ကျောက်မဲတွင် မော်တော်ယာဉ် တစ်စီးအား လက်နက်ကိုင်များက ပစ်ခတ်သဖြင့် တစ်ဦး ဒဏ်ရာရ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Sunday, August 16, 2020

ကျောက်မဲတွင် မော်တော်ယာဉ် တစ်စီးအား လက်နက်ကိုင်များက ပစ်ခတ်သဖြင့် တစ်ဦး ဒဏ်ရာရ


မင်းဇော်မင်း
.
ကျောက်မဲမြို့နယ်တွင် ဩဂုတ်လ ၁၆ ရက်၊ နံနက်ပိုင်းက အိမ်စီး မော်တော်ယာဉ် တစ်စီးအား လက်နက်ကိုင်များက ပစ်ခတ်သဖြင့် ယာဉ်ပေါ်ပါသူ တစ်ဦး ဒဏ်ရာ ရရှိ၍ ကျောက်မဲဆေးရုံ၌ ဆေး ကုသမှု ခံယူနေရကြောင်း သိရသည်။
.
နောင်ချိုမြို့နယ် ၊ အုမ္မခါးကျေးရွာအုပ်စု၊ ငုတ်ကလေးကျေးရွာနေ ဦးမျိုး မောင်းနှင်ပြီး ကျောက်မဲမြို့နယ်၊ လွယ်စောင့်အုပ်စု၊ တောင်ခြေကျေးရွာနေ ဦးအိုက်စော၊ နောင်ချိုမြို့နယ် ၊ အုမ္မခါးကျေးရွာအုပ်စု၊ ငုတ်ကလေးကျေးရွာနေ စိုင်းနေဦးတို့ လိုက်ပါ စီးနင်းလာသည့် မော်တော်ယာဉ်သည် နောင်ချိုမှ ကျောက်မဲသို့ ဩဂုတ်လ ၁၅ ရက်၊ ညပိုင်းက မောင်းနှင်နေစဉ် အထက်ရဲရွာ ရေအားလျှပ်စစ်သွား ကားလမ်း မော်မာအုပ်စု၊  ကုန်းညှောင့်ကျေးရွာအကျော် တစ်မိုင်ခန့် အရောက်တွင် လက်နက်ငယ်များ ကိုယ်စီ ကိုင်ဆောင်ထားကြသော အမည်မသိ အရပ်ဝတ် ၇ ဦးခန့်မှ ယာဉ်အား တားဆီးရာ ယာဉ်အား ရပ်တန့်ပေးခြင်း မပြုသောကြောင့် လက်နက်ငယ်များဖြင့် ၁ဝ ချက်ခန့် ပစ်ခတ်ခဲ့ခြင်း ဖြစ်ကြောင်း သိရသည်။
.

ယင်းကဲ့သို့ လက်နက်ငယ်များဖြင့် ပစ်ခတ်မှုကြောင့် ဦးအိုက်စော၏ ယာဘက် ချိုင်းအောက်တွင် ကျည် ဖောက်ဝင် ဒဏ်ရာ ရရှိကာ တောင်ခြေကျေးရွာတွင် ညအိပ်ခဲ့ပြီးနောက် ဩဂုတ်လ ၁၆ ရက်၊ နံနက်ပိုင်းတွင် ကျောက်မဲဆေးရုံသို့ ပို့ဆောင်ကာ ဆေးကုသမှုခံယူနေခြင်း ဖြစ်ကြောင်း သိရသည်။
.
အဆိုပါ လက်နက်ငယ်များဖြင့် ပစ်ခတ်ခဲ့သည့် အမည်မသိ လက်နက်ကိုင်များအား ဥပဒေအရ အရေးယူ ဆောင်ရွက်နိုင်ရန် ရဲတပ်ဖွဲ့က စုံစမ်းဖော်ထုတ်လျက်ရှိကြောင်း သိရသည်။

No comments:

Post a Comment

Journal Download

Photo of three cats

About