တောင်ကြီးမြို့နေ အမျိုးသမီးတစ်ဦး အပါအဝင် COVID-19 ပိုးတွေ့လူနာအသစ် ၁၃ ဦး ထပ်မံတွေ့ရှိ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, August 29, 2020

တောင်ကြီးမြို့နေ အမျိုးသမီးတစ်ဦး အပါအဝင် COVID-19 ပိုးတွေ့လူနာအသစ် ၁၃ ဦး ထပ်မံတွေ့ရှိ


ကမ္ဘောဇတိုင်း
.
ရှမ်းပြည်နယ်မြို့တော် တောင်ကြီးမြို့နေ အမျိုးသမီးတစ်ဦး အပါအဝင် COVID-19 ရောဂါ ဓါတ်ခွဲအတည်ပြုလူနာ အသစ် ၁၃ ဦး ထပ်မံတွေ့ရှိကြောင်း ကျန်းမာရေးနှင့် အားကစားဝန်ကြီးဌာန၏ ယနေ့ ဩဂုတ်လ ၂၉ ရက်၊ နံနက် ၈ နာရီ အချိန် ထုတ်ပြန်ချက်အရ သိရသည်။
.
.
“လူနာအမှတ် (၆၅၂) က တောင်ကြီးကပါ။ လူနာအမှတ် (၄၇၇) နဲ့ ထိတွေ့မှု ရှိခဲ့တဲ့သူပါ။ သူ့မိသားစုဝင် ၅ ဦးကတော့ အားလုံး Negative ပါ။ ကျန်တဲ့ ရှမ်းတောင်က ပို့ထားတဲ့ ဓါတ်ခွဲနမူနာတွေ အားလုံးကလည်း Negative ပါပဲ” ဟု ရှမ်းပြည်နယ် ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာဇဝနကို က ကမ္ဘောဇတိုင်းသို့ ပြောသည်။
.
ယင်း ပိုးတွေ့လူနာအမှတ် (၆၅၂) သည် ဩဂုတ်လ ၂ ရက်တွင် လူနာအမှတ် (၄၇၇) နှင့်အတူ ရန်ကုန်မြို့သို့ အတူ သွားရောက်ခဲ့သူဖြစ်ပြီး လက်ရှိတွင် တောင်ကြီးမြို့၊ ဘုရားဖြူရပ်ကွက်ရှိ ဓမ္မဥယျာဉ် Quarantine Center ၌ အသွားအလာ ကန့်သတ်စောင့်ကြည့်ထားသူတစ်ဦးဖြစ်ကာ ယနေ့ နံနက်ပိုင်းတွင် စင်တာမှ တောင်ကြီးမြို့၊ စဝ်စံထွန်းဆေးရုံသို ပို့ဆောင်ခဲ့ပြီးဖြစ်ကြောင်း သိရသည်။
.
အဆိုပါ ပိုးတွေ့လူနာအသစ် ၁၃ ဦးမှာ ရခိုင်ပြည်နယ်၊ စစ်တွေမြို့နယ်မှ ၄ ဦး၊ မြောက်ဦးမြို့နယ်မှ ၄ ဦး၊ ကျောက်ဖြူမြို့နယ်မှ ၂ ဦး၊ မြေပုံမြို့နယ်မှ ၁ ဦး၊ ကျောက်တော် မြို့နယ်မှ ၁ ဦးနှင့် ရှမ်းပြည်နယ်၊ တောင်ကြီးမြို့နယ်မှ ၁ ဦးတို့ဖြစ်ကြောင်း သိရသည်။
.
ဩဂုတ်လ ၂၈ ရက်အတွက် COVID-19 ရောဂါ ဓါတ်ခွဲစစ်ဆေးမှုများ အနေဖြင့် အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမ + ဒုတိယအသုတ်) ဓာတ်ခွဲနမူနာ ၁၂၀၂ ခု၊ ဆေးသုတေသနဦးစီးဌာန (DMR) မှ ဓာတ်ခွဲနမူနာ ၂၂၁ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) မှ (ပထမ+ဒုတိယအသုတ်) ဓာတ်ခွဲနမူနာ ၄၄၆ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မော်လမြိုင်)မှ (ပထမ + ဒုတိယအသုတ်) ဓာတ်ခွဲနမူနာ ၃၃၆ ခု၊ ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ ၁၀၆ ခု၊ ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ ၁၂ ခု၊ ပြည်သူ့ဆေးရုံကြီး၊ ပုသိမ်မြို့မှ ဓာတ်ခွဲနမူနာ ၆ ခု၊ ပြည်သူ့ဆေးရုံကြီး၊ မူဆယ်မြို့မှ ဓာတ်ခွဲနမူနာ ၄ ခု၊ နေပြည်တော်ပြည်သူ့ဆေးရုံကြီး ကုတင် (၁,၀၀၀) မှ ဓာတ်ခွဲနမူနာ ၈ ခုနှင့် ရန်ကုန်မြို့၊ အမှတ် (၁) တပ်မတော် ဆေးရုံကြီး ခုတင် (၁,၀၀၀) မှ ဓာတ်ခွဲနမူနာ ၁၉၄ ခု၊ စုစုပေါင်း ၂၅၃၅ ခုအား စစ်ဆေးခဲ့ခြင်းဖြစ်ကြောင်း သိရသည်။
.
သို့ဖြစ်၍ ယနေ့ ဩဂုတ်လ ၂၉ ရက်၊ နံနက်ပိုင်းအထိ မြန်မာနိုင်ငံတွင် COVID-19 ရောဂါ ဓါတ်ခွဲအတည်ပြုလူနာ ၆၅၆ ဦး ရှိလာပြီဖြစ်ပြီး ယင်တို့အနက် ၆ ဦး သေဆုံး၍ ၃၄၉ ဦးမှာ ရောဂါမှ ပြန်လည်သက်သာလာပြီဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About