COVID-19 ပိုးတွေ့လူနာအမှတ် (၄၇၇) မှာ တောင်ကြီးမြို့မှဖြစ်ပြီး ရန်ကုန်တွင် ရောက်ရှိနေသည်မှာ တစ်လခန့်ရှိပြီ ဖြစ် ဟုဆို - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Tuesday, August 25, 2020

COVID-19 ပိုးတွေ့လူနာအမှတ် (၄၇၇) မှာ တောင်ကြီးမြို့မှဖြစ်ပြီး ရန်ကုန်တွင် ရောက်ရှိနေသည်မှာ တစ်လခန့်ရှိပြီ ဖြစ် ဟုဆို


ကမ္ဘောဇတိုင်း
.
ကျန်းမာရေးနှင့် အားကစားဝန်ကြီးဌာန၏ ယနေ့ ဩဂုတ်လ ၂၅ ရက်ညပိုင်း ထုတ်ပြန်ချက်တွင် ပါဝင်သည့် COVID-19 ရောဂါ ဓါတ်ခွဲအတည်ပြုလူနာအမှတ် (၄၇၇) မှာ တောင်ကြီးမြို့မှ ဖြစ်ပြီး ၎င်းသည် ရန်ကုန်သို့ ရောက်ရှိနေသည်မှာ တစ်လခန့် ကြာမြင့်နေပြီဖြစ်သည်ဟု ရှမ်းပြည်နယ် ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာ ဇဝနကိုက ပြောဆိုခဲ့သည်။
.
.
“သူ့နေရပ်လိပ်စာကတော့ တောင်ကြီးပါ။ ရန်ကုန်မှာ ရောက်နေတာက တစ်လလောက် ရှိသွားပါပြီ။ ရောဂါနဲ့ ပတ်သက်လို့ တောင်ကြီးမှာ သူနဲ့ဆက်စပ်မှုရှိ/မရှိ ပြန်ပြီးတော့ မေးနေပါတယ်။ ဒါပေမဲ့ ၂၁ ရက် ကျော်နေပြီ ဖြစ်တဲ့အတွက် ဆက်စပ်မှုရှိဖို့ကတော့ ရာခိုင်နှုန်း နည်းပါတယ်။ ဩဂုတ်လ ၂၂ ရက်က ရောဂါလက္ခဏာ စပြလို့ သူ့ကို စစ်လိုက်တာပါ။ သူက သြဂုတ်လ ၂ ရက်နေ့ကတည်းက ရန်ကုန်ကို တခြားကိစ္စနဲ့ သွားနေတာပါ” ဟု ဒေါက်တာဇဝနကိုက ကမ္ဘောဇတိုင်းသို့ ပြောသည်။
.
အဆိုပါ လူနာအမှတ် (၄၇၇) သည် တောင်ကြီးမြို့၊ ဘုရားဖြူရပ်ကွက်နေ အသက် ၄၅ နှစ်အရွယ် အမျိုးသမီးဖြစ်ပြီး ပြည်ပသို့ ခရီးသွား ရာဇဝင်နှင့် ရောဂါအတည်ပြုလူနာများနှင့် ထိတွေ့ခဲ့သည့် ရာဇဝင် မရှိသူဖြစ်ကာ ဩဂုတ်လ ၂၂ ရက်တွင် ရှမ်းပြည်နယ်မှ ရန်ကုန်သို့ရောက်ရှိနေသူဖြစ်ကြောင်း ၎င်း၏ ခရီးသွားရာဇဝင် ဇယားကို လူမှုကွန်ရက် စာမျက်နှာ (facebook)တွင် ပျံ့နှံ့​နေသည်ကို တွေ့ရသည်။
.
မြန်မာနိုင်ငံတွင် မတ်လ ၂၃ ရက်မှ ယနေ့ (သြဂုတ်လ ၂၅ ရက်)၊ ည ၈ နာရီခွဲထိ COVID-19 ပိုးတွေ့ အတည်ပြုလူနာ ၅၀၄ ဦး ရှိပြီး ယင်းအနက် ၆ ဦး သေဆုံး၍ ၃၄၁ ဦးမှာ ပြန်လည် သက်သာလာပြီဖြစ်ကာ ရှမ်းပြည်နယ်အတွင်း COVID-19 ရောဂါ အတည်ပြုလူနာ ၁၀ ဦး ရှိပြီး အားလုံးမှာ ရောဂါမှ ပြန်လည်သက်သာ၍ ဆေးရုံဆင်းသွားပြီ  ဖြစ်​ကြောင်း သိရသည်။
.

No comments:

Post a Comment

Journal Download

Photo of three cats

About