ကိုစိုး (ကမ္ဘောဇတိုင်း)
.
ဒုတိယအကြိမ် ရှမ်းပြည်နယ်လွှတ်တော် အကြိမ် (၂၀) မြောက် ပုံမှန်အစည်းအဝေးကို
လာမည့် စက်တင် ဘာလ ၂ ရက်တွင် စတင်ကျင်းပပြုလုပ်သွားမည်ဖြစ်ကြောင်း သိရသည်။
.
.
“စက်တင်ဘာ ၂ ရက်မှာ ကျင်းပပါမယ်။ နောက်ဆုံးအစည်းအဝေး ရယ်လို့တော့
ပြောလို့မရသေးဘူးပေါ့။ ဖြစ်တော့ ဖြစ်နိုင်တယ်။ မေးခွန်းတွေ၊ အဆိုတွေ ရှိပါမယ်။ ဥပဒေမူကြမ်းကတော့
ဘတ်ဂျက်ဥပဒေကြမ်း ရှိပါမယ်” ဟု ရှမ်းပြည်နယ်လွှတ်တော် ဥက္ကဋ္ဌ ဦးစိုင်းလုံးဆိုင်က ကမ္ဘောဇတိုင်းသို့
ပြောသည်။
ဒုတိယအကြိမ် ရှမ်းပြည်နယ်လွှတ်တော်တွင် လွှတ်တော်ကိုယ်စားလှယ်
စုစုပေါင်း ၁၃၉ ဦး ရှိပြီး လွှတ်တော် သက်တမ်းအတွင်း ပုံမှန်အစည်းအဝေး ၁၉ ကြိမ်၊
အရေးပေါ်အစည်းအဝေး ၄ ကြိမ်နှင့် အထူးအစည်းအဝေး ၂ ကြိမ်၊ စုစုပေါင်း လွှတ်တော်အစည်းအဝေး
၂၅ ကြိမ် ကျင်းပပြုလုပ်ခဲ့ပြီးဖြစ်ကာ ယင်းအစည်းအဝေးများတွင် အဆို ၆၃ ခု
တင်သွင်းခြင်း၊ ကြယ်ပွင့်ပြမေးခွန်း ၁၀၆၀ ခု မေးမြန်းခြင်းနှင့် သက်ဆိုင်ရာ
ပြည်နယ်အဆင့် အဖွဲ့အစည်းဝင် ပုဂ္ဂိုလ်များက ဖြေကြားခြင်း၊ ကြယ်ပွင့်မပြမေးခွန်း
၇၇၆ ခု မေးမြန်းဖြေကြားခြင်းတို့ကို ဆောင်ရွက်နိုင်ခဲ့ပြီး ဖြစ်ကြောင်း သိရသည်။
.
