောင်လာသည့် မော်တော်ယာဉ်ဖြင့် ဖမ်းမိသူ ကာလိမြို့၊ နားတောင်းကျေးရွာနေ စိုင်းနော်ခမ်း ဆိုသူဖြစ်ပြီး ၎င်း၏ ပြောပြချက်အရ အဆိုပါ မူးယစ်ဆေးဝါးများမှာ ၎င်းနှင့်ရင်းနှီးသည့် အိုက်ဆီ (ခ) စိုင်းဆီ မှတစ်ဆင့် သိကျွမ်းရသည့် ပီကျွမ်မှ သယ်ခိုင်းသည့် မူးယစ်ဆေးဝါးများဖြစ်ကြောင်း၊ ဝမ်ဟိုင်းမှ ပီကျွမ်၏တပည့် အိုက်လုံနှင့် အမည်မသိ တရုတ်လူမျိုးတို့ သယ်ယူပေးပို့လာသည့် ကား ၃ စီးကို သြဂုတ်လ ၉ ရက်တွင် ၎င်းနှင့်အတူ အိုက်ဆီ၊ အိုက်ပီး တို့ယာဉ်အသီးသီးဖြင့် ကာလိသို့ သယ်ဆောင်လာခြင်းဖြစ်ပြီး ကာလိမှ တာချီလိတ်သို့သြဂုတ်လ ၁၂ရက်တွင် ဆက်လက်သယ်ဆောင်လာခြင်းဖြစ်ကာ ယင်းမှ ရှေ့ပြေးဖြစ်သူ စိုင်းကျောက်၏ ဆိုင်ကယ်မှလိုက်ပါလာရင်း သြဂုတ်လ ၁၃ ရက်တွင် ပူးပေါင်းအဖွဲ့မှ ဖမ်းဆီးခံရခြင်းဖြစ်ကြောင်း သိရသည်။

.

အဆိုပါ မူးယစ်ဆေးဝါးများနှင့်အတူ ဖမ်းဆီးရမိသည့် နားတောင်းကျေးရွာ၊ ကာလိမြို့နေ စိုင်းနော်ခမ်း၊ တာချီလိတ် မြို့နယ်၊ မိုင်းကိုးအုပ်စု၊ ဝမ်ခုံကျေးရွာနေ စိုင်းကျောက် တို့ကို ဝမ်ပုံနယ်မြေရဲစခန်းမှ မယ(ပ)၁၁/၂၀၂၀၊ မူး/စိတ်ပုဒ်မ ၁၉(က)/၂၁ ဖြင့် အမှုဖွင့်စစ်ဆေး ဆောင်ရွက်လျက်ရှိကြောင်း သိရသည်။

.