စိုင်းသိင်္ခသူ
.
ရန်ကုန်တိုင်းဒေသကြီး၊ ကွမ်းခြံကုန်းမြို့နယ်တွင် ဇူလိုင်လ
၃၁ ရက်၊ ညပိုင်းက လွိုင်လင်ခရိုင်၊ နမ့်စန်မြို့နယ်မှ သယ်ဆောင်လာပြီး မလေးရှားနှင့်
အင်ဒိုနီးရှားနိုင်ငံကြား ရေပြင်သို့ ပို့ဆောင်မည့် ငွေကျပ် ၈၀ ဘီလီယံခန့် တန်ဖိုးရှိ
အိုက်စ်မူးယစ်ဆေးများအား ကွင်းဆက် တရားခံများနှင့်အတူ ဖမ်းဆီးရမိခဲ့ကြောင်း သိရသည်။
.
.
ကွမ်းခြံကုန်းမြို့နယ်၊ လက်ခုပ်ကုန်းနယ်မြေရဲစခန်းမှ တပ်ဖွဲ့ဝင်များသည်
ဇူလိုင်လ ၃၁ ရက်၊ ည ၁၀ နာရီခွဲအချိန်ခန့်က လက်ခုပ်ကုန်းကျေးရွာအုပ်စု၊ ဆယ်အိမ်တန်းကျေးရွာ၊
တံငါလှေဆိပ်အနီးတွင် မသင်္ကာဖွယ် ရပ်တန့်ထားသော NISSAN CARVAN အမျိုးအစား မော်တော်ယာဉ်အား
ရှာဖွေရာ ယာဉ်ပေါ်တွင် ရဲဝေလင်း (ခ) အငယ်လေးအား တွေ့ရပြီး ယာဉ်နောက်ခန်းရှိ ဆာလာအိတ်များအတွင်းမှ
အိုက် ၉၉၉ ဒသမ ၈ ကီလို၊ ကာလတန်ဖိုး ကျပ် ၇၉ ဒသမ ၉၈ ဘီလီယံနှင့် Speed Boat တစ်စီးတို့ကို သိမ်းဆည်းရမိခဲ့ကြောင်း သိရသည်။
ထို့နောက် မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ ပူးပေါင်းစစ်ဆေး
ဖော်ထုတ်ချက်အရ သိမ်းဆည်းရမိ မူးယစ် ဆေးများအား ရှမ်းပြည်နယ်တောင်ပိုင်း၊ လွိုင်ခရိုင်နမ့်စန်မြို့နယ်မှ
သယ်ဆောင်လာခြင်းဖြစ်ပြီး ကွမ်းခြံကုန်းမြို့နယ်၊ လက်ခုပ်ကုန်းကျေးရွာမှတစ်ဆင့် ရေလမ်းကြောင်းဖြင့်
မလေးရှားနှင့် အင်ဒိုနီးရှားနိုင်ငံကြားရှိ ရေပြင်သို့ သယ်ဆောင် မည်ဖြစ်ကြောင်း သိရသည်။
.
ယင်း မူးယစ်ဆေးဝါးများ သယ်ဆောင်ရာတွင် ပူးပေါင်းပါဝင်ခဲ့ကြသည့်
လင်းလင်းထက် (ခ) လင်းငယ်အား ဩဂုတ်လ ၁ ရက်တွင် ဒရုံမြို့သစ် (တောင်ပိုင်း) မြို့နယ်၊
အမှတ် (၂၇) ရပ်ကွက်၊ ရှုခင်းသာလမ်းရှိ ဟိုတယ်၌ လည်းကောင်း၊ စိုင်းထွန်းလှိုင်အား ဩဂုတ်လ
၃ ရက်တွင် ကရင်ပြည်နယ်၊ လိပ်သိုမြိုန့ယ်၊ ရာဒိုစစ်ဆေးရေးဂိတ်တွင် လည်းကောင်း၊ ကျော်ဦး
(ခ) တရုတ်အား ဩဂုတ်လ ၄ ရက်တွင် တောင်ကြီးမြို့၊ မီးပုံးပျံကွင်းအနီး၌လည်းကောင်း၊ မမိုးသူဇာ
(ခ) မိုးမိုးသူ (ခ) မိုးမိုး နှင့် မမိုးသုကဗျာတို့အား ဩဂုတ်လ ၄ ရက်က ဟိုပုံးမြို့၌လည်းကောင်း၊
သိန်းရာဇ (ခ) သိန်းကြီးနှင့် ချစ်ပိုပို (ခ) ချစ်ပိုတို့အား ဩဂုတ်လ ၉ ရက်က မင်္ဂလာဒုံမြို့နယ်၊
ဂုံညှင်းနီကျူးကျော်ရပ်ကွက်၊ ခတ္တာလမ်း ရှိ နေအိမ်၌လည်းကောင်း Speed Boat ၁ စီး၊ မော်တော်ယာဉ် ၉ စီး၊ နေအိမ် ၃ လုံးတို့နှင့်အတူ အသီးသီး ဖမ်းဆီးရမိခဲ့ကြောင်း
သိရသည်။
.
အဆိုပါအမှုမှ ဖမ်းဆီးရမိသည့် ရွှေ့ပြောင်းနိုင်သော ပစ္စည်းများနှင့်
မရွှေ့ပြောင်းနိုင်သော ပစ္စည်းများအား ယာယီ ချိတ်ပိတ်သိမ်းဆည်းထားရှိပြီး ကွင်းဆက်တရားခံများအား
စစ်ဆေးလျက်ရှိကာ မူးယစ်ဆေးဝါးနှင့် စိတ်ကိုပြောင်းလဲ စေသော ဆေးဝါးများဆိုင်ရာဥပဒေ၊
ငွေကြေးခဝါချမှု တိုက်ဖျက်ရေးဥပဒေတို့ဖြင့် အမှုဖွင့်အရေးယူနိုင်ရေး ဆောင်ရွက် လျက်ရှိကြောင်း
သိရသည်။
.
